mokusi 5 - buacou seiso no faeva esvʉtʉ

tposʉ to oko moatʉ'nʉ

¹ os'o aiti 'omo yusuhngu to suoca'ha ci ic'o, 'o vhona to emucusi mo mʉpʉtʉ to tposʉ; 'e aavai ta tposʉ isi tangcʉngci to tposʉ, boemi to pitu ci thoomʉta.

² os'o i'vaha aiti 'o cihi ci sotasoa ci tensi, mo tmunoi ho psoyaska:

³ at'inghi, 'upena ta pepe, ceoa, ho mʉ'eona ta ceoa. uk'a cimo cihi cite meelʉ eocoyʉ ta tposʉ hocieno meelʉ mo'engho.

⁴ mi'o tmunoi mongsi, maica uk'a cimo 'aseolʉ no eyocoyʉ ta tposʉ tan'e hocieno meelʉ mo'engho.

⁵ micueno cihi to coolo 'omo mi'usnu a'o ho mainca: <'ote mongsi! aiti, 'omo i'mi to suezopʉ to yutaya ho yuyafo ci sisi - mʉntʉ'ca to tavite micu atpʉtʉ; tesi peelʉi paavi 'e pitu ci toopca, eocoi 'o tposʉ.>

⁶ acnguhu, os'o aiti 'o ihe paikuyungvi tomo sʉptʉ ci yuansou ho ito macocoolo ci suoca'ha, mo yac'ʉ 'o okomoatʉ'nʉ. 'o okomoatʉ'nʉ mo mais'a ohcula opcoza, yaa pitu ci sungu, pitu ci mcoo, 'ai'oeno 'omo pitu ci piepiya to hamo, isi popeoskuna ho poa smaingongabo ta hpʉhpʉngʉ.

⁷ mo smacmu'u 'o okomoatʉ'nʉ, i'mi to vhona tomo yusuhngu to suoca'ha ci ic'o ho tiova 'o tposʉ.

⁸ nemo maica 'o hioasi, 'omo sʉptʉ ci yuansou ho mpusku uspotʉ ci coolo mo m'ocnguyu to tuhcu to okomoatʉ'nʉ. 'omo macicihi to coolo mo acʉhʉ mʉpʉtʉ to tngootngo ho ito tngoo ci isi songcʉngci to konamusngau; 'e namusngau eni 'ai'oeno 'inoli to masisinto.

⁹ mo pasunaeno tomo conci faeva ci pasunaenva: zouc'o suu nate 'aseolʉ no tiou ta tposʉ, paavi 'o toopcasi; maica ohola opcoza suu! i'mi ho mosula yuhmuyu ho ciha 'e nsou. osko i'mi ta mayoyou. maee'e. masusuezopʉ. mauhpʉhpʉngʉ. psuovei 'e cou, poa tmaovei to hamo.

¹⁰ osko poa saisi ci hpʉhpʉngʉ, noa fifiho to hamo; tenala atʉkcʉ ta ceoa.

¹¹ os'o i'vaha aiti; os'o talʉi 'o fihngau tomo sobotngona ci tensi. mo yac'ʉ to aukukuyungu to suoca'ha. sʉptʉ ci yuansou ho i'o macocoolo,

¹² tmunoi pasunaeno: noa opcoza ci okomoatʉ'nʉ, 'aseolʉ no tiou no tonʉ. atngaso. moutʉs'ʉ. taso. so'einva. psoevohngʉ ho tohmomoengʉi!

¹³ os'o i'vaha talʉi 'omo yaa nsoua ta pepe. ceoa, ho mʉ'eona ta ceoa, mayuyuansou ta etʉpʉ, aʉcʉcʉhʉ ta taico ta mouhpʉhpʉngʉ, mo acʉhʉ pasunaeno: na tohmomoengʉ. so'einva. psoevohngʉ. ho tonʉ, te acʉhʉ tmaovei tomo yusuhngu to suoca'ha ci ic'o ho ito okomoatʉ'nʉ, uk'a noca'cʉ'hi!

¹⁴ 'omo sʉptʉ ci yuansou micu yut'ingi: <'aamen!> 'o macocoolo mo acʉhʉ m'ocnguyu ho m'ohkuyu.