mokusi 7 - buacou seiso no faeva esvʉtʉ

posise'conia msʉptʉhʉ posisospotʉ ci cou'isolaelu

¹ to ataveisi, os'o aiti 'omo sʉptʉ ci tensi mo yac'ʉ to sʉptʉ ci pengpingna ta ceoa, tomʉti 'o poepe ta aukukuyungu ta ceoa, o'te poa mea'usnu ta ceoa, etʉpʉ, ho ito evi 'o poepe.

² os'o i'vaha aiti 'omo h'unasi ci tensi, isi pʉta 'o toopca to 'auesiesi yaansou ci hamo, i'mi ta esmomhana ho cmʉ'ho. mo tmunoi mi'usnu to isi pafi to tonʉ to hamo. meelʉ poa kuzo ta ceoa ho etʉpʉ cimo sʉptʉ ci tensi ho moozoyʉ:

³

⁴ os'o talʉi 'omo mainca. 'o isi topci to toopca ta 'ayumona ta suezopʉ ta 'isolaelu, tateuyuna mo posise'conia msʉptʉhʉ posisospotʉ:

⁵ 'o isi topci to toopca to suezopʉ to yutaya, mo posimaskʉ posipopsohʉ; suezopʉ to liipen, mo posimaskʉ posipopsohʉ; suezopʉ to ciato, mo posimaskʉ posipopsohʉ;

⁶ suezopʉ to 'aso, mo posimaskʉ posipopsohʉ; suezopʉ to nafutali, mo posimaskʉ posipopsohʉ; to suezopʉ to manasi, mo posimaskʉ posipopsohʉ;

⁷ to suezopʉ to siimen, mo posimaskʉ posipopsohʉ; to suezopʉ to levi, mo posimaskʉ posipopsohʉ; to suezopʉ to 'isacia, mo posimaskʉ posipopsohʉ;

⁸ to suezopʉ to sipulong, mo posimaskʉ posipopsohʉ; to suezopʉ to yosefu, mo posimaskʉ posipopsohʉ; to suezopʉ to penyaming, mo posimaskʉ posipopsohʉ.

i'mi to mauhpʉhpʉngʉ ci botngonʉ

⁹ atavei, os'o aiti, teolʉi 'omo botngonʉ ci cou, o'a isi peelʉi tasvʉta 'o hia botngonʉa. mo i'mi to mauhpʉhpʉngʉ, mayoyou, masusuezopʉ, maee'e ho cmʉ'ho, acʉhʉ yac'ʉ to tuhcu to suoca'ha ho ito okomoatʉ'nʉ, sifʉecʉ'za ho mʉpʉtʉ to ehʉngʉ no ehufu.

¹⁰ mo tmunoi moozoyʉ: <'o to'usnu mo i'mi tomo yusuhngu to suoca'ha, to hamoto ho ito okomoatʉ'nʉ!>

¹¹ 'o afu'u tensi mo acʉcʉhʉ bikuyungu to suoca'ha, coolo, ho ito sʉptʉ ci yuansou. mo yonto tuhcu to suoca'ha ho m'ocnguyu ta ceoa, m'ohkuyu to hamo.

¹² mainca: <'aamen! ina tohmomoengʉ, psoevohngʉ, moutʉs'ʉ, 'aveoveoyʉ, so'einva, tonʉ, taso acʉhʉ'so tmaovei to hamoto, 'auesiesi! 'aamen.>

¹³ panto cihi ci coolo isi tuocosi a'o:

¹⁴ os'o yut'inga: isi mi'usni a'o ho yainca: <'emo maica ci cou mosola yupaezumo to meoino meakvo'ʉ. ohe yomza to hmuyu to okomoatʉ'nʉ ho tocofkoyai si iachihe yʉsʉ.

¹⁵ ko'koeno, mo bi'upu ta tuhcu ta suoca'ha ta hamo, huhucmasi yonto seitensi ho fifiho to hamo. i'omo yusuhngu to suoca'ha ci hamo tesi iachia aʉt'ʉca.

¹⁶ 'anatehin'i i'vaho sieo, 'anate i'vaho mecu; 'o hie ho inala afu'u cuveu o'ana tesi toceu'si.

¹⁷ maica i'omo yusuhngu to suoca'ha ci okomoatʉ'nʉ tesi aʉt'ʉca hin'i, engocha hafa uhuto isi i'toekui no nsou; tesi yaeza acʉha paipeapi to hamo na esʉʉhe.>