looma 15 - buacou seiso no faeva esvʉtʉ

'ote m'ene no iachi ma'mamso

¹ 'e mito ma'tataso na singkoo ci cou, nte to'usni 'ola 'oha taso 'o singkoo ci cou, e'paevazi na cvʉhʉhe, o'ate m'eya iachi ma'mamso.

² 'e mito macicihi la conino ta'to'tohʉngveni nate koa ʉmnʉ to mocmo ci sinto, ho m'eac'ʉ note toehunga fihi ci h'oyunsova no singkoo.

³ maica 'o kilisto o'amo m'eya iachi ma'mamso, apuyu mais'a 'o isi yainca to seiso: <'o ekvo'ʉ tomo ekvo'ʉ suu ci cou te acʉhʉ su'ta feango'u.>

⁴ 'e e'e ta 'ayumona ta seiso mo acʉhʉ nomio no po'pa'cohivi a'to ho tposi, na atuhcusi tesi poa ieni no buveici ho ino isi faeni ta seiso ci poucufnu ho elʉ no ta'usni.

⁵ i'ola mofi no buveici ho poucufnu ci hamo tesi'so to'usni muu ho poa yaa totiski cila hu'a'ausna, momaemaezo no peipeis'ausna to kilisto iesu.

⁶ peelʉi acʉha poa noteuyunu, tmunsohʉ tohmomoengʉ to amohamo to nooe'oca iesu kilisto.

mi'usnu to couyafana ho epeaski to fukuin

⁷ ko'koeno, akoyu no psoevohngʉ to hamo, temula yupa nia tiou, totiski to kilisto ho isi tiova muu.

⁸ te'o eʉsvʉta muu, 'o kilisto tesi akoeva no epa'teni na mou'ʉmtʉ to hamo, noa soskuskunu to couyutaya, akoeva no peelʉicu mia 'o ohsila teomneni to hamo to nia maameoito.

⁹ yaeza peelʉi poa tohmomoengʉ to himngonghi to hamo 'o couyafana. aʉlʉ mais'a 'o isi yainca to seiso: i'mi tan'e. te'o yonta 'ayumona ta couyafana ho tohmomoengʉ suu; te'o tohmomoengʉ to ongkosu.

¹⁰ i'vaha yainca to seiso: couyafana! la i'upu to 'o'oko to hamo ho toehungu kokaekaebʉ.

¹¹ ivaha yainca: acʉcʉhʉ 'e couyafana! te tohmomoengʉ to nooe'oca; yatatiskova! temu tohmomoengʉ to nooe'oca.

¹² yaeza yainca to 'izaya: panto mʉntʉ'ca to iesi: te yuyafo, te yʉc'ʉ ho aʉt'ʉca 'e hpʉhpʉngʉ ta yafana; tehe mingeovi ta couyafana!

¹³ 'o hamo, 'ai'oeno 'o esbobuka no ta'usni, tesi'sola i'mi no lamu singkoo ho poa nongcʉngcʉ na mav'ov'o ci kokaekaebʉ, soanono, inalamu ta'usni, ieni no tonʉ to seilei, ho o'te antʉhʉ apuhngua.

esngʉsngʉcʉ 'o poolo

¹⁴ maanat'ohaesa, os'o iachia asansana cohivi mimu a'sʉftonʉ yaa mou'ʉmnʉ ci peipeis'ausna, maezo noemʉhʉ na atngaso ci mau'to'tohʉngʉ. meelʉ yupa poucufnu,

¹⁵ at'inghi, ta tengami tan'e, e'usna tomo piyo ci a'a'ausna, te'on'aso e'ʉ'ʉteʉ ho poutʉs'ʉa muu. ho mi'o maica ci hia esngʉsngʉcʉ, mo maica isi faeni a'o to hamo 'emo afnaso ci tonʉ.

¹⁶ poa meelʉ soskuskunu to kilisto iesu, yonta taico ta couyafana ho yaahioa. mi'o mais'a saisi ho epeaska 'o fukuin to hamo, akoeva no teyai sʉ'ta to seilei 'o couyafana ho sʉ'teni to hamo, lasi tiova ho ʉm'ʉmnʉa to hamo.

¹⁷ maicac'o, maica ho mi'o no'ayumonʉ to kilisto iesu, te'o i'mi ho mi'o fifiho to hamo ho taotofsi'i co os'o ta'usni.

^18-19 'e te'o e'ʉ'ʉteʉa moc'o conci e'e: 'o kilisto isi ieni ta e'e'u ho peipeis'ausna, yaeza ieni to po'e ho ito tonʉ no piepiya to hamo ho poa meo'uzo to hamo 'o couyafana. i'mi tan'e, ahoi ne 'elusalemu ac'ʉhʉ to mia'usnu to hpʉhpʉngʉ ne 'ililiku, la'u nongongaboi ho psoyaska 'o fukuin to kilisto.

²⁰ la'u conino ma'koyu. te'o uhta o'amocumosola ahtu tmac'ʉhʉ to kilisto ci hpʉhpʉngʉ ho epeaska 'e fukuin, cite'os'a p'eyac'a no totnguca no mocmo na os'o hioa.

²¹ ohsicu engha to seiso: 'o 'amosola bohngʉ ci cou tehe teolʉi; 'o o'amocu mosola tmalʉ ci cou tehe ta'hongi.

ma'koyu no uhne looma 'o poolo

²² at'inghi, la'u siho yupteilʉ tola nomʉti, ho o'te meelʉ uhta lamu yoni.

²³ ta maitan'e, ho os'ocueno ae'aepʉnga 'e os'o hi'hioa ta mia'usnu tan'e, a'vinano ta 'enetopzoha mo'ula asngʉcʉ mici baito muu,

²⁴ os'o tata'za nocu e'ohʉ maitan'e, to ceonʉ ho ta'u emo'usnu ne sivania, aosu'u neisu ho baito muu, mipiyohi to lamu yoni ho noteuyunu 'aveoveoyʉ, ataveisi ta'u poa peomanzeni muu.

²⁵ at'inghi, nomio ta hi'hioa no to'usni 'o sinto, maitan'e te'o ahtuo'te uhnen'a 'elusalemu.

²⁶ maica 'o kiokai ne makitong ho 'akaiya mo yukaebʉ tosmʉyʉ to yupasʉ, tehe to'usni 'omo thi'cia ci sinto ne 'elusalemu.

²⁷ 'aeno'so ihe yukaeba hioa na eni, a'ʉmtʉsi mantehe anana'va hioa. 'e sinto ta couyutaya ho iheeno poa tma'upu nomo no'usnu to mengumi no piepiya 'e couyafana, 'e couyafana 'antehe anana'va to'usni no macucuma 'o couyutaya.

²⁸ totea ho ta'ucu ae'aepʉnga 'e hi'hioa eni, ataveisi ho ta'ucu asansana yocnguhneni 'e ohe tosmʉya ci yupasʉ, neisu muu ho ta'u emo'usnu ne sivania.

²⁹ os'o cohivi, ho tena'u baito muu te'o yaeza hafneni muu 'emo atngaso ci mengumi to kilisto.

³⁰ maanat'ohaesa, ieni to nooe'ocato ci iesu kilisto, yaeza ieni to isi pafeni to seilei ci himngonghi, te'o m'ene muu, nomio a'o teto toehungu mi'usnu to hamo ho 'inoli.

³¹ poa o'te elʉ no sokoeva no akuzkuzoa to o'ala tmaa'uzo ci cou ne yutaya, yaeza poa ma'mamso to os'o hioa ci to'usnu 'o sinto ne 'elusalemu.

³² hocisi teomneni to hamo, te'o meelʉ kokaekaebʉ ho baito muu, mipiyohi no'upu muu ho to'si'ʉyʉ.

³³ inala mofi no soanono ci hamo, tesi'sola asngʉcva no'upi muu! 'aamen.