mokusi 17 - buacou seiso no faeva esvʉtʉ

somseezo ci mamespingi

¹ to 'ayumona tomo mʉpʉtʉ tomo pitu ci takubingi cimo pitu ci tensi, panto cihi cimo ohcum'u a'o ho mainca:

² 'o mahohonte ta ceoa mosola acʉhʉ yu'tupeu ta somseezo ci mamespingi; 'e yatatiskova mosola maezo soemoyomo ta emi nosi smoc'ou.>

³ mi'o noa tʉʉt'ʉca to seilei; isi hafa to tensi a'o ho uhto maepuepuhu. os'o aiti 'omo cihi ci mamespingi mo smopayo to fʉhngoya ci yuansou; 'o feango to yuansou isi tangaboi tomo boevovoyo ci ma'o'ongko, mo cmʉfeʉ 'o pitu ci fnguu ho maskʉ ci sungu.

⁴ 'o mamespingi mo sʉ'eʉsʉ tomo fʉhngoya ho tatposa no enghova ci yʉsʉ, maasku to king, hooseki, ho ito sinzu. mo mʉpʉtʉ to king ci sooetohva, 'o sooetohvasi isi songcʉngci to isi nokʉ'a ci ca'i no smoc'ou.

⁵ 'o sapcisi isi tposi to isi efʉefʉnga ci ongko:

⁶ os'o yaeza aiti 'o mamespingi mo soemoyomo to hmuyu to 'o'oko to hamo, ho ito hmuyu to moso 'akasi to iesu ho mcoi ci cou. ne os'o aiti 'e mamespingi, a'ʉmtʉ meoino yamci.

⁷ isi tuocosi to tensi a'o:

⁸ i'o osko aiti ci yuansou mosola i'nanʉskʉ yaansoua, 'anate i'vaho yaansoua maitan'e, o'ate noana'o tena i'mi ne mʉ'eona ho yuyafo, emo'usnu to aapayo'ʉ. 'e cou ta ceoa, ahoi ne ohon'a teyai 'e hpʉhpʉngʉ 'o isi afu'a o'te tposi to tposʉ no nsou 'o ongkohe, ho tahe aiti 'e mosola yaansou, o'anamo yaansou maitan'e, i'o tenala i'vaho yuyafo ho noana'o ci yuansou, te acʉhʉ meoino no yamci.

⁹

¹⁰ 'omo eimo to 'ayumonahe micu oefʉ'ʉ, mion'a yayo 'omo cihi; o'amocumo cmʉ'ho 'o mon'a cihi, ho tena cmʉ'ho tec'o to'sikameosʉ.

¹¹ i'omosola yaansoua, o'anamo i'vaho yaansou maitan'e ci yuansou, 'aeno 'omo tovoyu ci honte; zou cihi tomo pitu ci honte, mon'a seolʉa no emo'usnu to aapayo'ʉ.

¹² <'o osko aiti ci mo maskʉ ci sungu isi pas'usna to o'amocu mo ahoi aʉt'ʉcʉ ci honte; at'inghi tena tiou no tonʉ no honte, te toehungu 'o yuansou ho cono huomza hie ho aʉt'ʉcʉ.

¹³ 'emo maskʉ ci honte mo yaa hmʉskʉ ci tehe mituhci: tehe faeni to yuansou 'o iachihe tonʉ.

¹⁴ tehe mi'usni 'o okomoatʉ'nʉ ho ehtothomʉ; at'inghi tesi atpʉta to okomoatʉ'nʉ, maica 'aeno'so nooe'oca ta manonooe'oca, honte ta mahohonte. 'o isi epeiya, ho meot'ʉcʉ mee'ofeihni ci cou te maezo atpʉtʉ.>

¹⁵ isi ivaha mi'usni to tensi a'o ho yainca: <'e osko aiti ci isi yusunghngi to somseezo ci mamespingi cimo moh'usnu maica ci chumu, 'aisieno pas'usna to masusuezopʉ, mav'ov'o ci cou, mauhpʉhpʉngʉ, ho i'ola bua mav'ov'o no e'e ci cou.

¹⁶ 'e osko aiti cimo maskʉ ci sungu ho i'o yuansou te acʉhʉ himsʉ'no to mseezo ci mamespingi, tehe ti'einga 'o acʉcʉhʉsi ho poa yuamaesih'i; tehe ana 'o fou ta feangosi, boemi to puzu ho hmoi.

¹⁷ maica 'o isi akoeva no hioa to hamo isi siya ta 'tohʉngʉ tamo maskʉ ci honte, poa yaa totiski ci tehe mituhci, faeni ta yuansou na tonʉ no aʉt'ʉcʉ, ac'ʉhʉ ho tac'u peiseafi na e'e to hamo.

¹⁸ <'e osko aiti ci mamespingi 'aeno 'emo aʉt'ʉcʉ ta mahohonte ta ceoa ci meoino hosa.>