looma 4 - buacou seiso no faeva esvʉtʉ

te epo'usa 'o 'avulahamu

¹ inacu hi'hioa no mʉntʉ'ca to nia maameoito ci 'avulahamu, nteto peelʉi av'a?

² hoci i'mi no peipeis'ausnasi ho ko'ko peelʉi noa yainca zou coumoʉlʉlʉ, pano tesicu peelʉi etanveni, at'inghi hote yonto tuhcu to hamo o'ate meelʉ.

³ yainca to seiso:

⁴ 'ola yaahioa te yaa hnooa, o'ate tamza no mengumi, mantesi anana'va elʉa.

⁵ at'inghi i'omo tmanoe'ocʉ tola yʉsvʉta ho poa uk'ana kuisi 'emo yaa kuisi ci cou, 'o hamo tesi ieni no tmaa'uzosi, o'aisi ieni no peipeis'ausnasi, poacu meelʉ yupa toseolʉ ta iachisi,

⁶ 'o isi yainca to tavite, i'omo o'te noe'ocʉ no peipeis'ausna hocu yainca to hamo zou coumoʉlʉlʉ ci cou mo ʉm'ʉmnʉ, 'aeno eni 'e e'ausnasi. isi yainca:

⁷ i'o isi coveoza ho peteongasa na kuisisi ci cou micu ʉm'ʉmnʉ!

⁸ na lasi o'te tasvʉta to nooe'oca na kuisisi ci cou mo ʉm'ʉmnʉ!

⁹ 'e isi engha to tavite ci ʉm'ʉmnʉ. zouc'oeno 'omo tiou to s'e'honga nate tmanu? o'amo maica. tee maezo tma'upu 'o o'aisi s'e'honga ci cou; maica imzacu e'eo'eonga 'o e'e to seiso, yainca:

¹⁰ mio yono mo mainenu ci a'a'ausna homo yuyafo na eni? nenusi no auyusi no tiou no s'e'honga 'o 'avulahamu. hocieno ataveisi? ma auyusi, o'as'a ataveisi.

¹¹ moso atavei tiou no s'e'honga; mac'o huomza eni, soomei na auyusi no tiou no s'e'honga. mohcu i'mi no tmaa'uzo hocu tamza no coumoʉlʉlʉ. ko'koeno, mi'usnu to afu'u o'amo tiou no s'e'honga, at'inghi i'mi no tmaa'uzo hocu yainca to hamo zou coumoʉlʉlʉ ci cou. 'o 'avulahamu zou amo tomo tma'usnu no piepiya.

¹² zou maezo amo to mohcu tiou no s'e'honga ci cou, o'amo anou i'mi ho ihe tiova na s'e'honga, mo maezo i'mi ho mosola to'ofeihni to nia maameoito ci 'avulahamu. yono o'amocu moso tiou no s'e'honga hocu ho'honga namo yaa singkoo ci h'oyunsovahe.

na ohsi teomneni to hamo te i'mi no tmaa'uzo ho esmi

¹³ 'o hamo ohsila teomneni to 'avulahamu ho ito mʉntʉ'casi, yainca tasila tiuska 'e hpʉhpʉngʉ. 'e teomneni eni o'amo i'mi no meot'ʉcʉ to hoolicu 'o 'avulahamu, mamo i'mi homo tmaa'uzo hocu yainca coumoʉlʉlʉ.

¹⁴ hocic'o faeni tomo meot'ʉcʉ to hoolicu to moose 'e ohsi teomneni to hamo, tec'u 'afeungu 'e tmaa'uzo ta cou, ina isi teomneni to hamo tec'u maezo uk'a a'a'ausna.

¹⁵ ina sʉ'no to hamo mo i'mi to hoolicu; hoci uk'a hoolicu. maezo uk'a cite yainca yutasufku no hoolicu ci hi'hioa.

¹⁶ i'mi tan'e, na teomneni te i'tohungu no tmaa'uzo; na eni te hosoo 'o teomneni to hamo isic'o taha'veni to 'avulahamu ho ito afu'usi mʉntʉ'ca, o'a anouc'o 'omo meot'ʉcʉ to hoolicu ci cou, isi pai'upi 'omo maito 'avulahamu ho tmaa'uzo to hamo ci cou. maica 'o 'avulahamu zou toehungu amo ta mito tma'usnu no piepiya.

¹⁷ aʉlʉ mais'a to isi engha to seiso: yonto tuhcu to hamo, te yaa a'a'ausna 'e isi teomneni tan'e; 'o isi taa'uzva to 'avulahamu 'ai'omoeno poa smoevovei to micu mcoi ci cou, i'mi to uk'a ho mooyai ta acʉcʉhʉ ci hamo.

¹⁸ yonta mo uk'a ta'usni, mioc'o asngʉcʉ yaa ta'usni 'o 'avulahamu, asngʉcʉ tmaa'uzo, ko'ko micueno meelʉ . aʉlʉ mais'a to isi yainca to seiso:

¹⁹ ne mio tec'u mon'i tose'conza 'o 'avulahamu. 'o feangosi micu totiski no micu mcoi, 'o saala micu nocaefi na tonʉ nosi yaa okoa, at'inghi, o'amo i'mi homo maica ho aovohʉ na singkoosi.

²⁰ o'aisi payo'a na singkoosi, yaeza o'aisi ta'pepecvaza na ohsi teomneni to hamo; namamo asuhcu mahtʉicʉ na singkoosi, faeni to hamo na psoevohngʉ.

²¹ isi ta'mamahtʉica taa'uzva 'o hamo tesi ahtao'te aepʉnga na ohsi afu'a teomneni.

²² 'aeno eni na koa mo i'mi no tmaa'uzo 'o 'avulahamu ho yainca

²³ at'inghi 'e e'e no o'a isi anovac'o mi'usneni to 'avulahamu,

²⁴ mo maezo nomio a'to ho engha. maica ho ito taa'uzva 'o moso poa i'mi to mcoi ho smoevovei 'o nooe'oca iesu ci hamo, i'mi tan'e tesi tamza no coumoʉlʉlʉ.

²⁵ isi faeni ta emucu ta cou 'o iesu, nomio ta kuisito ho mcoi; isi poa smoevovei to hamo, ko'ko mitocu meelʉ yaa yupa toseolʉ ci natʉ'ca 'o hamo.