mokusi 11 - buacou seiso no faeva esvʉtʉ

yoso cimo 'akasi

¹ mi'o tiou tomo mais'a s'ofʉ ci svʉta, panto fihngau cimo mi'usnu a'o ho mainca:

² at'inghi, teav'a svʉti 'o coca to seiten, maica 'o coca isicu faeni to couyafana; te msʉptʉhʉ ueso no feohʉ ho tehe psaiei'zi 'e cofkoya ci hosa.

³ te'o popeoskuna 'o yoso cimo sʉ'eʉsʉ to yʉsʉno ngei cimo 'akasi ci cou; te posifou se'icha monmʉhʉ ci hie hote psoyaski to e'e to hamo.>

⁴ 'o yoso cimo 'akasi 'ai'omoeno yac'ʉ to tuhcu to nooe'oca ta hpʉhpʉngʉ cimo mehaeso ci evi no 'olivu ho i'o yuso ci totnguca lampu.

⁵ hoci panonte mici akuzkuzo tamo yoso ci cou, la boemi tomo yuyafo to ngayohe ci puzu, poa homcoi 'o hangʉ. ko'koeno, siya nate mici akuzkuzo muu, siya nate opcoza.

⁶ mo yaa tonʉ no samʉta 'e engʉca, to hiesi ho tehe psoyaska 'o e'e to hamo, tehe poa o'te mʉchʉ 'e pepe. mo maezo yaa tonʉ no tʉʉt'ʉca 'o isi maii'toekui to chumu, poa tmuhmuyu 'o chumu, maezo yaa tonʉ no maino 'tohʉngʉhe ho boemi no mav'ov'o ci meakvo'ʉ ho 'a'usni 'e ceoa.

⁷ ataveisi ho tahecu psoevaha 'e e'e, i'omo i'mi ne uk'a puesona ci mʉ'eona ho yuyafo ci yuansou, te mi'usnu ho ehtothomʉ, ihe atpʉta hocu opcoza.

⁸ 'o nia feangohe te hoyuha to papae'ohsa ta hosa, 'ai'o ohoeno svopci to zuuzika to nooe'oca. na epo'usa no ongko ta hosa tan'e zou sotoma hocieno 'ezivuto.

⁹ i'mi ta masusuezopʉ, mayoyou, maee'e ho mauhpʉhpʉngʉ, panto te cmʉ'ho ci cou. miteuhi ang'osʉ ho tehe aiti 'e nia feangohe, o'aihe teomneni hoci 'ucia soʉlʉlʉa.

¹⁰ 'e cou ta ceoa te nomio ho micu mcoi 'emo yoso ho kokaekaebʉ. toehunga peeseni ho yupa tmoengonghi to macucuma, maica 'emo yoso ci eyongensa ohela poa meoino 'atutumzo 'e cou ta ceoa.

¹¹ sucaefi 'e miteuhi ang'osʉ, panto peucu no nsou cimo i'mi to hamo, yʉmeʉmʉ ta 'ayumonahe, micu yac'ʉ; i'omo baito ci cou mo a'ʉmtʉ meoino yamci.

¹² 'emo yoso ci eyongensa ihe talʉi 'omo i'mine pepe ci meoino fihngau, isi mi'usni ho yainca: micu yonto ihe huceoevi to hangʉ ho poʉt'ʉcʉ to cmʉcmʉ ho ohpepe.

¹³ tuhcusi ne mio, mo meoino tmaot'ou 'e ceoa, 'o hosa ic'o mo amaska coni 'omo oefʉ'ʉ, i'mi no motoevi mo posipoptuhu 'omo mcoi ci cou. 'omo tungaco ci cou mo kuici smoyo, acʉhʉ tohmomoengʉ to hiasi taunona'vʉ to hamo ne pepe.

¹⁴ cu sucaefi 'emo yuso ci meakvo'ʉ, cu esmi 'emo tuyu ci meakvo'ʉ!

topitu ci la'pa

¹⁵ mo meepeucu to la'pa 'o topitu ci tensi, cu yaa meoino fihngau ne pepe ho yainca: <'o tonʉ no aʉt'ʉcʉ ta mouhpʉhpʉngʉ micu no'usnu to nooe'ocato ho ito isi p'eyac'a ci kilisto; tesi tʉʉt'ʉca na tonʉ, ac'ʉhʉ no 'auesiesi!>

¹⁶ i'omo yonto tuhcu to hamo, ho yusuhngu to iachihe ca'hʉ cimo mpusku uspotʉ ci coolo mo acʉhʉ m'ocnguyu to ceoa, m'ohkuyu to hamo,

¹⁷ mainca: ahoi ne noana'o, ac'ʉhʉ maita'e ho yayo ci nooe'oca - soyaa tonʉa ci hamo, temia to'aveoveoyʉ suu; maica osko titheni no meoino tonʉ, hioa na aʉt'ʉcʉ.

¹⁸ mo yuububciki 'e mauhpʉhpʉngʉ, at'inghi, micu cmʉ'ho 'o sʉ'nosu. micu mic'ʉhi 'e hiesi, te tiou no yʉsvʉtʉ na micu mcoi ci cou; 'o soskuskunusu - maeyoeyongensa, 'o 'o'okosu ho i'omo afu'u einu suu ci cou, 'upena na isi einva ho o'te einva, te acʉhʉ mayo no hnoo. i'o mosola aapayo'ʉ ta ceoa ci cou te acʉha aapayo'a!

¹⁹ ta maitan'e, 'omo yone pepe ci seiten to hamo cu maavo; 'o tvoisia esvʉta isicu teolʉi to seiten. acnguhu panto moi'hocʉ, ak'engʉca, mʉmʉ, motoevi, ho meoino smukaceo.