kolosai 2 - buacou seiso no faeva esvʉtʉ

¹ os'o tata'ia no poa cohivneni muu, nomzo muu ho ito coulauticia, ho i'o botngonʉ ci o'amocu o'u la aiti ci cou, la'u pnanfi na 'tohʉngʉ ho tonʉ ho yaahioai.

² te'o poa elʉ no poucufnu, meelʉ boemi no himngonghi ho tmuteuyunu, i'mi nomo bocbochio bohbohngʉ ho cmʉfeʉ ci singkoo ho honga na moumsʉ'eonʉ to hamo; 'e moumsʉ'eonʉ eni. 'ai'oeno feango to kilisto.

³ zou 'oyomzana maavo no ohsi la afu'a siya to hamo ci moutʉs'ʉ ho mau'to'tohʉngʉ.

⁴ ho os'o e'e eni, temu o'te noa boemi no ecocohʉmʉ ci e'e ho e'usna nomo emopeu ci ceonʉ.

⁵ e'vono o'a mo no'upu muu 'e feango'u, at'inghi co 'tohʉngʉ'u la asngʉcʉ no'upu muu. mi'o na'no kaebʉ, peelʉi aiti ho lamu meot'ʉt'ʉcʉ, a'vinano namo mi'usnu to kilisto ci singkoo micu yaa mahtʉicʉ ci io'tohungva.

h'aucucunu ci nsou to 'ayumona to kilisto

⁶ ho imueno tiova ho nooe'oca 'o kilisto iesu, temu asansana sotaica no lamu peipeis'ausna.

⁷ yonto 'ayumonasi ho biemisi, yusuhci. p'eyac'a na singkoo, 'amoeno maica na lamu tiova ci mo'ma'cohio; temu yaeza poa ngangcʉngcʉ na 'aveoveoyʉ ci 'tohʉngʉ.

⁸ temula bumemealʉ, teav'a poa e'eʉngceni ta mo sveepʉ ci motposʉ; maica 'emo maica ci motposʉ, lac'o psoecingcingha ta cou, mo i'tohungu ta nana'so moipiepiya no macocongeoha ta mouhpʉhpʉngʉ, o'a mo i'tohungu to kilisto.

⁹ maica ina h'aucucunu ci yu'ausna to hamo. mo acʉhʉ yonto 'ayumona to kilisto.

¹⁰ mimu yupa cmunghu 'o kilisto, maezo mayo no atngaso ci nsou. zou papoevʉ, tosa'ohe to acʉcʉhʉ cila titutuhcu le'aʉt'ʉcʉ ta moipiepiya.

¹¹ mimucu yono nsou to kilisto ho noa s'e'honga; 'e s'e'honga eni o'a isi hioa ta cou, ma isi hioa to kilisto ho poa mongoi no yu'ausna no kuisi ta feangoto ci s'e'honga.

¹² maica, ne mohmu tiou to toonono, ohcu su'upa efo'a to kilisto na muu; ne mohmucu tiou to toonono, yaeza ieni no tmaa'uzo tomo poa smoevovei to kilisto ci hi'hioa to hamo ho maezo to kilisto ho smoevovei.

¹³ ne auyusi, maica mohmun'a yaa yu'ausna no kuisi, a'vinano uk'a hoolicu ci couyafana, hoci tamza no piepiya mimu mcoi. at'inghi, 'o hamo isi poa smoe'upu smoevovei to kilisto na muu. isi peteongasa na nia afu'uto kuisi,

¹⁴ saapayo'a i'ote afu'u koa kuzo a'to, mufutu a'to ci isi tatoyangzi to hoolicu ci nia kuisi. isi spica to zuuzika ho aapayo'a.

¹⁵ yonto zuuzika, isicu iachia yunga to kilisto ina tonʉ tola titutuhcu ho le'aʉt'ʉcʉ ta moipiepiya, isi holeo ho paata'zeni tamo botngonʉ ci cou.

¹⁶ ko'koeno, teav'a poa ta'poe'eni to 'oesvʉtʉ no eabobonʉ, homeesia, meefeohʉ, hocieno 'ansokunici na muu.

¹⁷ 'e acʉcʉhʉ eni mac'o ongko to tena hi'hioa ho noana'o, 'ai'oeno kilisto 'o a'ʉmtʉsi feango.

¹⁸ teav'a poa ti'eingneni tola mais'amo afnaso smo'eumcovhi, meeeinu ho m'ohkuyu to tensi ci cou na ntohmu yaa ci hnoo. lac'o fiho ta ma'ankʉ ta cou, aha'o na'no bobitano.

¹⁹ cu antʉhʉ 'o hia yupecnguhu to kilisto. na a'ʉmtʉsi, inac'o i'mi ta fnguu ta feango, 'ai'oeno kilisto, niante meelʉ mayo no konansou, ieni to yupa tʉyʉcʉ 'e ma'vo'vokʉ maveoveocʉ ho yuecngucnguhu, maino 'tohʉngʉ to homo ho ausuhcu yusuhci.

i'upu to kilisto ho yunsou ho mcoi

²⁰ ho mimucueno tu'upu to kilisto ho mcoi, momeesih'i no moipiepiya ta macocongeoha, mainci mimuc'on'a fiho ta h'oyunsova ta cou, a'cʉ'cʉna noʉt'ʉci na 'emo maica ci peipeisia?

^21-22 'emo maica ci macucuma hocic'u afu'a titha cu aepʉngʉ, maica 'ac'oeno'so 'oesvʉta ho 'oma'cohioa ta cou.

²³ ho isi huuskoskopi, 'emo m'ohkuyu no tensi, meeeinu, iachia poa 'atutumzo 'e feango, mais'a mo peismau'to'tongʉ ci hioa, hoci e'ofeihna na a'ʉmtʉsi, ieni tan'e ho 'ucia atʉkca na ma'cac'ou ta feango. uk'a ci ake'isi a'a'ausna.