mokusi 18 - buacou seiso no faeva esvʉtʉ

aapayo'ʉ 'o papilong

¹ ataveisi tan'e, os'o aiti 'omo h'unasi ci tensi mo i'mi ta pepe ho ohpueho. isi pʉta 'o meoino tonʉ; mo psoetiskou ta ceoa 'o tiskovasi.

² mo tmunoi ho moozoyʉ:

³ maica 'e mauhpʉhpʉngʉ mo acʉhʉ mimo to sume ci emi no mseezo ta mamespingi, 'o mahohonte ta ceoa mosola acʉha yu'tupeu ta mamespingi, 'o momhino ta ceoa mo acʉhʉ i'mi to momseezosi ho yuyupasʉ.>

⁴ mi'o i'vaho tmalʉ to fihngau cimo i'mi ta pepe, yainca: yuyafocu. mao'o'oko'u! i'mi to hosa to ic'o ho yuyafo! hoci o'te maica. temu tma'upu to kuisihe, a'upu tiou to meakvo'ʉsi!

⁵ maica micu peihcʉ'ho ne pepe 'o kuisisi, isi talʉa to hamo 'olasi hia popeiskuzkuzo.

⁶ ohsi ti'vo'vona ta mamespingi na muu, tasi ti'vo'vona 'e mamespingi. maino hioasi ho topuhngi patvovei, ohsi yainenu na hiasi mooyai no emi ho faeni muu, tasi sopuhngi na tesi hia sume ho posngʉcngʉci 'o sooetohvʉsi!

⁷ mosola mainenu na hiasi au'hi'hisi ho epaata'zeni 'o iachi, tena yaica nate hia tikuzkuzoa, ho poa tmacʉcʉhʉ no 'atutumzo. maica mo o'te tosvo mi'usnu ta iachi ho yainca: mi'o yusuhngu ta suoca'ha ci vcongʉ to honte, o'ami'os'a tuvcongʉ, o'ate'os'a ahtu ma'nanac'o!

⁸ 'amoeno i'mi homo maica, tac'o conohie, te cmʉ'hi ta feangosi 'e meakvo'ʉ: panto seova, nac'o, mcoi! te yonto taico to puzu ho noa hmoi, maica i'ote yʉsvʉtʉ ci nooe'oca hamo mo soyaa tonʉa!

⁹ ne ihe aiti to mosola yu'tupeu to mamespingi ci mahohonte 'o feufeu no hmoi 'o feangosi mo acʉhʉ tmuezonʉ mongsi.

¹⁰ ihe kuzoa aiti ho isi tikuzkuzoa 'o mamespingi, mo i'mocvihi ho yac'ʉ, yainca:

¹¹ 'o momhino ci cou ta ceoa mo maezo tmuezonʉ mongsi ho tngisi 'e mamespingi, maica uk'a naci tenala i'vaho mhino to macucumahe.

¹² uk'anaci te mhino ta king, nging, hooseki ho sinzu; maezo uk'ana cite mhino to yʉteʉ no ngei, yʉteʉ no kinu, ho i'o pepe cimo fʉhngoya ho tatposa no enghova ci yʉteʉ, mav'ov'o ci evi no namusngau ho i'o isi teyai to hisi to zoo ci macucuma, pepe ci isi teyai to evi ci macucuma, macucuma no too, macucuma no meemeno, ho i'ola teyai to kaceo ci macucuma;

¹³ maezo uk'anaci te mhia ni'ki, musngu, konamusngau, niukoo, emi, hʉsʉ, tungva, heome, 'uachumu, moatʉ'nʉ, 'uma, kuyai, tolei, ho i'o cou.

¹⁴ ihe mi'usni tola 'amamhimhino 'e mamespingi ho yainca: <'e ohsula konkonvosa ho ʉmnʉa ci macucuma cu acʉha o'tena aiti; acʉhʉcu aapayo'ʉ 'o niala taotofsi'iasu, 'anate ahtan'a eyoveiya!>

¹⁵ 'emoso yonta hosa ho 'amamhimhino hocu yuyupasʉ ci coumomhino, i'mi no kuzoa aiti ho isi tikuzkuzoa 'o mamespingi, mo bimcovhi. mo nac'o ho tmuezonʉ mongsi,

¹⁶ yainca:

¹⁷ o'amocu mo mako cono ma'hiezuhu 'o huomza hie, 'emo maica ci yuyupasʉ cu acʉhʉ aapayo'ʉ!> 'o afu'u taayaezoi to 'apangʉ, covnʉ ci cou, lepoʉt'ʉcʉ 'apangʉ, ho i'ola afu'u noe'ocʉ ta etʉpʉ ho eansonsou ci cou mo acʉhʉ bimcovhi.

¹⁸ ihe aiti 'o feufeu no hmoi 'o mamespingi, cu moozoyʉ:

¹⁹ mo mayo to fuu ho iachia tomfui 'e fnguuhe, mongsi ho mainca:

²⁰ kaebeni! ma kokaekaebʉ! maica ho micu meaapayo'ʉ! 'e mao'o'oko to hamo, sitoo, mayoyongensa, te kokaekaebʉ! maica ho isicu eveineni to hamo na muu, isicu patvovei 'o mamespingi!

²¹ acnguhu, panto cihi cimo yutataso ci tensi isi eepza 'omo mais'a meoino huahua ci fatu, to'seni ta etʉpʉ, yainca: <'e meoino hosa ta papilong te maezo mais'a 'e fatu ho paemacongveni, 'auesiesi 'anate ahtan'a huvahi.

²² 'anateko ahtan'a i'vaha talʉi 'o fihngau tola etngootngo ho i'ola meela'pa. mav'ov'o cila tiomemealʉa to macucuma 'anate ahtan'a elʉa; 'o mʉmʉ no huahua 'anate ahtan'a tavahi.

²³ 'anate i'vaho tiskova 'o lampu; 'ola eoc'ou ci mon'a faeva navconga 'anate ahtan'a talʉi. 'o momhinosu mo atva'esi yaa tonʉ ci cou ta hpʉhpʉngʉ; 'e yatatiskova isicu acʉha pa'hi'povi ta peiseoyoifosu.>

²⁴ cu tiou no patvovei 'o papilong, maica ho isi ho'honga ta hosa tan'e 'o hmuyu to nia eyongensa ho ito 'o'oko to hamo; 'aeno. 'o hmuyu to ohola afu'a opcoza ta ceoa ci cou isi acʉha ho'honga ta hosa tan'e.