looma 6 - buacou seiso no faeva esvʉtʉ

mi'usnu to kuisi ho mcoi, yonto kilisto ho yaansoua

¹ mantetocueno av'a? tetoeno a'cʉ'cʉna h'oyunsova na kuisi, ho asuhca poa hupopayoneni na atngaso ci mengumi to hamo?

² o'ate ahtu maica! hoci i'mita kuisi ho engha, 'a mitocu mcoi. mainci tetos'a aac'o a'cʉ'cʉnʉ yunsou no 'ayumona no kuisi?

³ imu ahtao'te cohivi, ho mito tiou no toonono ho tmucni 'o iesu kilisto, 'amoeno tiou no toonono ho tu'upu mcoi.

⁴ ieni to toonono, mitocu fiho mcoi, su'upa efo'a; aʉlʉ mais'a 'o amopepe isi ieni to psoevohngʉ ci tonʉsi ho poa i'mi to mcoi 'o kilisto ho smoevovei, teto totiski maezo mino mo faeva ci h'oyunsova.

⁵ hocito tmucni to kilisto, miya na mcoisi, teto yaeza esmiza na smoevoveisi.

⁶ ito cohivi, ina noana'o ci a'to micu fiho to kilisto ho spica to zuuzika, tesi akoevano aapayo'a namo yaa kuisi ci yu'ausnato, poa o'tena tolei no kuisi na a'to.

⁷ maica hocic'u mcoi 'e cou ntec'u momeesih'i no tonʉ no kuisi.

⁸ hocito tu'upu to kilisto, ito taa'uzva, teto maezo to kilisto ho yaansoua.

⁹ maica ho ito cohivi, 'o kilisto micu i'mi to mcoi ho smoevovei, 'anate i'vaho mcoi; yaeza o'anatesi i'vaha atʉkca no mcoi.

¹⁰ i'o mcoisi, isi tohesi 'o kuisi, peisnʉski aepʉnga; homo yaansou maitan'e, mo nomio to hamo ho yaansoua.

¹¹ totiski, hoci i'mita kuisi ho engha, temu yaeza ta'una no mcoi 'e iachi. at'inghi yonto 'ayumona to nsou to kilisto iesu, mimu nomio to hamo ho yaansoua.

¹² ko'koeno, teav'ana i'vaha poa atʉkceni no kuisi 'ete anana'o kuzo ci feango, poa meo'uzo no ma'cac'ou ci yu'ausna.

¹³ yaeza teav'a poa peteozu no kuisi si feangomu, noa 'otitha no kokuzo. apuyu. temula sʉ'teni to hamo si iachimu, mais'a cihi cimo i'mi no mcoi ho esvoveiya poa yunsou ci cou, ho aucunva sʉ'teni to hamo 'e iachi, noa 'otitha no moulʉlʉ.

¹⁴ i'mi tan'e, 'otena i'vaho noa atʉkca no kuisi; maica 'anamimu noskufu no hoolicu, mimu noskufu no mengumi to hamo.

soskuskunu to moulʉlʉ

¹⁵ ho isicu e'usna yaica, maica ho o'ana mito noskufu no hoolicu hocu noskufu no mengumi to hamo, tetocueno meelʉ peiskuisi? o'ate ahtu meelʉ!

¹⁶ 'aimueno cohivi, holamu soskuskunu no mocmo ho meo'uzo no taukemu, 'acueno soskuskunusi na muu. 'atec'ueno peelʉi yainca, hocimu noa soskuskunu no kuisi, 'aeno mcoi na ataveisi; hocimu meot'ʉcʉ to hamo, tec'u meelʉ moulʉlʉ ci cou.

¹⁷ 'aveoveoyʉ to hamo! mohmula e'vono noa skuna no kuisi, maiten'e mimucu conci 'tohʉngʉ ho meo'uzo to isi psoecʉ'ha muu ci h'omahsʉftʉ.

¹⁸ isicu i'mi no kuisi ho poesih'a muu, hocu noa soskuskunu no moulʉlʉ.

¹⁹ os'o sokoeva no temu ngoveoa ta'hongi co 'tohʉngʉ'u, ko'ko mi'o boemi ta tec'o lua ta'hongi ci epo'usa ho mi'usni muu ho engha. ne auyusi, ohmula poa 'aʉnpʉnpʉ si iachimu feango, popeiskuzkuzo, noa soskuskunu no kuisi. maitan'e temucu aucunva sʉ'teni si feangomu ho youcunveni, noa soskuskunu no moulʉlʉ, meelʉcu 'otitha no socofkoya.

²⁰ ne ohsin'a soskuskunu no kuisi na muu, o'ala noa aʉt'ʉca no moulʉlʉ.

²¹ 'e imu ta'unano isi h'oinveni ci hi'hioa maitan'e, ho ohmu hioa ne mio, cuma na oho elʉa cimo koa ʉmnʉ? 'ac'oeno mcoi!

²² maitan'e, isicu i'mi no kuisi ho poesih'a muu, noa soskuskunu to hamo; imucu a'sʉftona sʉ'teni to hamo isi nsoumu, na temu tov'oha 'aeno 'auesiesi ci nsou.

²³ maica na huphina no kuisi 'aeno mcoi; at'inghi 'o isi taha'veni a'to to hamo ci mengumi isi poa yonto 'ayumona to nsou to nooe'oca kilisto iesu na a'to ho mayo no 'auesiesi nsou.