mokusi 1 - buacou seiso no faeva esvʉtʉ

¹ 'e tposʉ eni isi tposi 'o isi paavi to iesu kilisto. 'o hamo ho isi faeni to iesu kilisto 'e isi paavneni, tesi poa eʉsvʉtneni to masososkuskunusi 'o tec'u yuyafo ci hi'hioa tamo nanʉhtʉ ci hie. isi popeoskuna to kilisto 'o tensi ho mi'usni 'o soskuskunusi ci yohane ho pa'teni 'e hi'hioa eni,

² isicu eʉsvʉta tamo botngonʉ to yohane 'e isi afu'a aiti, 'akasineni 'o e'e to hamo ho i'o isi paavneni to iesu kilisto ci so'emio.

³ a'ʉmtʉs'a ʉm'ʉmnʉ 'emo mo'engho ta tposʉ tan'e! 'emo tmalʉ ta isi eyoca ho noyʉyʉcʉ ta isi tposi ci cou a'ʉmtʉs'a ʉm'ʉmnʉ! maica ho tec'u mon'i esmi 'e hiesi ta a'a'ausna tan'e.

mi'usnu to pitu ci kiokai ho tuayokeo

^4-5 na a'o - yohane, te'o pa'i'usni ta tengami ho faeni tamo pitu ci kiokai ta 'aziasoo: i'o mo ahoi ne noana'o, maitan'e, ac'ʉhʉ ho 'auesiesi yayo ci hamo, ho i'omo pitu ci piepiya to tuhcu to suoca'hasi, ho i'o mo meot'ʉt'ʉcʉ cila 'akasi, ahoi i'mi to mcoi ho smoevovei ho atʉkcʉ ta mahohonte ta ceoa ci iesu kilisto, tesi'so pafi no mengumi ho soanono na muu! isi ngohia a'to. nomio a'to ho yuhmuyu. i'mi to kuisi ho poesih'a a'to.

⁶ isi poa saisi ta hpʉhpʉngʉsi a'to, ho fifiho to amohamo. no'usnu'sio to iesu kilisto na psoevohngʉ ho tonʉ, ac'ʉhʉ no 'auesiesi! 'aamen.

⁷ aiti, mo poʉt'ʉcʉ ta cmʉcmʉ hocu cmʉ'ho! te acʉhʉ baito 'e macicihi ci cou, ac'ʉhʉ to moso smuyu'cu ci cou ho baito. ho tena cmʉ'ho, tehe toehunga tngisi ta yatatiskova ta ceoa. 'ate ahtuo'te esmi 'e hi'hioa eni! 'aamen.

⁸ to mo ahoi ne noana'o, maitan'e, ac'ʉhʉ ho noana'o ho yayo ci nooe'oca - noyaemʉhʉ tonʉ ci hamo isi yainca:

aopa'to to yohane 'o kilisto

⁹ zou yohane a'o - ohaesamu. mi'o i'upu to iesu ho e'to'usni na ngoseomu, toehungu buveici, te maezo tma'upu no hpʉhpʉngʉsi. nomio no psoyaska na e'e to hamo ho i'o isi paavi to iesu ci so'emio, ohela poekotva to isi yainca paamo ci hpʉhpʉngʉ a'o.

¹⁰ moso conci hiesi to nooe'oca, isi poot'ova to seilei a'o, mi'o tmalʉ tomo tmunoi ci fihngau, mais'a fihngau nomo meela'pa, yonta f'uhu'u ho yainca:

¹¹

¹² mi'o miezuhu ho 'ucia aiti siya 'omo mi'usnu a'o ho aomotʉ'ʉ, os'o teolʉi 'omo pitu cimo king ci totnguca lampu.

¹³ to taico to totnguca lampu mo yac'ʉ 'omo cihi cimo mais'a 'o okocou, yac'ʉ to ic'o, sʉ'eʉsʉ to mo mehtʉc'ʉhʉ to t'ango ci yʉsʉno tacvoh'i, 'o t'oengasi mo smoeputu tomo king ci snoeputa.

¹⁴ mo mais'a yuho 'o f'ʉsʉsi, maezo mais'a 'ola fʉecʉ'za ci m'um'u no moatʉ'nʉ; 'o mcoosi mais'a yafeu ci puzu ho psoetiskou;

¹⁵ 'o t'angosi mais'a oho pailʉlʉi pahisi ci too ho cingkoya; 'o fihngausi mais'a mʉmʉ no meoino suyoi.

¹⁶ mo mʉpʉtʉ to pitu ci congeoha 'o vhona to emucusi, psoyafo to mo aavai feofeo ci poyave 'o ngayosi; 'o sapcisi aʉlʉ mais'a 'o hie no cohiona.

¹⁷ ne os'ocu aiti, cu e'puyu to tuhcu to t'angosi, mais'a 'o lac'u mcoi ci cou. isi hoe'oci to vhona to emucusi a'o, yainca: <'ote smoyo! zou ahoisi a'o, maezo ataveisi.

¹⁸ zou 'auesiesi yayo a'o! mo'ula mcoi, yaansou maitan'e, a'vinano te 'auesiesi yaansoua. os'o tʉʉt'ʉca 'e 'oyomiana maavo to mcoi ho vooecʉvcana.

¹⁹ 'e osko afu'a aiti, 'upena 'emo esmi maitan'e ho i'o tenala yuyafo ho noana'o, acʉha tposi.

²⁰ 'e osko afu'a aiti, 'emo yonta vhona ta emucu'u cimo pitu ci congeoha ho i'emo pitu ci totnguca lampu na isi epo'usa ci moumsʉ'eonʉ mo maica: 'e pitu ci congeoha zou tensi tamo pitu ci kiokai; pitu ci totnguca lampu zou 'o pitu ci kiokai.>