looma 14 - buacou seiso no faeva esvʉtʉ

'otela eyayaezoyʉ no cou

¹ 'ola yoheoz'u 'o singkoo ci cou temula tiova, 'upena hoci yaa o'te totiski na lasi hu'a'ausna, yaeza teav'a 'ahʉya yʉhcʉvha.

² 'ola yaa singkoo ci cou la meelʉ bonʉ tomo mav'ov'o ci macucuma; i'omo yoz'u 'o singkoo lac'o bonʉ to machachae.

³ i'ola meelʉ bonʉ tamo mav'ov'o teav'a potfʉnga 'ola o'te bonʉ; i'olac'o bonʉ to chae teav'a eayaezoya 'ola oa'pucu, maica isicu acʉha tiova to hamo.

⁴ zou siya suu, ci smeecʉ'ho eayaezoyʉ no soskuskunu no mocmo? o'atesieno peelʉi hʉsvʉta no taukesi namo kuzo ho ʉmnʉ? namaeno, 'o nooe'oca tesi to'usni ho poa meelʉ yaa a'a'ausna.

⁵ pantola mainca 'o koyuhe 'e hie eni mo tosa'ohe tomo h'unasi ci hie; panola mainca 'e afu'u hie moc'o acʉhʉ totiski. 'emo macicihi nte acʉhʉ yaa iachi hu'a'ausna.

⁶ pantola afnasa huecvʉhʉa namo conci hie, epa'teni na lasi hia einu to nooe'oca; pantola ongongabo to macucuma, yaeza epa'teni na lasi hia einu to nooe'oca, maica lasi nomio ta isi ana ci 'oanʉ ho to'aveoveoyʉ to hamo. pantola opeic'o to isi ana, totiski epa'teni na einu to nooe'oca, maezo to'aveoveoyʉ to hamo.

⁷ ta taicoto uk'a citec'o nomio ta iachi ho yaansoua. maezo uk'a citec'o nomio ta iachi ho mcoi;

⁸ ho mito yaansoua, la yaansouneni 'o nooe'oca, hoci mcoi, te nomio to nooe'oca ho mcoi. ko'koeno, 'upena hoci yaansoua, hocieno mcoi, mito acʉhʉ tma'usnu to nooe'oca ci cou.

⁹ nomio tan'e, 'o kilisto mo mcoi ho i'vaho smoevovei, na atuhcusi te nooe'oca tamo yaansoua ho ito mo mcoi ci cou.

¹⁰ homoeno maica, na suu, mainci eayaezoya na nanat'ot'ohaesasu? mainci potfʉnga na nanat'ot'ohaesasu? tatola acʉhʉ yac'ʉ no tuhcu to hamo ho tiou no tesi hia yʉsvʉtʉ;

¹¹ maica isi yainca to seiso: yainca to nooe'oca: te'o mas'osʉ ta iachi'u nsou ho esvʉtʉ. 'e yatatiskova te acʉhʉ mi'usnu a'o ho pop'up'ungu m'ohkuyu; 'e yatatiskova te acʉhʉ ebobohngʉ yainca zou hamo a'o.

¹² ho isicu e'usna yaica, 'emito macicihi ci cou tena acʉhʉ mi'usnu to hamo ho tuyafa na tposʉ no ohola hioa.

teav'a poa smopcuku na mocmo

¹³ ko'koeno, 'anateto i'vaho yupa eayaezoyʉ; nte ma'kokoyu, o'te hioa nate koa smopcuku ho poa peiskuisi na mocmo ci cou.

¹⁴ os'o ieni to hiamza yupa tmʉyʉcʉ ci natʉ'ca 'o nooe'oca iesu ho a'ʉmta cohivi, 'e 'oanʉ mo acʉhʉ cofkoya; hoci pano cou mo ma'unano o'amo cofkoya, hote ieni ta cou tan'e, 'anate cofkoya.

¹⁵ hociko nomio no 'oanʉ ho alolongʉ no 'tohʉngʉ no nanat'ot'ohaesa, 'e osko hioa 'anamo i'mi no himngonghi ci 'tohʉngʉ. 'otes'a i'mi no 'oanʉsu ho poa kuzo na ohsicula mcoineni to kilisto ci cou!

¹⁶ na osko ta'unano mo ʉmnʉ ci hi'hioa teav'as'a poa elʉ no kuici ongko.

¹⁷ maica ina hpʉhpʉngʉ to hamo o'amo yono 'oanʉ, mo yono isi faeni to seilei ci moʉhmʉskʉ, moususeomʉ, kokaekaebʉ.

¹⁸ 'emo maica ci hia fifiho to kilisto ci cou 'ate ahtuo'te noa ʉm'ʉmnʉa to hamo. ho emomoengʉa ta cou.

¹⁹ ko'koeno, tetola cucufnu no nananghinghia, yupa m'eac'ʉ note cono feango ci h'oyunsova.

²⁰ 'ote i'mi no 'oanʉ ho poa aon'oi na lasi hi'hioa to hamo. 'e afu'u 'oanʉ te acʉha peelʉi ana, at'inghi hoci nomio no osko ana ho poa e'puyu na mocmo ci cou, 'anamo emio.

²¹ ko'koeno, atva'esi ʉmnʉ hoci o'te 'ahʉyʉ bonʉ no fou, o'te mimo no emi, teav'a hioa nate afu'u koa smpcuku no nanat'ot'ohaesa ci hi'hioa.

²² mio mainenu na hu'a'ausnasu tan'e, zou iachisu natʉ'ca to hamo. 'emo cihi ci cou hoci meelʉ yono isi ta'unano mo emio ci hi'hioa ho o'te ma'kokoe'i. te mainenu na hia ʉm'ʉmnʉ!

²³ at'inghi hocisi ta'kuv'a na isi ana ci 'oanʉ, hocisi ana, tesi topci no kuisi to hamo, maica ho o'aisi ieni no singkoo ho ana. acʉcʉhʉ na o'a isi ieni no singkoo ho hioa zou ci hi'hioa zou acʉhʉ kuisi.