mokusi 12 - buacou seiso no faeva esvʉtʉ

mamespingi ho long

¹ tuhcusi tan'e, mo yuyafo ta pepe 'omo meoisi ho taunona'vʉ ci hu'a'ausna. panto cihi ci mamespingi isi efeʉ'seni 'o hie, m'ecihi to feohʉ, 'o fnguusi mo iceopngu to tafange cimo yaa maskʉueso ci congeoha.

² tesicu mon'ia peyafa 'o ngho'ʉsi, mo aʉlʉ moozoyʉ to 'ocongoasi hote yayo.

³ mo i'vaho yuyafo ta pepe 'omo h'unasi ci hu'a'ausna. panto coni cimo fʉhngoya ci meoino no long, mo pitu 'o fnguusi, maskʉ 'o sungu, 'o macoconci fnguu mo acʉhʉ iceopngu to tafange.

⁴ isi yomza to civcisi ho taipepza 'omo ateua coni ci congeoha ta pepe, isicu to'seni ta ceoa. mo yac'ʉ to tuhcu to tec'u yaa oko ci mamespingi, totea hocic'u yayo 'o oko tasi pnʉska.

⁵ 'o isi peyafa to mamespingi zou oko no hahocngʉ; 'e okoeni tasila yomza to s'ofʉ no meemeno ho aʉt'ʉca 'e mauhpʉhpʉngʉ. at'inghi, 'e oko eni isi e'usna to suoca'ha to hamo.

⁶ mo peʉn'ʉ 'o mamespingi, uhto isi ayocneni to hamo ci hpʉhpʉngʉ; yone'e, te posifou se'icha monmʉhʉ no hie hote noa aʉt'ʉca.

⁷ ataveisi, mo yaa ehtothomʉ 'e pepe. i'o micialo ho i'o tensisi mo mi'usnu to long ho ito soskuskunusi ho ehtothomʉ, 'o long ho i'o 'oahngʉsi mo maezo yʉc'ʉ ho poengomʉ.

⁸ at'inghi, isicu atpʉta 'o long; 'e long ho i'o soskuskunusi 'anate meelʉ yone pepe.

⁹ 'o meoino long isicu topeohneni; 'aeno 'o ohola yainca fkoi noana'o, 'o ongkosi zou 'akuma hocieno satan, la maspepecvai ta yatatiskova. mo noa topeohneni ta ceoa; isi yaeza topehneni 'o soskuskunusi.

¹⁰ mi'o i'vaho tmalʉ to meoino no fihngau ta pepe mo mainca:

¹¹ 'o masisinto isicu ieni to hmuyu to okomoatʉ'nʉ ho ito ihe epeaska ci so'emio ho atpʉtʉ to long; ac'ʉhʉ no kaebʉ hoci ciha 'o iachihe nsou.

¹² ko'koeno, 'e maepepe ho i'emo yonta 'ayumonasi, ntemu acʉhʉ kokaekaebʉ! at'inghi, 'e ceoa ho etʉpʉ te tomsikaesi! 'o 'akuma micu ma'sʉsʉ'no ho uhto imu yoni, maica ho isi iachia cohivi ho o'anate noana'o na tesi mia ci hie.>

¹³ ne isicu cohivi to long ho isi topehneni ta ceoa, isicu peteonana'va 'omo peyafo to oko no hahocngʉ ci mamespingi.

¹⁴ 'o mamespingi mo elʉ to yuso ci yopngu no eiski, meelʉ mei'usnu to maepuepuhu, uhto iachisi hpʉhpʉngʉ. yonto ic'o te totueha ho ang'osʉ hote noa aʉt'ʉca, poa o'te noa 'a'usneni to fkoi.

¹⁵ mo nof'uhu to mamespingi 'o fkoi ic'o, i'mi to ngayosi ho mufunu to fozu ci chumu, 'ucia pangohca 'o mamespingi.

¹⁶ at'inghi, isi to'usni ta ceoa 'o mamespingi ic'o, mingayo ho eha'va 'o isi funeni to long ci chumu.

¹⁷ 'o long mo sʉ'no to mamespingi, mi'usni 'o mocmo ci mʉntʉ'casi ho ehtothomʉ, 'aeno mi'usnu tomo afu'u meo'uzo to mashʉyʉ to hamo, noyʉcʉ to isi paavi to iesu ci so'emio ci cou ho ehtothomʉ.

¹⁸ 'o long ic'o mo yac'ʉ to aaskiti to etʉpʉ.