kolosai 4 - buacou seiso no faeva esvʉtʉ

¹ i'omo tauke ci cou, la ahmʉskʉ auseoseolʉ ho mi'usni na soskuskunumu, maica imu cohivi, mimu maezo yaa cihi ci tauke ne pepe.

poucufnu ci e'e

² temula asno'zonʉ 'inoli, a'vinano aʉtʉs'ʉ, mi'usnu to hamo ho yaa 'aveoveoyʉ ci 'tohʉngʉ.

³ la yaeza 'inolineni a'mi, p'enzeni to hamo ho pafi no 'oc'ocic'o ci hie ho psoyaska 'e fukuin, ko'ko peelʉi psoecocoya 'e moumsʉ'eonʉ to kilisto. maitan'e mi'o nomio tan'e ho noekotu.

⁴ temu'so 'inolineni a'o, te'o peelʉi pnanfi na os'o sviei ho pahsansana 'e moumsʉ'eonʉ eni.

⁵ ho lamu noteuyunu to o'ala tmaa'uzo ci cou la bumomoʉtʉs'ʉ, la tiuseoseolʉa na 'oc'ocic'o.

⁶ hola ya'ei la ema'cocacni ho mangeci, la co'cohivi nate hia yut'ingi ho lahe tuucocosi to mo macicihi ci cou.

sotavei ci tuayokeo

⁷ na acʉcʉhʉ ci a'a'ausna'u ho mi'o yontan'e, 'o songohia ci tuiciku tenasi mi'usneni muu ho esansana eʉsvʉsvʉta. zou a'ʉmtʉs'a meot'ʉt'ʉcʉ ci soskuskunu, tala hioa ta fifiho to nooe'oca mimza iepoepohʉ soskuskunu.

⁸ os'o afnasa skuna ho popeo'usna ta lamu yoni, eʉsvʉsvʉta na a'a'ausnamia tan'e, te poa elʉ no poucufnu na muu.

⁹ mo to'ofeihni 'o cihi cimo maezo meot'ʉt'ʉcʉ ci 'anisimo; zou yata lamu yoni ci cou. tahe acʉha eʉsvʉta tamo yoso 'e hi'hioa tan'e.

¹⁰ 'e isi po'upa a'o ci 'alitaku te maezo mi'usnu muu ho tuayokeo. 'o pop'ehaesa to panapa ci maluko maezo tuayokeo muu. (e'usna ta maluko, o'ucula eutotaveiya muu. hoci la uhta lamu yoni temu'sola aʉt'ʉt'ʉca.)

¹¹ 'o ihe tos'ongki ho poa yusutu ci ieso mo maezo mi'usnu muu ho tuayokeo. to 'ayumona ta sinto ta couyutaya, 'emoc'o tuyu namo i'upu a'o ho yaahioa ta hpʉhpʉngʉ to hamo, mo a'ʉmtʉ meoino to'usnu a'o.

¹² 'omo i'mi ta lamu yoni ci 'ipafu mo tuayokeo muu; zou maezo soskuskunu to kilisto iesu. lasi asngʉcva asno'zona 'inolineni muu, mi'usnu to hamo ho p'enzeni no mahtʉicʉ ci singkoo na muu, meelʉcu yʉepʉngi ci kilistoto, a'sʉftonʉ meot'ʉt'ʉcʉ no 'tohʉngʉsi.

¹³ lasi nomzi muu, yaeza nomzi 'o sinto ne lauticia ho silapoli ho peihtutumzo yaahioa; na eni te'o peelʉi iachia 'akasi.

¹⁴ 'emo yoso ci sonanghiato ci leaotothomʉ ci luka ho tima mo maezo tuayokeo muu.

¹⁵ temun'a mi'usnu to maanat'ohaesa ne lauticia, ho ninfa, ho ito mo yonto emoosi ci kiokai ho tuayokeo.

¹⁶ ho tamucu engha 'e tengami eni, tenamun'a yoezuhneni to kiokai ne lauticia ho poa engheni; tamu yaeza engha 'ote i'mi ne lauticia ho yoezuhneni muu ci tengami.

¹⁷ tamu eʉsvʉta to 'acipu, na ohsi tiova ci tesi hioa homo fifiho to nooe'oca la pnanfi na tonʉ ho aepʉnga.

¹⁸ te'o iachi boemi ta emucu'u ho tposi: teav'a ta'payo'a isin'a seo'eisi ta ekʉka a'o. pafi'sio no mengumi to hamo na muu!