looma 7 - buacou seiso no faeva esvʉtʉ

ieni to natʉ'ca no navconga ho epo'usa

¹ maanat'ohaesa, lamu acʉhʉ bocbochio to hoolicu ci cou, ko'koeno 'atemu ahtao'te ta'hongi 'e te'o hia eʉsvʉsvʉtʉ: ina lasi hia atʉkcʉ ta cou to hoolicu 'aihomon'a yaansoua 'e cou nate yaa a'a'ausnai.

² mais'a hocieno yainca, 'e mohcu mevcongʉ ci mo cihi ci mamespingi, hocin'a afu'u yayo 'e vcongʉsi, te noskufu no isi esvʉta to hoolicu; hoci mcoi 'e vcongʉsi, 'e mamespingi 'anatesi ivaha skosvʉta tamo maica ci hoolicu.

³ ko'koeno, homon'a yayo 'o vcongʉ, hoci moh'upu no mocmo ci hahocngʉ te ta'upa no smoc'ou ci mamespingi; hocic'u mcoi 'o vcongʉsi, hoci ieni to hoolicu 'e mamespingi isicu tamza no ziu ci cou, hoci mevaho mevcongʉ no mocmo ci hahocngʉ, o'anate ta'upa no mseezo.

⁴ maanat'ohaesa, 'e a'a'ausnamu 'amoeno totiski tan'e. hoci emza to hoolicu, mimucu mcoi, maica ho zou 'oahngʉ to feango to kilisto na muu; maiten'e mimucu tma'usnu to moso i'mi to mcoi ho smoevovei ci nooe'oca, poacu meelʉ bumemealʉ nomio to hamo ho yaahioa.

⁵ ne mohton'a maito yu'ausna ta cou ho yaansoua, 'o hoolicu to moose isi poot'ova na ma'cac'ou ci kuisito, smoevaho ta 'ayumona ta feangoto, na ataveisi 'aeno mcoi.

⁶ at'inghi, maitan'e. 'anatesi atʉkca to hoolicu a'to; maica hoci ieni to lasi atʉkca to hoolicu ho engha, mitocu mcoi. 'anateto i'vaha ieni to noana'o ci tposʉ to hoolicu, matetocu fiho to faeva ci ma'cohio to seilei ho fifiho to hamo.

hoolicu ho i'o kuisi

⁷ homo maica, tetoeno peelʉi yainca mo yaa kuisi 'o hoolicu? o'ate ahtu maica! at'inghi, ieni to hoolicu, os'ocu cohivi cuma na kuisi. hocisi o'te yainca to hoolicu <'otela ma'konvosʉ>, o'ate'o cohivi cuma na ma'konvosʉ.

⁸ 'o kuisi isi ieni to mashʉyʉ to hoolicu, biebimi note 'oc'ocic'o ho poecʉ'va na mav'ov'o ci ma'konvosʉ ta 'tohʉngʉ'u, hoci uk'a hoolicu. o'anate meelʉ ohpae'ohsi na kuisi.

⁹ ne auyusi mo'ula yunsou ta yafana ta hoolicu; ataveisi mohcula yaa mashʉyʉ to hoolicu, micu yoayokeo 'o kuisi,

¹⁰ atavei mi'ocu mcoi to 'ayumona to kuisi. 'o mashʉyʉ to hoolicu mantesi poa elʉ no nsou 'e cou; at'inghi, hoci mi'usni a'o, nama apuya hafneni to mcoi.

¹¹ maica 'o kuisi isi ieni to mashʉyʉ to hoolicu ho teyaineni note 'oc'ocic'o ho peknui a'o, yaeza ieni to mashʉyʉ to hoolicu ho po'usna no mcoi.

¹² mo socofkoya 'o a'ʉmtʉsi ta hoolicu to moose; 'o mashʉyʉ to hoolicu mo anana'o socofkoya, moʉhmʉskʉ ho mou'ʉmnʉ.

¹³ ho isicu yainca ci engha, zous'aeno i'o mou'ʉmnʉ namo poa mcoi a'o? o'asa'a! 'ai'o kuisi! 'o kuisi isic'o ieni to mou'ʉmnʉ ho mahafo to mcoi, akoeva no asuhca husansana na mi'ausnasi to kuisi. ieni to mashʉyʉ to hoolicu, 'o yu'ausna no kuzo to kuisi micu asuhcu kuzo.

invonvo ma'paevai 'e cou

¹⁴ ito cohivi, 'o hoolicu to moose mo tma'usnu no piepiya; at'inghi na a'o te ahtuo'te toapayo'ʉ ci cou, isicu phieni to kuisi ho teyai tolei.

¹⁵ o'a os'o maka cohivi na os'o hioa; maica i'ola'u 'ucia hioa, nama la'u o'te hioa; i'o la'u ta'sʉsʉ'nova, nama la'u apuya hioa.

¹⁶ hoci'u hioa 'o o'aos'o 'ucia hioa ci hi'hioa, 'anate'o peelʉi o'te taa'uzva 'o hoolicu ho mio emzo.

¹⁷ homoeno maica, i'o os'o hioa ma'i os'os'a a'ʉmta 'ucia hioa, ma i'omo yonta 'ayumona'u ci kuisi 'omo himhohioa.

¹⁸ os'o yaeza cohivi, ta 'ayumona'u, 'ai'omoeno yonta 'ayumona ta yu'ausna'u, uk'a ci mou'ʉmnʉ. maica, la'u yaa 'tohʉngʉ no peis'ʉ'ʉmnʉ, at'inghi o'a mi'o yaa tonʉ no peis'ʉ'ʉmnʉ.

¹⁹ i'o la'u 'ucia hioa ci ʉmnʉ, nama la'u o'te hioa; i'o la'u o'te 'ucia hioa ci kuzo, la'u apuya hioa.

²⁰ hoci'u hioa 'o o'aos'o 'ucia hioa, te yainca o'as'a hioa'u, ma i'omo yonta 'ayumona'u ci kuisi 'omo himhohioa.

²¹ i'mi tan'e, os'o honga panto coni ci p'ofiha mo 'afeo'fu'u: hola'u mainca no koyu te'o peis'ʉ'ʉmnʉ, lasi conino paip'ʉci to kokuzo a'o.

²² 'e yu'ausna ta 'tohʉngʉ'u. la anana'o himkaebʉ to p'ofiha to hamo.

²³ at'inghi 'e feango'u lasi popeoskuna tomo h'unasi ci p'ofiha - 'e p'ofiha eni la ehtothomʉ 'o os'o ʉmnʉa ci p'ofiha, poa o'te meelʉ momeesih'i tomo maip'ʉcʉ a'o ci p'ofiha no kuisi; 'e p'ofiha eni la yonta feango'u ho 'afeo'fu'u.

²⁴ la'u a'ʉmtʉ 'atutumzo! siya nate meelʉ to'usnu a'o ho poa momempuesu tate koa mcoi ta feango'u?

²⁵ 'aveoveoyʉ to hamo, ieni to nooe'ocato iesu kilisto, isi peelʉi to'usni a'o. 'e a'a'ausna'u 'amoeno maica: te'oc'o iachi yonta piepiya'u ho meo'uzo to p'ofiha to hamo, 'ecu feango'u la fiho to p'ofiha to kuisi.