mokusi 16 - buacou seiso no faeva esvʉtʉ

takubingi no sʉ'no to hamo

¹ os'o talʉi 'omo i'mi to seiten cimo tmunoi ci fihngau mo mi'usnu tomo pitu ci tensi ho yainca:

² cu e'ohʉ 'omo tocni to tensi, hoyuha ta ceoa 'o isi pʉta ci takubingi; micu yaa nakuzo ho mahiz'o ci h'oh'o mo cmʉfeʉ to feango to isi topci to huomza no yuansou ho ito mosola m'ohkuyu to uacoua no yuansou ci cou.

³ 'omo tocngihi ci tensi isi hoyuha ta etʉpʉ 'o takubingisi; 'o chumu to etʉpʉ micu mais'a hmuyu nomo mcoi ci cou. cu tʉcʉcʉhʉ 'o yuansou ta etʉpʉ.

⁴ 'omo totuyu ci tensi isi hoyuha to va'hʉ ho ito toeku to chumu 'o takubingisi, cu acʉhʉ tmuezuhu ho hmuyu 'o chumu.

⁵ os'o talʉi 'ola aʉt'ʉcʉ to chumu ci tensi isi yainca:

⁶ ohela poa mohtoesuyua 'o hmuyu to mayoyongensa ho 'o'oko to hamo, maitan'e teko fii ta hmuyu ho poa imneni; na eni 'ateheeno anana'va elʉa!>

⁷ os'o i'vaha talʉi 'omo i'mi to 'oyona sʉ'tʉ ci fihngau isi yainca:

⁸ 'omo tosʉptʉ ci tensi isi hoyuha to hie 'o takubingisi, poa meelʉ boemi to cuveusi ho hoteʉteʉsʉ 'e cou.

⁹ 'o isi poa hoteʉteʉsʉa ci cou, cu boevovoyo tomo tʉʉt'ʉcʉ ta meakvo'ʉ ci hamo. mioc'o a'cʉ'cʉnʉ o'te ma'vovei, o'te mimho tohmomoengʉ to taunona'vʉ to hamo.

¹⁰ 'o toeimo ci tensi isi hoyuha to suoca'ha to honte to yuansou 'o takubingisi. isicu feʉ'sa to voecʉvcʉ 'o mauhpʉhpʉngʉ to yuansou, maica homo angu 'atutumzo 'e cou ihecu iachia yo'eoca 'o umohe.

¹¹ i'mi homo 'atutumzo ho cmʉfeʉ to feango 'o h'oh'o. cu boevovoyo to hamo ne pepe, o'amoc'o h'unano mongoi to kokuzo ci lahe peipeis'ausna.

¹² 'omo tonomʉ ci tensi isi hoyuha to c'oeha ne yofalati 'o takubingisi, micu ekeololvi 'o c'oeha, te akoeva no ayocneni no ceonʉ 'ote i'mi ne esmomhana ci mahohonte.

¹³ acnguhu, os'o aiti 'omo tuyu ci h'aokuv'o, mo mais'a fo'kunge, apaevai i'mi to ngayo to long, ngayo to yuansou, ngayo to meyoyongensa ho yuyafo.

¹⁴ zou piepiya to 'akuma eni, la meelʉ peispopo'e. 'e h'aokuv'o eni mo yuyafo ho biebimi to honte ta mauhpʉhpʉngʉ, isi eteuyuna, bikoyu no yonto taunona'vʉ ci hie to hamo ho ehtothomʉ.

¹⁵

¹⁶ 'o h'aokuv'o cu eteuyuna to conci hpʉhpʉngʉ 'o mahohonte; 'o hpʉhpʉngʉ ic'o lahe yainca to e'e no hevulu hamicitotun.

¹⁷ 'omo topitu ci tensi isi hoyuha ta engʉca 'o takubingisi. panto mo i'mi to seiten cimo meoino fihngau, yainca:

¹⁸ micu yaa moi'hocʉ, yamumi, ak'engʉca, ho ko'sosmoyoa ci motoevi, ahoi ho mohcula yaa yatatiskova, uk'amocu ci mosola maica ci hia tmanoi ci motoevi.

¹⁹ 'o meoino hosa ci papilong mo meiteu meipci; 'o mahohosa ta mauhpʉhpʉngʉ cu acʉhʉ toczoyʉ. isi talʉa to hamo 'o kokuzo ta meoino papilong, poa imneni 'o emi no 'osʉ'noasi.

²⁰ acʉha huapayo'i 'o moso payo ta etʉpʉ ci ceoa; 'o mahcuhcuyu mo maezo acʉhʉ aapayo'ʉ.

²¹ panto kaceo cimo i'mi ne pepe ho mtokʉ ta feango ta cou, 'emo macoconi ci kaceo mo asonʉ msʉptʉhʉ no kinkina 'o hiasi ecvʉhʉ. nomio tamo maica ci hia meoino smukaceo, micu boevovoyo to hamo 'e cou.