looma 11 - buacou seiso no faeva esvʉtʉ

angongohi to hamo 'o cou'isolaelu

¹ te'ocueno tuocosi: isinana hopsʉpseni to hamo 'o 'o'okosi? o'aisis'a! na a'o maezo cihi ta cou'isolaelu, zou mʉntʉ'ca to 'avulahamu, tma'usnu to suezopʉ to penyaming.

² o'aisi hopsʉpseni to hamo 'o ohsila ahoza ne noana'o ho epeiya ci 'o'okosi. imu cohivi, isi tposi to seiso: 'o 'iliya ne ohsi mi'usneni to hamo ho ehpʉngneni 'o cou'isolaelu,

³ isi yainca:

⁴ isieno av'a to hamo ne isi yut'inga? isi yainca:

⁵ 'o a'a'ausna maitan'e mioc'o maica: i'omo i'mi to iachisi mengumi to hamo ho epeiya ci cou. micuc'o maezo kakutia.

⁶ 'o hiasi epei to hamo mo i'mi no mengumi, o'aisi ieni no peipeis'ausna ta cou; hoci i'tohungu no peipeis'ausna ta cou, na isi yainca mengumi o'ana a'ʉmtʉ mengumi.

⁷ te mainenu na atotaveisi? na atotaveisi o'atehe elʉa to cou'isolaelu 'o ihe i'ima, mo apuyu elʉ 'o ohsi epeiya to hamo ci moc'o kakutia ci cou; 'o mocmo ci cou mo meoo'te tmalʉ ho isi eyoho'a to homo.

⁸ aʉlʉ mais'a 'o isi yainca to seiso:

⁹ ohsila yaeza yainca to tavite: mumzo'sio no h'oepona hola eabobonʉ, hocu tʉtpʉta; ekosʉ'sio, tiou no patvovei!

¹⁰ voecʉvcʉ'sio na mcoohe, o'te bohngʉ; 'auesiesi'sio hkuyu!

¹¹ te'ocueno tuocosi: homo bivio ho smopcuku 'e couyutaya, micunana a'sʉftonʉ aapayo'ʉ? o'amio! maica homo i'mi to peis'epohe, 'amaknocu cmʉ'ho to couyafana 'o to'usnu, poa smo'eubut'u 'o couyutaya hocu apopoovaho yʉc'ʉ.

¹² 'o peis'epo to couyutaya isi hafneni ta atngaso ci ʉm'ʉmnʉ 'e hpʉhpʉngʉ; 'o aviovio to piepiyahe apuya hafneni to atngaso 'o couyafana. homo maica, hoci pai'ayumoni no to'usnu to hamo 'e acʉcʉhʉ ci couyutaya, 'atesis'aeno hafneni no asuhcu atngaso ci ʉm'ʉmnʉ?

to'usni to hamo 'o couyafana

¹³ homo maica te'ocu mi'usnu ta couyafana ho aomotʉ'ʉ: ho zoueno sitoo ta couyafana a'o, 'ate'oeno anana'va huecvʉhʉa 'e os'o fifihi ci hi'hioa.

¹⁴ nenusino te'o peelʉi poecʉ'va na smo'eubut'u ho apopoovaho ci 'tohʉngʉ to 'oahngʉ'u, ieni tan'e ho to'usni namo piyo ci cou ta 'ayumonahe.

¹⁵ hoci noa ciha ho apuyu meelʉ yupa nanghia to hamo 'e yatatiskova. hoci maica. hotena noa tiova, 'o mohcu mcoi ci cou o'ates'aeno meelʉ mais'a mo i'vaho mayo no nsou?

¹⁶ hoci sʉ'teni to hamo na ahoisi ta smoof'o to tungva, 'aisicus'aeno acʉha sʉ'teni 'emo cono taucunu. hoci sʉ'teni to hamo na emisi to evi, 'aisicus'aeno ac'ʉha to ehtisi na isi sʉ'teni to hamo?

¹⁷ piyo ci ehti to 'olivu isi tibkoca. cnguhneni 'o ehti to 'olivu no yʉn'ʉ, na suu couyafana mo mais'a evi no 'olivu no yʉn'ʉ. maitan'e cu tma'upu to yuayayokeo ho yutataso ci nsou to couyutaya,

¹⁸ ko'koeno, o'ateko hupotfʉngʉa 'omo mais'a isi tibkoca ci ehti ci cou. mac'o ehti na suu, mainci te aac'o meelʉ iachi efnaso? o'as'a suu namo m'o'cʉ to peongu no evi, mai'e peongu 'emo m'o'cʉ suu!

¹⁹ nenusi no teko yainca:

²⁰ mioeno o'te emzo 'e e'e eni. ho isi tibkoca, mo i'mi ho o'aihe taa'uzva; ho miko meelʉ bʉʉlʉlʉ, mo maica ho miko tmaa'uzo. at'inghi o'a teko bitano, la conino yaa etngou ci 'tohʉngʉ.

²¹ 'o couyutaya zou anana'osi ehti; ho o'aisieno peteongasa to hamo, tekos'aeno ma'unano tesi peteongasa suu?

²² i'mi tan'e tetocu honga, 'o hamo mo ma'cocacni. la maezo na'no mouyʉcʉ, mi'usnu tola m'evio ho smopcuku ci cou la mouyʉcʉ; mi'usnu suu, la ma'cocacni 'o hamo. hocikoc'o mako a'cʉ'cʉnʉ yunsou no himngonghisi; hoci o'te maica, tesi yaeza tibkoca suu.

²³ i'ocu 'o couyutaya, hoci o'te angu yameomʉ no o'te tmaa'uzo, tec'o meelʉ yuovei no ihe anana'va yac'i, maica tesi peelʉi i'vaha cnguhneni to hamo.

²⁴ na suu couyafana te peelʉi epo'usa to isi tibkoca ci ehti no 'olivu no yʉn'ʉ, mo nakvo'a ho cnguhneni tomo ʉmnʉ ci evi no 'olivu. 'e couyutaya mo mais'a 'o oho peoʉlʉlʉa ci evi; i'o ohsi tibkoca to hamo ta evisi ci ehti hocisi i'vaha cnguhneni ta anana'osi evi, 'ates'aeno sonʉhe?

'o himngonghi to hamo te nongabo ta yatatiskova

²⁵ maanat'ohaesa, panto conci moumsʉ'eonʉ ci so'emio, os'o tata'za hocimu cohivi, temus'a conino ma'unano mimu iachi mau'to'tohʉngʉ. 'e so'emio eni zou: mo apaevai yameomʉ 'e cou'isolaelu, tec'o totea ho tac'u acʉhʉ ma'hi'usnu to hamo 'o couyafana.

²⁶ ac'ʉhʉ ho mio acʉcʉhʉ 'o cou'isolaelu 'atena ahtao'te to'usni. aʉlʉ mais'a 'o isi yainca to seiso: 'o leto'usnu te i'mi ne sii'an ho yuyafo; tesi saapayo'a 'o kuisi to mʉntʉ'ca to yakovu.

²⁷ yainca to hamo: 'aeno eni 'o tamza yupa p'eyac'a ci esvʉta; ho mio ta'u peteongasa 'o kuisihe.

²⁸ 'e couyutaya mo bʉʉpsʉpsʉ to fukuin, cu yupa nahanga 'o hamo, na atotaveisi isi poa elʉ ta ʉmnʉsi 'e couyafana. at'inghi, i'mi no hia epei to hamo, maezo i'tohungu no ohsila teomneni to hamo no nia maameoi, 'e couyutaya isic'on'a a'cʉ'cʉna nanghianeni to hamo.

²⁹ maica. na epei ho ina mengumi to hamo o'amo ahtu aezuhu.

³⁰ ne noana'o 'e couyafana o'amohmula meo'uzo to hamo; maitan'e mimu nomio no o'te meo'uzo to hamo 'o couyutaya, mimucu apuyu elʉ no ngohia to hamo.

³¹ totiski, maica ho mimu elʉ no ngohia, 'o couyutaya mo o'te meo'uzo maitan'e, 'aisieno akoeva no yaeza poa elʉ no himngonghi to hamo maitan'e.

³² 'o hamo isi acʉha poekotva no taico no o'te meo'uzo 'e yatatiskova, tesi ko'ko mi'usni ho epa'teni na himngonghisi.

tohmomoengʉ to hamo

³³ a'ʉmtʉs'a atngaso na mengumi to hamo! na moutʉs'ʉ ho ina mau'to'tohʉngʉsi a'ʉmtʉs'a moumsʉ'eonʉ! siya nate meelʉ esansano no lasi hia buhsʉftʉ? siya nate meelʉ bohtothomʉ no ceonʉsi?

³⁴ aʉlʉ mais'a 'o isi yainca to seiso: siya namo bochio no 'tohʉngʉsi? siya nate i'tatfʉngʉ ho ta'to'tohʉngveni?

³⁵ siya na mosola mofi no cuma, ho o'te peelʉi poa peʉezeni?

³⁶ maica 'e acʉcʉhʉ mo i'mi ta iachisi, ieni ta iachisi, noovei ta iachisi, na psoevohngʉ ta'usna'sio to hamo, ac'ʉhʉ no 'auesiesi! 'aamen.