mokusi 4 - buacou seiso no faeva esvʉtʉ

nala hia m'ohkuyu ne pepe

¹ acnguhu, mi'o baito tomon'a h'unasi ci mavolosi, teolʉi panto mo maavo ci phingi ta pepe. i'o o'ula talʉi ne noana'o cimo mais'a mo meela'pa ci fihngau mo i'vaho mi'usnu a'o ho mainca:

² osniacu eahafa to seilei a'o, os'o aiti 'omo conci suoca'ha ne pepe; cihi 'omo yusuhngu to suoca'ha.

³ 'o mi'ausnasi mo totiski to cingkoya ci fatu ho ito fʉhngoya hooseki ho psoevohngʉ. to aukukuyungu to suoca'ha isi paikuyungvi to hioyu, 'o tatposasi mo mais'a enghova ci hooseki.

⁴ to aukukuyungu to suoca'ha panto mpusku uspotʉ ci ca'hʉ, yusuhngu 'omo mpusku uspotʉ ci coolo, sʉ'eʉsʉ to fʉecʉ'za ci yʉsʉ, iceopngu tomo king ci tafange.

⁵ mo i'mito suoca'ha 'o moi'hocʉ, yamumi, ho mʉmʉ no ak'engʉca, to tuhcu to suoca'ha panto mehaptu ci veingi; 'ai'oeno 'omo pitu ci piepiya to hamo.

⁶ to tuhcu to suoca'ha pantomo cingkoya ho mais'a ngalasu ci etʉpʉ. to aukukuyungu to suoca'ha panto sʉptʉ ci yuansou, 'o feangosi mo aucunu mcoo.

⁷ 'omo tocni yuansou mo mais'a sisi; 'omo toueso mo mais'a oko no 'uachumu; 'omo toteu mo mi'u'usnu no sapci no cou; 'omo tospotʉ mo mais'a eiski.

⁸ 'o sʉptʉ ci yuansou, mo acʉhʉ yaa nomʉ ci yopngu, 'o yafana ho 'ayumonasi mo acʉhʉ yaa mcooa. homo hie ho feʉngna o'ala tosvo pasunaeno: socofkoya! socofkoya! socofkoya! nooe'oca - soyaa tonʉ ci hamo. ne noana'o, maitan'e, ho noana'o 'auesiesi yayo!

⁹ 'omo sʉptʉ ci yuansou mo pasunaeno to psoevohngʉ, so'einva, to'aveoveoyʉ ci pasunaenva, sʉ'teni tomo yusuhngu to suoca'ha ci 'auesiesi yayo ci ic'o.

¹⁰ ne mio, 'omo mpusku uspotʉ ci coolo mo m'ocnguyu ho m'ohkuyu tomo yusuhngu to suoca'ha, ho 'auesiesi yayo ci ic'o. ihe iachia siya to tuhcu to suoca'ha 'o tafangehe, mainca:

¹¹ nooe'ocamia, hamomia! teko 'aseolʉ no tiou no psoevohngʉ, so'einva, ho soyaatonʉa. ohsula teyai 'e acʉcʉhʉ; mo noa teyai 'e acʉcʉhʉ, ko'komo meelʉ yayo, isic'o acʉha ieni no 'tohʉngʉsu.