looma 5 - buacou seiso no faeva esvʉtʉ

yaa yupa nanghia ci natʉ'ca 'o hamo

¹ ho mitoeno i'mi no tmaa'uzo ho yainca coumoʉlʉlʉ, cu ieni to nooe'ocato ci iesu kilisto hocu yaa nanghia ci natʉ'ca 'o hamo.

² ieni no tmaa'uzo, isicu poa yaansou no 'ayumona no mengumi to hamo na a'to, i'mi tan'e mito kokaekaebʉ ho yaa ta'usni no tma'upu no psoevohngʉ to hamo!

³ o'amo anouc'o maica, hola yono 'atutumzo, leato a'cʉ'cʉnʉ kokaekaebʉ; maica ho ito cohivi 'e 'atutumzo tesi p'eyac'a na luaveica.

⁴ 'e luaveica la noa ʉm'ʉmnʉa to hamo, na ʉm'ʉmnʉa to hamo tesi hafneni no ta'usni.

⁵ 'e ta'usni eni o'ate ahtu 'afeungu; maica 'o hamo isi ieni to isi pafeni a'to ci seilei, isicu cohmeni ta 'tohʉngʉto na himngonghisi.

⁶ ne mohton'a noenoe'in'i, 'o kilisto cu fiho to ohsi esvʉta to hamo ci hie ho mcoineni 'emo yaa kuisi ci cou.

⁷ hoci nomio no coumoʉlʉlʉ ho mcoi o'ala lua talʉi; hoci nomio no ʉmnʉ ci cou ho mcoi, nenusi no panote smeecʉ'ho!

⁸ at'inghi 'o hamo isi pa'teni a'to na uk'a toc'ʉhʉ ci himngonghi: ne mohton'a yaa kuisia, isicu mcoineni to kilisto a'to!

⁹ i'mi to mcoisi, maitan'e mitocu meelʉ yaa yupa toseolʉ ci natʉ'ca 'o hamo; i'o mcoisi isi afnasa poa mongoi no sʉ'no to hamo na a'to.

¹⁰ na a'to zou anana'o hangʉ to hamo, at'inghi ieni to mcoi to okosi ko'ko mitocu naoveia 'o hamo. ho mitocueno naoveia 'o hamo, o'a tetos'aeno afnaso ieni to nsou to kilisto ho mayo no to'usni?

¹¹ o'amo anouc'o maica, ho mitocu meelʉ naoveia 'o hamo, o'a tetos'aeno yaeza ieni to nooe'ocato ci iesu kilisto ho kokaekaebʉ to hamo?

'atamu ho i'o kilisto

¹² 'o kuisi mo i'mi tamo cihi ci cou ho yʉmeʉmʉ ta hpʉhpʉngʉ, nomio no kuisi, micu toococeunu 'o mcoi; 'o mcoi micu cmʉ'ho ta yatatiskova, maica homo acʉhʉ peiskuisi 'e cou.

¹³ no auyusi ho o'amocu oho epeaska 'e hoolicu, mohcu yaa kuisi 'e hpʉhpʉngʉ; maica uk'a ci hoolicu, 'e cou o'amo yono svʉta no hoolicu ho noa patvovei.

¹⁴ at'inghi, ahoi to 'atamu ac'ʉhʉ to moose, isi atʉkca to mcoi 'e yatatiskova, ac'ʉhʉ to o'amo totiski to 'atamu ho meamzo no o'te meot'ʉt'ʉcʉ to hamo ho yaa kuisi ci cou, mioc'o maezo o'te yuszozʉ no mcoi. 'o 'atamu isi epo'usa to tenala cmʉ'ho ho noana'o ci ic'o.

¹⁵ at'inghi o'amo totiski 'emo yuso ci a'a'ausna, maica mon'a yupa askucu na isi taha'veni to hamo ci mengumi ho i'o kuisi to 'atamu. e'vono botngonʉ namo nomzo to kuisi to cihi ci 'atamu ho mcoi; at'inghi na mengumi to hamo mo asuhcuhe meoisi ho cocoya, na isi ieni to iesu kilisto ho taha'veni ta cou ci mengumi mo totiski meoisi ho cocoya.

¹⁶ na mengumi to hamo ho ina kuisi tamo cihi ci cou o'amo ake'i totiski. hoci peiskuisi 'emo cihi ci cou, la yʉsvʉta no ; at'inghi mo botngonʉ ci cou la peiskuisi, elʉ to o'amo 'aseolʉ ci mengumi ho yʉsvʉta no !

¹⁷ e'vono i'mi ta cihi cimo peiskuisi ci cou hocu ahoza atʉkca to mcoi 'e yatatiskova, at'inghi 'e isi aepʉnga to iesu kilisto mion'a asuhcuhe meoisi ho cocoya! inamo afu'u tiou no atngaso ci mengumi ho tmaha'o no meelʉ yupa toseolʉ 'o hamo ci cou, te acʉhʉ i'mi to kilisto ho yaansoua. ho mʉpʉtʉ no tonʉ.

¹⁸ maicac'o, i'mi no peiskuisi 'emo cihi ci cou, cu acʉha topci no kuisi 'e yatatiskova; totiski, i'mi no peislʉlʉ 'emo cihi ci cou, cu acʉha peteongasa na kuisi ta yatatiskova hocu elʉ no nsou.

¹⁹ aʉlʉ mais'a 'emo cihi ci cou homo pef'uhu no mashʉyʉ, cu acʉhʉ yaa kuisi 'e yatatiskova; totiski. 'emo cihi ci cou mo meot'ʉt'ʉcʉ, cu acʉhʉ coumoulʉlʉ 'e yatatiskova.

²⁰ ho isi p'eyac'a 'e hoolicu isi poa asuhcu man'i 'e kuisi ta cou; at'inghi. homo asuhcu man'i na kuisi, na mengumi to hamo mo maezo asuhcu atngaso.

²¹ aʉlʉ mais'a 'o kuisi isi ieni no mcoi ho atʉkcʉ, 'o mengumi to hamo isi yaeza ieni no moulʉlʉ ho aʉt'ʉcʉ, poa meelʉ mito nooe'oca iesu kilisto na a'to ho mayo no 'auesiesi nsou.