looma 10 - buacou seiso no faeva esvʉtʉ

¹ maanat'ohaesa, la'u a'ʉmtʉ cuveu ci 'tohʉngʉ ho tata'za ta 'tohʉngʉ'u hoci meelʉ noa to'usni 'e 'oahngʉ'u ci 'isolaelu, yaeza nomzi 'emo maica ci hi'hioa ho o'te tosveni eoho'neni to hamo!

² te'o peelʉi soomei ho lahin'i a'ʉmtʉ cuveu ci 'tohʉngʉ ho mi'usnu to hamo, at'inghi 'e cuveu ci 'tohʉngʉhe. ma'imo i'tohungu no a'ʉmtʉ mau'to'tohʉngʉ.

³ o'aihe asansana na moulʉlʉ to hamo. mici iachi biebimi no tehe ceonʉ, ho o'te meo'uzo to moulʉlʉ to hamo.

⁴ a'ʉmtʉsi, isicu aepʉnga to kilisto 'o hoolicu, poacu coumoʉlʉlʉ 'omo afu'u tmaa'uzo ci cou.

faeni ta yatatiskova 'e mengumi no to'usnu

⁵ e'usna tola boemi no meot'ʉcʉ to hoolicu ho elʉ no coumoʉlʉlʉ, moso maica 'o nia hia tmopsʉ to moose: <'omo meot'ʉcʉ to mashʉyʉ to hoolicu ci cou te i'mi to hoolicu ho yaansoua.>

⁶ at'inghi, na hi'hioa no i'mi no tmaa'uzo ho meelʉ coumoʉlʉlʉ, mo maica 'o e'e to seiso: <'ote invonvo tuocosʉ: siya nate uhne pepe? (tee yaeza yainca. usa ho hafa ohpueho 'o kilisto.)

⁷ yaeza teav'a tuocosi: siya nete uhne vooecʉvcana? (te yaeza yainca, i'mi to mcoi ho e'eafi 'o kilisto.) >

⁸ na e'a'ausna ta maee'e tan'e zou: <'o e'e to hamo o'anamo nomcovhi suu, micu yonta ngayosu, yonta 'tohʉngʉsu.> hoci eezuha, ci'amoeno no'ayumonʉ ta imza epeaska cimo e'usnu no tmaa'uzo ci e'e.

⁹ hociko esansana ta ngayosu 'o iesu ho zou nooe'oca, taa'uzva ta 'tohʉngʉ 'o hamo ho isi i'mi to mcoi 'o iesu ho poa smoevovei, mikocu elʉ no to'usnu.

¹⁰ hoci maica nate hia tmaa'uzo ta 'tohʉngʉ, tec'u coumoʉlʉlʉ, maica nate hia esansano ta ngayo, tec'u to'usni.

¹¹ yainca to seiso:

¹² 'e e'e eni mo mi'usnu ta acʉcʉhʉ ci cou, maica o'a isi ah'una na couyutaya ho couyafana; 'o hamo zou nooe'oca ta yatatiskova, tesi at'otngasa ho fii no ʉm'ʉmnʉ namo afu'u eyoho'ʉ ci cou.

¹³ aʉlʉ mais'a 'o isi yainca to seiso:

¹⁴ at'inghi, ho o'aihe taa'uzva, te mainenu hoci eyoho'ʉ to hamo? ho o'amo tmalʉ, te mainenu hoci tmaa'uzo? ho o'aisi psoyaska, te mainenu nate hia tmalʉ?

¹⁵ hoci o'te popeosmuhnu, teeno meelʉ psoyaski? aʉlʉ mais'a to isi yainca to seiso:

¹⁶ at'inghi. o'amos'a acʉhʉ tiou to fukuin 'e cou. ohsila yainca to 'izaya:

¹⁷ peelʉi aiti tan'e na tmaa'uzo mo i'mi no tmalʉ, na tmalʉ mo i'mi no e'e to kilisto.

¹⁸ at'inghi te'o tuocosi: ihenana a'ʉmta o'temocu tac'ʉhi na e'e? ci'a ohecueno talʉi. aʉlʉ mais'a 'o isi yainca to seiso: 'o fihngauhe micu psoengabo ta yatatiskova; 'o e'ehe micu psoecʉ'ho ta mauhpuhpusu.

¹⁹ te'o i'vaha tuocosi: ihenana a'ʉmta o'te cohivi ta cou'isolaelu? ahoisi, 'o moose ohsila titheni to e'e to hamo ho yut'inga eni: te'o boemi to ci oko ho poa smo'eubut'u muu, boemi tomo nongonongo ci hpʉhpʉngʉ ho asʉsʉ'nova muu.

²⁰ mo asuhcu emeoisi 'o 'izaya ho yainca: te'o poa elʉ a'o 'o o'a mosola biebimi a'o, aopa'to to o'amosola eyoho'ʉ a'o ci cou.

²¹ at'inghi e'usna ta cou'isolaelu, isi yainca: la'u conino ho'usneni 'e emucu'u, mici mi'usnu tomo yutasufku ho 'ʉteʉ ci cou ho enanaovei.