mokusi 6 - buacou seiso no faeva esvʉtʉ

paavi 'o toopca

¹ os'o aiti 'o okomoatʉ'nʉ isi paavi 'o ahoisi tomo pitu ci toopca. ne mio, os'o talʉi 'omo coni to sʉptʉ ci yuansou mo mais'a mʉmʉ no ak'engʉca, mainca:

² os'o aiti, baito tomo conci fʉecʉ'za ci 'uma. 'omo smopayo mo mʉpʉtʉ to tʉ'sʉ, tiova 'o isi pafeni ci tafange, cu e'ohʉ ehtothomʉ, mo siho siho atpʉtʉ.

³ ne isi paavi to okomoatʉ'nʉ 'omo yuso to toopca, os'o talʉi 'omo yuso ci yuansou isi yainca:

⁴ micueno yuyafo 'omo coni to 'uma, mo fʉhngoya. 'omo smopayo mo mayo to tonʉ, poa ehtotothomʉ 'e hpʉhpʉngʉ, yupania 'o'opcoi 'e yatatiskova; isi i'vaha tiova 'o conci meoino no poyave.

⁵ ne isi paavi to okomoatʉ'nʉ 'o tuyu ci toopca, os'o talʉi 'o toteu ci yuansou mo mainca: os'o aiti, teolʉi 'omo conci kua'onga ci 'uma; 'omo smopayo mo mʉpʉtʉ to conci kinkina.

⁶ panto fihngau mo mais'a mo i'mi to sʉptʉ ci yuansou ho mainca: <'e hnoo no conohie tec'o cono kinkina na tesi psuv'ohi ci heome 'o'okosi; 'e hnoo no conohie tec'o tuyu no kinkina na tesi psuv'ohi ci heome maamtanʉ. 'o hʉsʉ no 'olivu ho i'o emi teav'as'a au'hi'hisa!>

⁷ ne isi paavi to okomoatʉ'nʉ 'o sʉptʉ to toopca, os'o talʉi 'o sʉptʉ ci yuansou mo mainca:

⁸ os'o aiti, teolʉi 'omo tatposa no fuu ci 'uma; 'o ongko tomo smopayo zou , mo toyʉyʉcʉ to'upu 'o vooecʉvcana. mo mayo to tonʉ, aspota coni 'o ihe atʉkca ta ceoa, te boemi to ehtothomʉ, seova, tma'congo, ho ito yuansou ta ceoa ho opcoi ta cou.

⁹ isi paavi to okomoatʉ'nʉ 'o eimo ci toopca, os'o aiti 'o f'uf'u to 'oyona sʉ'tʉ. panto piepiya to mosola nomio no psoyaski to e'e to hamo, meot'ʉcʉ ho 'akasi ho noa opcoza ci cou.

¹⁰ mo tmunoi ho moozoyʉ:

¹¹ 'omo macicihi micu tiou tomo fʉecʉ'ia ci yʉsʉ, yaeza talʉi 'o e'e cimo mi'usnu ho eucufnu, poan'a ake'i to'si'ʉyʉ, totea 'o moso toehungu fifiho to nooe'oca ho i'o masisinto ho tac'u totiski yaeza opcoza, ho tenac'u ohmamso 'o hia botngonʉ.

¹² os'o i'vaha aiti 'o okomoatʉ'nʉ ne isi paavi 'o nomʉ ci toopca. ne mio, mo tmanoi tmaot'ou 'e ceoa, smoekua'onga 'o hie; mais'a kua'onga ci yʉteʉ, aucunu fʉhngoya 'o feohʉ ho mais'a hmuyu;

¹³ mo i'mi ta pepe 'o congeoha ho supeopeohʉ, mais'a 'o o'amocu mo tacʉmʉ ci beahci to moezunge ho lasi peapeopeohneni to tucvihi.

¹⁴ mo mais'a isi taipupsu'ha ci tposʉ 'e engʉca, ho o'tena teolʉi; 'o mahcuhcuyu ho i'omo payo to etʉpʉ ci ceoa mo noezuhu to isi anana'va yoni.

¹⁵ 'o honte ta ceoa, 'ola aʉt'ʉcʉ, yuozomʉ, yuyupasʉ ho yaatonʉa, tolei, ho couziu, mo acʉhʉ totoefʉngʉ to feongo to hcuyu ho feongo to teisisi.

¹⁶ mo mi'usnu to hcuyu ho teisisi ho moozoyʉ:

¹⁷ maica micu esmi 'o hiesi no meoino sʉ'no; siya na ten'a biv'ohʉ?>