mokusi 20 - buacou seiso no faeva esvʉtʉ

toposifou

¹ ataveisi, os'o aiti 'omo cihi ci tensi mo i'mi ne pepe ho ohpueho, 'o emucusi mo mʉpʉtʉ to 'oyomzana maavo ne uk'a puesona ci mʉ'eona, ho ito mo mehacni ci kahkʉmnʉ ci ekʉka.

² isicu tʉtpʉta 'o pak'i ci long, 'ai'oeno fkoi noana'o, zou 'akuma, la yaeza yainca satan, te toposifou hote seo'eisi.

³ isi to'seni to uk'a puesona ci mʉ'eona to tensi. poekotva, topuhngi to toopca, poa o'tena maspepecvai ta mauhpʉhpʉngʉ, ac'ʉhʉ ho tenac'u nopaezumi 'o toposifou. ataveisi no noc'ʉhi, tena akameosa poesih'a.

⁴ mi'o i'vaho baito to piyo ci suoca'ha; i'omo yusuhngu to ic'o ci cou mo acʉhʉ mayo to tonʉ no yʉsvʉtʉ. os'o yaeza aiti 'o piepiya to mosola nomio no 'akasi to isi paavi to iesu ci so'emio ho ito e'e to hamo ho noa opcoza ci cou. o'amosola m'ohkuyu to yuansou ho ito uayuansoua, 'o sapcihe ho emucuhe maezo uk'a ci ongko to yuansou. mo acʉhʉ smoevovei, toehungu 'o kilisto ho toposifou honte.

⁵ (i'o mosola mcoi ci cou te totea 'emo toposifou niantec'u smoevovei.) zou c'on'a i'nʉskʉ smoevovei eni.

⁶ i'oisi peelʉi ta'ayumona ta mo i'nʉskʉ smoevovei ci cou te cofkoya ho ʉm'ʉmnʉ. 'o i'vaho mcoi uk'a ci tesi tonʉ no atʉkca 'emo maica ci cou; tena saisi to hamo ho ito kilisto, te toehungu 'o kilisto ho toposifou honte.

atpʉta 'o satan

⁷ ataveisi ta toposifou. te i'mi to poo'usna 'o satan ho poesih'a;

⁸ tesi usa ho pa'hi'povi 'o mauhpʉhpʉngʉ ta aukukuyungu, 'ai'oeno kooko ho i'o maako. tesi e'pʉ'pʉya to satan, yuyafo ho ehtotothomʉ; 'o hiahe botngonʉ mo mais'a 'o efuefu'u to aaskiti to etʉpʉ.

⁹ ihe nongaboi 'e ceoa, paikuyungvi 'o 'oyona to 'o'oko to hamo ho i'o isi ngohia ci hosa. at'inghi panto puzu cimo i'mi ne pepe ho ohpueho, hmoi 'o satan.

¹⁰ i'omo maspepecvai ci 'akuma isi to'seni tomo yunzou ci etʉpʉ no liukoo; 'o yuansou ic'o ho i'o meyoyongensa micu noana'o yonto ic'o. hie ho yofna te yonto ic'o ho tiou no pohtutumza, 'auesiesi o'ate ahtu tosvo.

sotavei ci yʉsvʉtʉ

¹¹ acnguhu, os'o aiti 'o conci mo fʉecʉ'ia ci suoca'ha. ho i'omo yusuhngu to ic'o. 'e engʉca ho ceoa mo acʉhʉ i'mi to tuhcusi ho toekameosʉ, 'anaisi ahtan'a huvahi.

¹² os'o i'vaha aiti 'o mohcu mcoi ci cou, 'upena 'omo suepe ho suaceaco, acʉhʉ yac'ʉ to tuhcu to suoca'ha. cu acʉha eyocoi 'o tposʉ; panto h'unasi ci conci tposʉ no nsou isi yaeza eyocoi. 'o mohcu mcoi ci cou isi acʉha ieni to niala peipeis'ausnahe, i'mi ta ohola tposi ta tposʉ tan'e ho tiou no yʉsvʉta.

¹³ 'e etʉpʉ ihecu acʉha tuyafa 'o mohcu mcoi ci cou; 'o mcoi ho i'o vooecʉvcana ihe yaeza tuyafa 'o ihe poekotva ci mohcu mcoi. 'emo maica ci cou te acʉha ieni no niala peipeis'ausnahe ho tiou no yʉsvʉta.

¹⁴ 'o mcoi ho i'o vooecʉvcana isi yaeza to'seni to mo puzu ci etʉpʉ. ('e puzu ci etʉpʉ 'aeno i'popsohʉ mcoi.)

¹⁵ na afu'a o'a isi tposi ta tposʉ no nsou ci ongko, te acʉha to'seni tomo puzu ci etʉpʉ.