mokusi 10 - buacou seiso no faeva esvʉtʉ

tensi ho i'o oko no tposʉ

¹ os'o i'vaha aiti 'o sotasoa ci tensi mo i'mi ne pepe ho ohpueho. mo efeʉ'sʉ to cmʉcmʉ, paiftonga 'o hioyu; mais'a hie 'o sapcisi, mais'a yapuzi ci sʉesʉ 'o t'angosi.

² 'o emucusi mo mʉpʉtʉ to isi eocoi ci oko no tposʉ. 'o vhona to t'angosi mo m'ecihi to etʉpʉ, 'o veinasi mo m'ecihi ta ceoa.

³ mo tmunoi moozoyʉ, mais'a muhiei ci sisi; nemo moozoyʉ mo pitu ci ak'engʉca 'omo psoevovei.

⁴ nte'on'a tposi 'o isi engha to pitu ci ak'engʉca, panto mo i'mi ne pepe ci fihngau, yaica: <'o e'e to pitu ci ak'engʉca, teko ayʉyʉca, teav'a tposi!>

⁵ ataveisi ta hi'hioa tan'e, i'o o'u teolʉi cimo m'eavai ta etʉpʉ ho ceoa ci tensi mo mi'usnu ta pepe ho hoepzeni 'o vhona to emucusi,

⁶ mas'usnu to moso mooyai ta pepe, ceoa, etʉpʉ, ho ita aʉcʉcʉhʉ ci 'auesiesi yaansou ci hamo ho esvʉtʉ:

⁷ hote meela'pa 'o touptu ci tensi, tesicu hioa to hamo 'o ohsila mi'usneni to iachisi soskuskunu - 'aeno 'o ohecula epeaska to eyongensa ci moumsʉ'eonʉ.>

⁸ atavei, os'o talʉi 'omoso auyu i'mi ne pepe ci fihngau mo i'vaho mi'usnu a'o ho mainca:

⁹ os'o usa, p'enza to tensi 'o oko no tposʉ. isi mi'usni a'o ho yainca:

¹⁰ os'o tiova to emucusi 'o oko no tposʉ, cu ana, a'ʉmtʉ mais'a sʉhsi 'o hiasi cohʉmʉ homo yonta ngayo, at'inghi ne os'ocu yʉmca, a'ʉmta ta'hongi ta cfu'o 'o hiasi mayʉmʉ.

¹¹ isi i'vaha mi'usni to tensi a'o ho yainca: <'e ohsila eyoca to hamo ci e'e. teko asansana i'vaha i'nʉska psoevaha to masusuezopʉ, mauhpʉhpʉngʉ, mav'ov'o no e'e ci cou ho ito mahohonte.>