looma 3 - buacou seiso no faeva esvʉtʉ

¹ yaica ci pat'a'ausna, 'o couyutaya cuma namo tosa'ohe to couyafana? cuma na tesin'a a'a'ausna to s'e'honga?

² na a'ʉmtʉsi mio noemʉhʉ 'emo mav'ov'o. 'emo coni, isi toveineni to couyutaya to hamo 'e e'esi.

³ 'upenaeno la yaa pef'uhu ta taicohe, 'o hamo tees'aeno i'mi tan'e ho yainca 'anamo mou'ʉmtʉ?

⁴ o'ate maica! ac'ʉhʉ no acʉhʉ lolekoknuyu 'e cou, teec'o asngʉcʉ mou'ʉmtʉ 'o hamo; aʉlʉ maito isi yainca to seiso: ho ciko ya'ei uk'a cite peelʉi efkʉta; hoci ehpʉngneni suu 'ateko ahtuo'te etpʉtʉ.

⁵ ina 'oha moulʉlʉto hoci peelʉi husansana na moulʉlʉ to hamo, tetoeno av'a? hocisi patvovei to hamo a'to, tetoeno yainca o'amo moulʉlʉ 'o hamo? (os'o ieni tala hia ma'to'tohʉngʉ ta cou ho engha.)

⁶ mioeno ahtu maica! hoci o'amo moulʉlʉ 'o hamo, tesis'aeno peelʉi yʉsvʉta 'e hpʉhpʉngʉ?

⁷ 'e lolekoknuyu'u hoci peelʉi asuhca husansana na mou'ʉmtʉ to hamo, asuhcu mayo no psoevohngʉ, te'o av'a? mainci ten'a 'ahʉya yʉsvʉta no coukuisi a'o?

⁸ mainci o'te yainca: panto mo ehpʉngʉ ho yainca mosola maica na nia e'e'u; 'emo maica ci cou hoci topci no kuisi nte 'aseolʉ.

uk'a ci coumoʉlʉlʉ

⁹ ho micu maica, 'e mito couyutaya mio tasohe to couyafana? o'amo ahtu maica! o'ucula yainca, 'e couyutaya ho i'o couyafana mo totiski noskufu to tonʉ to kuisi.

¹⁰ aʉlʉ mais'a to isi yainca to seiso: uk'a ci coumoʉlʉlʉ, o'amo mako cihi.

¹¹ uk'a cimo toutʉs'ʉ ci cou, maezo uk'a cimo biebimi to hamo.

¹² mo acʉhʉ pef'uhu to hamo, nʉthʉ emo'usnu to emopeu ci ceonʉ; uk'a cimo peislʉlʉ ci cou, uk'a cimo mako cihi.

¹³ 'o vihihe mo mais'a maavo ci heuf'a; 'o umohe la enou to moezʉezʉhʉ ci e'e; i'omo totiski to fkoi ho mahiz'o ci pahu la yuyafo to sumsuhe;

¹⁴ la cono ngayo 'o ekvo'ʉ ho tokuzkuzo.

¹⁵ la mais'a mo toetoesoso 'o t'angohe, nongongabo pohcinghi ho opcoi.

¹⁶ i'o lahe sʉc'ʉhi la conino moteongaso to cocaphʉ no aun'on'oi ho nac'o.

¹⁷ o'a ihe cohivi ho pano mo soanono ci ceonʉ;

¹⁸ maezo o'amo bochio no einu to hamo.

¹⁹ ito cohivi, 'o mashʉyʉ to hoolicu mo mi'usnu tamo noskufu ta hoolicu ci cou ho ya'ei, akoeva no peelʉi poa peteozu no yʉsvʉtʉ to hamo 'e cou ta mauhpʉhpʉngʉ, poa o'tena meelʉ yaa 'o'emamzʉ 'e cou.

²⁰ maica uk'a cite meelʉ noe'ocʉ no meot'ʉcʉ to hoolicu ho yono tuhcu to hamo ho noa yainca mo moulʉlʉ ci cou. na isi peelʉi hioa ta hoolicu maisic'o poa cohivneni homo iachi yaa kuisia 'e cou.

isi poa yaa yupa toseolʉ ci natʉ'ca to hamo 'e cou

²¹ at'inghi maitan'e, isicu poa husansaneni to hamo te yainenu te poa yaa 'aseolʉ ci natʉ'ca 'e cou; na eni o'amo yupa natʉ'ca 'o hoolicu. 'o hoolicu to moose ho i'o mayoyongensa mo acʉhʉ maica ci hia 'akasi.

²² ho isi poa yaa yupa toseolʉ ci natʉ'ca to hamo 'e cou. mo i'tohungu ho ihe taa'uzva 'o iesu kilisto. ho isi yaica ci hia mi'usni to hamo 'emo afu'u tmaa'uzo to kilisto ci cou, uk'a ci ake'isi naskuca:

²³ maica mo acʉhʉ yaa kuisi 'e cou, aviovio no psoevohngʉ to hamo.

²⁴ apuyu, isi taha'vi no mengumi to hamo, ieni to kilisto iesu ho to'usni 'e cou, poacu meelʉ yupa toseolʉ ci natʉ'ca to hamo.

²⁵ o'aisi apemza ngohia to hamo 'o kilisto, titha 'o feangosi ho sʉ'teni, ieni to mcoisi, i'mi no tmaa'uzo ta cou hocu peteongasa na kuisi. homo maica 'e hioa to hamo 'aisieno pa'teni na iachisi moulʉlʉ.

²⁶ maica ho isi uveica, coveoza na nia la kuisi ta cou. at'inghi ta maitan'e, isi ieni no toono no kuisi ta cou ho pa'teni na iachisi moulʉlʉ. maicac'o, isicu epa'teni 'o iachisi zou moulʉlʉ, inamo afu'u tmaa'uzo to iesu ci cou isi yaeza poa yaa yupa toseolʉ ci natʉ'ca.

²⁷ ho micu maica, cuma na teton'a koa etano? a'ʉmtʉ uk'a! cuma nate 'o'emamzʉ? tee i'mi no noʉt'ʉcʉ to hoolicu? o'asa'a! te i'mi no tmaa'uzo.

²⁸ ho temzacu eteuyuna zou: 'e cou hoci meelʉ yupa toseolʉ to hamo tec'o ieni no tmaa'uzo, o'ate ieni no noʉt'ʉcʉ to lasi esvʉta to hoolicu.

²⁹ zoueno anouc'o hamo to couyutaya 'o hamo? o'as'aeno maezo hamo to couyafana? ahtuo'te maica!

³⁰ moc'o cihi 'o hamo, tesi poa i'tohungu no tmaa'uzo 'o couyutaya, 'o couyafana te maezo i'mi no tmaa'uzo ho yaa yupa toseolʉ ci natʉ'ca 'o hamo.

³¹ ho isicu e'usna yaica, 'e tmaa'uzoto teen'asi uk'ana a'a'ausna 'o hoolicu to moose? o'ate maica! apuyu, teto asuhca poa tmaʉlʉlʉ 'o hoolicu.