looma 9 - buacou seiso no faeva esvʉtʉ

hamo ho i'o isi epeiya ci 'o'okosi

¹ te'o mo'engho tamo mou'ʉmtʉ ci e'e; mi'o tma'usnu to kilisto, o'ami'o meknuyu. 'e ʉmnʉ ci 'tohʉngʉ'u mo yono isi psoetiskovi to seilei ho soomei ho o'a mi'o meknuyu:

² co ma'tipvongʉ'u mo a'sʉftonʉ ecvʉhʉ, mo ma'co'congo co 'tohʉngʉ'u!

³ nomio to 'oahngʉ'u, 'o cono feango'u, 'upena hoci noa patkuzoi to hamo na a'o, ho ahesa to kilisto, te'oc'o maezo mimho.

⁴ ohsi epeiya to hamo ci 'o'okosi; ohsi poa yaa ongko no 'o'oko to hamo, tma'upu no psoevohngʉsi. mosola yupa m'eyac'ʉ to esvʉtʉ 'o hamo, pafi to hoolicu; mo yaa mau'to'tohʉngʉ no m'ohkuyu to hamo, maezo tiou no ohsila teomneni.

⁵ zou mʉntʉ'ca to nia maameoi, hoci tamza no feangohe, mo cono suezopʉ 'o kilisto. i'omo tiʉt'ʉcʉ ta acʉcʉhʉ ci hamo 'auesiesia'sio tohmomoengeni, 'aamen!

⁶ o'aos'os'a yainca micu tma'vozvozo na ohsila teomneni to hamo. maica i'e cou'isolaelu o'aisis'a acava acʉha epeiya ci 'o'oko to hamo;

⁷ i'o mʉntʉ'ca to 'avulahamu o'as'a acau acʉhʉ a'ʉmtʉ 'o'okosi. ohsila mi'usni to hamo 'o 'avulahamu ho yainca:

⁸ 'aisieno yainca tan'e, 'emo i'mi ta feango ho yayo o'a te yainca zou 'o'oko to hamo, 'ai'omoc'o i'mi to ohsila teomneni to hamo ho yayo niante tamza no 'o'oko to hamo.

⁹ maica 'o ohsila teomneni to hamo isi yainca:

¹⁰ o'ate anou maica, 'omo yoso ci oko no hahocngʉ to lipaicia mo cono amo, 'ai'o isieno peyafa to maameoito ci 'isaku.

^11-12 at'inghi, tesi epa'teni ho isi a'ʉmta ieni no 'tohʉngʉsi ho epeiya 'omo cihi to oko, mo mi'usnu to lipaicia 'o hamo ho yainca: <'omo mameoi to oko te fifiho tomo okohe.> ne isi engha 'e e'e eni, o'amocu moso yayo 'emo yoso, uk'a mocu ci peis'ʉ'ʉmnʉ ho peiskuzkuzo; peelʉi aiti 'o hamo homo epei mio i'mi no iachisi 'tohʉngʉ, o'amo yupa natʉ'ca no peipeis'ausnahe.

¹³ aʉlʉ mais'a 'o isi yainca to seiso: <'o hia'u ngohia to yakovu, mo tosa'ohe to 'isau.>

¹⁴ homo maica, te'oeno peelʉi yainca o'amo ahmʉskʉ 'o hamo? o'ate peelʉi yainca.

¹⁵ maica ohsila mi'usni 'o moose ho yainca:

¹⁶ peelʉi aiti tan'e homo epei 'o hamo o'aisi ieni no 'tohʉngʉ ho ino asno'zonʉ ta cou, mo i'mi no himcocoveoisi.

¹⁷ to 'ayumona to seiso, isi mi'usni to hamo 'o faalau ho yainca:

¹⁸ ho isi e'usna yaica, 'o hamo siya na tesi coveoza 'aeno siya nate coveoza; siya na tesi poa yameomʉ 'aeno siya nate yameomʉ.>

sʉ'no ho ina himcocoveoi to hamo

¹⁹ nenusi no teko mi'usnu a'o ho yainca:

²⁰ at'inghi'sio nanghia, zou siya suu, ci smeecʉ'ho yut'ingi to hamo? 'e isic'o teyai ci yʉvnʉ tees'aeno meelʉ mi'usnu to moso mooyai ci cou ho yainca:

²¹ 'e lemooyai yʉvnʉ teeno ahtuo'te yaa tonʉ no mayo ta ceoa ho mayo no tesi 'ucia teyai; te meelʉ titho tamo totiski ci ceoa ho mooyai no te yuso ci macucuma, pepe 'emo coni, kuzohe 'emo coni.

²² ina lais hioa to hamo. 'amoeno maezo maica, lasi epa'teni na sʉ'nosi. pa'teni na tonʉsi. i'mi tan'e lasi boemi no buveici ho coveoza 'o isi sʉ'nova, 'ai'oeno 'ontesi anana'va ez'oz'a ci macucuma.

²³ tesi yaeza epa'teni a'to na atngaso ci psoevohngʉsi. 'aeno a'to na tesi mi'usni ho coveoza, a'vinano zou isi ayoca no poa tiou no psoevohngʉsi ci cou.

²⁴ maica na a'to o'a anouc'o isi i'mi ta 'ayumona ta couyutaya, yaeza i'mi ta couyafana ho eyoho'a.

²⁵ 'aeno eni 'o isi yainca to tposʉ to hosia: i'o o'a anana'o 'o'oko'u, te'ocu yainca <'o'oko'u>; i'o o'a os'o anana'va ngohia ci hpʉhpʉngʉ, te'o yainca <'e os'o ngohia>.

²⁶ moso yonenu ho o'ula mi'usni ho yainca: o'a 'o'oko'u na muu; tena maezo yono ic'o ho noa yainca zou: 'o'oko no 'auesiesi yayo ci hamo!

²⁷ e'usna to cou'isolaelu, ohsila zozoya to 'izaya:

²⁸ maica 'o nooe'oca tenasi aupupcieva a'sʉftona yʉsvʉta 'e yatatiskova.>

²⁹ aʉlʉ mais'a 'o nia e'e to 'izaya ne noana'o: <'o nooe'oca - ateuyunu papoevʉ no heetai, hocisi o'te peteongacveni no nteto mʉntʉ'ca. ntetocu noana'o mais'a 'o sotoma, ho 'omola.>

fukuin ho i'e cou'isolaelu

³⁰ matemzacu av'a? i'o o'amo anana'o biebimi no moulʉlʉ to hamo ci couyafana, mo apuyu i'mi no tmaa'uzo ho meelʉ coumoʉlʉlʉ;

³¹ i'o mo biebimi ho ieni to hoolicu ho meelʉ coumoʉlʉlʉ ci oho epeiya ci cou, apuyu o'te ehcʉ'ho no isi mituhci.

³² mo mainci maica? maica ho o'amo noe'ocʉ no tmaa'uzo, moc'o noe'ocʉ no peipeis'ausna, atavei smopcuku ho su'to .

³³ mais'a 'o isi yainca to seiso: aiti! te'o sii tate ekosi ci fatu 'e sii'an, 'aeno tehela ekosi ci fatu! at'inghi, inala tmanoe'ocʉ ci cou o'ate ma'papayo'ʉ.