looma 13 - buacou seiso no faeva esvʉtʉ

meo'uzo ta seifu

¹ 'emo macicihi ci cou nte meo'uzo ta tonʉ ta seifu, maica isi teomneni to hamo homo yayo 'e tonʉ eni; 'o tonʉ tola aʉt'ʉcʉ mo i'mi to hamo.

² ko'koeno, hoci yutasufku tola aʉt'ʉcʉ 'amoeno yutasufku to mashʉyʉ to hamo; 'emo maica ci cou 'ate ahtuo'te tiou no yʉsvʉta.

³ 'e le'aʉt'ʉcʉ o'ates'a poa ma'sasmoyo 'ola popeis'ʉ'ʉmnʉ ci cou, mai'ola popeiskuzkuzo nate poa ma'sasmoyo. hociko o'te smoyoa 'ola aʉt'ʉcʉ, ci'ateeno popeis'ʉ'ʉmnʉ, 'atesi ahtao'te emomoengʉa suu;

⁴ maica lasi titha to hamo 'emo maica ci cou, 'o lasi hi'hioa te koa ʉmnʉ suu. hociko peiskuzkuzo, teko ahtao'te smoyoa, maica 'o patvoveiyasi o'amo anouc'o mais'a yoyaso ci oko. lasi titha to hamo ci cou, tesi hioa 'o isi skueni to hamo hote patvovei 'ola peiskuzkuzo ci cou.

⁵ ko'koeno, temu asansano meo'uzo tola aʉt'ʉcʉ, o'a anou smoyo no patvovei to hamo, te maezo nomio no mou'ʉmnʉ ci 'tohʉngʉ.

⁶ hotemula tuyafo no tmuhnoa, teec'o totiski na 'o'emamzʉsi, maica 'ola aʉt'ʉcʉ. hotesi hioa 'olasi hi'hioa la nomio to hamo ho yaahioai.

⁷ ko'koeno, la peʉezi na afu'u efkica: nate anana'va faeni la faeni; nate anana'va tuyafa ci tmuhnoa, la tuyafa; nate anana'va smoyoa, la smoyoa; nate anana'va einva, la einva.

enananghia to mocmo ci cou

⁸ asansano 'otela yaa yuevaha! 'ac'o yupa nananghinghia na temula ngoevi ci yuevaha. inala himngonghi no mocmo ci cou, 'aisicueno peihcʉ'hi 'o hoolicu.

⁹ 'o lasi hia mashʉyʉ to hoolicu: <'ote mseezo; 'ote opcoi; 'ote meo'eoi; 'ote ma'konvosʉ.> 'e acʉcʉhʉ eni ho i'o mocmo ci mashʉyʉ isicu acʉha pai'upi to 'ayumona to mashʉyʉ to

¹⁰ cihi cila himngonghi no cou, o'ate ahtu peis'usnu note akuzkuzo no cou ci hi'hioa. ko'koeno, 'e acʉcʉhʉ ta hoolicu isi peihcʉcʉhi ta himngonghi.

¹¹ te asansana poa maica natemula hioa, maica imu cohivi zou cuma 'e hie maitan'e; zou hiesi no ntemucu i'mi no oengʉtʉ ho peihsasmome. maitan'e na to'usnu to hamo micu asuhcu cum'uhe ne mohton'a ahoi tmaa'uzo.

¹² tec'u mon'i sucaefi 'e voecʉvcʉ, tec'u cmʉ'ho 'o tiskova. 'anateto 'aoko peis'usnu nomo voecʉvcʉ ci hi'hioa; la meua soanothʉ, ae'ayocʉ ehtothomʉ ho tenac'u tiskova.

¹³ na teto peipeis'ausna la poa peismomolʉ, totiski tola notaico to tiskova ho yaansou ci cou. 'otela 'aʉnpʉnpʉ ho momoyomo, 'otela peis'usnu no mseezo ho smoc'ou, 'otela aubut'u ho youbobai.

¹⁴ at'inghi, temula ieni to nooe'oca iesu kilisto ho seuseu'heni 'e iachi; 'otec'ola ma'nou ma'mamso no poc'ou ci hi'hioa ta feango!