mokusi 15 - buacou seiso no faeva esvʉtʉ

tensi ho i'o atavei ci meakvo'ʉ

¹ os'o i'vaha aiti ta pepe 'omo h'unasi ci a'a'ausna, meoisi ho taunona'vʉ. panto pitu ci tensi ihe tiʉt'ʉca 'o atavei cimo pitu ci meakvo'ʉ, maica 'o hamo tesi ieni ta meakvo'ʉ tan'e ho peispaezumi 'o sʉ'nosi.

² os'o i'vaha aiti 'o mais'a ngalasu ci etʉpʉ, mo atvohʉ to puzu. os'o yaeza aiti 'omo piyo ci cou; micu atpʉtʉ to yuansou, ho ito uacoua no yuansou, ho i'o isic'o tamza no tasvʉta 'o ongkohe ci cou. mo acʉhʉ yac'ʉ to aaskiti tomo ngalasu ci etʉpʉ, mʉpʉtʉ to isi faeni to hamo ci tngootngo,

³ pasunaenva 'o pasunaeno to soskuskunu to hamo ci moose ho ito okomoatʉ'nʉ: nooe'oca - soyaatonʉa ci hamo, 'o lako hi'hioa a'ʉmtas'a taunona'vʉ! na honte ta mauhpʉhpʉngʉ 'e ceonʉsu a'ʉmtʉs'a ahmʉskʉ ho mou'ʉmtʉ!

⁴ nooe'oca. siya nate smeecʉ'ho o'te einu suu? siya na o'ate tohmomoengʉ no ongkosu? zouc'o suu na socofkoya. te acʉhʉ uso 'e mauhpʉhpʉngʉ, yonta tuhcusu ho m'ohkuyu. maica na moulʉlʉ ci lako hi'hioa isicu hupopayoi.

⁵ ataveisi tan'e, os'o aiti 'o seiten ta pepe micu maavo, to 'ayumonasi mo yaa isi cmʉ'hi to hamo ci socofkoya toohesa.

⁶ i'omo tʉʉt'ʉcʉ to pitu ci meakvo'ʉ ci mo pitu ci tensi mo i'mi to seiten ho yuyafo, maceofʉ tomo tofsi'i ci yʉsʉ no ngei, smoeputu to king 'o t'oengahe.

⁷ 'omo coni tomo sʉptʉ ci yuansou, isi faeni tomo pitu ci tensi 'o isi songcʉngci to sʉ'no to hamo ci pitu cimo king ci takubingi.

⁸ 'o seiten isi meingcʉngci to feufeu cimo i'mi to psoevohngʉ ho sotonʉa ci hamo, to auyusi ho o'amocu isi aepʉnga hoyuha to pitu ci tensi 'omo pitu ci meakvo'ʉ, uk'a cite meelʉ yʉmeʉmʉ to seiten ci cou.