kolosai 1 - buacou seiso no faeva esvʉtʉ

¹ zou poolo a'o; mi'o fiho to 'tohʉngʉ to hamo ho sitoo to iesu kilisto. na a'o ho i'e nat'ohaesa ci temote.

² tmopsʉ ta tengami ho faeni ta mimu yonta kolosai ci sinto, 'aeno 'o mimu meot'ʉt'ʉcʉ to kilisto ci maanat'ohaesa. pafeni'sio muu to hamo na mengumi ho soanonosi!

to'aveoveoyʉ ci 'inoli

³ ho la'u 'inolineni muu, lamia asngʉcʉ 'aveoveoyʉ to hamo, 'aeno 'o amo to nooe'oca iesu kilisto;

⁴ maica lamia tac'ʉhi ho mimu a'ʉmtʉ yaa singkoo ho mimu mi'usnu to iesu kilisto, lamu yaa himngonghi ci 'tohʉngʉ ho lamu mi'usnu to afu'u sinto.

⁵ to ahoisi, ne ohcu psoecʉ'ha muu 'e fukuin, imucu talʉi 'e isi hafa ta fukuin ci ta'usni. maicac'o, ina singkoo ho himngonghimu mo acʉhʉ i'tohungu ta isi songacveni muu ne pepe ci ta'usni.

⁶ 'e fukuin eni o'aisi anova psoecʉ'ha muu, isi yaeza psoengaboa ta mauhpʉhpʉngʉ, asngʉcʉ yusuhci ho beahci, aʉlʉ mais'a ne ohmun'a ahoza tac'ʉhi hocu a'ʉmta honga 'o mengumi to hamo, mo totiski yusuhci ho beahci.

⁷ mimu i'mi to sonanghia'u ci 'ipafu ho momaemaezo ta fukuin tan'e; mo nomzo a'mi ho meot'ʉcʉ ci soskuskunu to kilisto.

⁸ 'a i'oeno 'ipafu 'omo eʉsvʉtʉ a'mi ho isi fii no himngonghi ci 'tohʉngʉ no seilei na muu.

⁹ i'mi tan'e, ahoi ne omzacu tac'ʉhi na a'a'ausnamu, lamza o'te tosveni 'inolineni muu, m'eya tonʉ to hamo poa'so i'mi no seilei ho mayo no mav'ov'o ci moutʉs'ʉ ho bocbochio, peelʉi a'sʉftona honga na 'tohʉngʉsi.

¹⁰ maicac'o, ina h'oyunsovamu tec'u meelʉ toseolʉ no 'tohʉngʉ to nooe'oca, aa'pucva poa ʉm'ʉmnʉaneni. a'vinano, te meelʉ yonta h'oyunsovamu ho beahci no mo mav'ov'o yonghu ci beahci, na hia bohngʉ to hamo te maezo apuhngu.

¹¹ temusola i'mi to psoevohngʉ ci tonʉsi ho mayo no mahtʉicʉ ci tonʉ, yaa luaveica ci 'tohʉngʉ ho tiova 'e acʉcʉhʉ. la boemi no kokaekaebʉ ci 'tohʉngʉ ho

¹² 'aveoveoyʉ to amopepe, maica ho isi poa yaa ongko no tma'upu no ohsila songacveni no sinto cimo ʉm'ʉmnʉ to 'ayumona to tiskova ci hpʉhpʉngʉ na muu.

¹³ isi to'usni a'to ho poa momeesih'i no tonʉ no voecʉvcʉ, poa noskufu no tonʉ to songohia ci okosi ho poa yunsou a'to.

¹⁴ ieni to songohia ci okosi, mito mayo no ziu - 'e kuisito isi peteongasa.

'o kilisto ho i'o lasi hioa

¹⁵ 'o kilisto zou mi'ausnasi to o'alato teolʉi ci hamo, mo tosa'ohe ta acʉcʉhʉ pehoza ci oko.

¹⁶ ieni to kilisto, ohsi teyai to hamo 'e acʉcʉhʉ ta pepe ho ceoa: 'ela teolʉi ho o'te teolʉi, a'upu namo yusuhngu no suoca'ha, tituhcu, aʉt'ʉcʉ ho mʉpʉtʉ no tonʉ ta moipiepiya, ieni to kilisto. maezo nomzo to kilisto. ohsi teyai to hamo 'e mouhpʉhpʉngʉ.

¹⁷ 'o kilisto mo auyuhe yayo ta aʉcʉcʉhʉ; 'e acʉcʉhʉ moc'o maezo noe'ocʉ to kilisto ho p'eyac'a.

¹⁸ zou fnguu ta kiokai, ci'aeno fnguu ta feangosi; isi i'toekui ta faeva ci nsou. zou pehoza ci oko, ahoi i'mi to mcoi ho smoevovei, na atuhcusi te sutmoyaevonʉ ta acʉcʉhʉ.

¹⁹ isi iachia esvʉta to hamo ho poa yaa noemʉhʉ ci yu'ausna ta iachisi mi'a'ausna 'o okosi.

²⁰ ieni ta oko, 'o hamo isi iachia esvʉta no i'vaho naovei 'e mouhpʉhpʉngʉ. isi ieni to mcoi to zuuzika 'o okosi ho aepʉnga na suseomʉ. i'vaha poa tma'usnu to hamo 'e aʉcʉcʉhʉ ta pepe ho ceoa.

²¹ ne auyusi, mohmula nomio no kokuzo ci koyu ho ino peipeis'ausna hocu namcovha 'o hamo, cu hangʉ to hamo.

²² maitan'e, ieni to mcoi to feango to okosi, isicu nanghianeni to hamo na muu, akoeva no poa yonto tuhcusi ho socofkoya, uk'a heo'tʉ, uk'a 'eongʉ no koica.

²³ temu asansana ayʉca na singkoo, bʉʉlʉlʉ ta mo mahtʉicʉ ci i'tohungva; teav'a teongasi na ohmu ta'usni ne mohmun'a ahoi tiou ta fukuin. maitan'e, 'e fukuin eni micu psoengabo ta mauhpʉhpʉngʉ; na a'o - poolo. 'aeno soskuskunu ta fukuin tan'e.

'o lasi hioa to poolo

²⁴ maitan'e ho la'u 'atutumzeni muu mo ma'kakaebʉ ci hi'hioa; maica homo 'atutumzo 'e feango'u, mais'a os'o ticngiha 'o nia 'atutumzo to kilisto ho ohsila 'atutumzeni 'e feangosi - 'ai'o ohsieno uveica ho o'temocu aepʉnga ci 'atutumzo ta kiokaisi.

²⁵ nomio note koa ʉmnʉ muu, isi toveineni a'o to hamo 'e hioa eni, poa soskuskunu ta kiokai a'o. 'e hioa eni tesi a'sʉftona poa psoyaskeni a'o 'e fukuinsi,

²⁶ 'ai'o isieno acngucnguha mi'usneni ta yatatiskova ho sootoefʉnga ci moumsʉ'eonʉ; 'e moumsʉ'eonʉ eni. isicu sopopayoa ta mao'o'okosi maitan'e.

²⁷ 'e isi ta'kokoeva to hamo tesi poa cohivneni ta 'o'okosi, 'emo at'otngaso ho psoevohngʉ ci moumsʉ'eonʉ 'ateeno epa'teni ta yatatiskova. 'e moumsʉ'eonʉ eni 'aeno: mo yonta nsoumu 'o kilisto. tee yainca, mimu tma'upu no psoevohngʉ to hamo.

²⁸ i'mi tan'e, mimza mi'usnu ta afu'u cou ho psoyaska 'o kilisto, boemi ta mav'ov'o ci moutʉs'ʉ ho kokoica ho po'pa'cohivi muu, akoeva no 'ucia poa yʉepʉngi ci sinto 'emo macicihi, hafa uhto tuhcu to hamo.

²⁹ nomio ta isi mituhci tan'e, os'o titha 'e isi pafeni a'o to kilisto ci meoino no tonʉ, o'te bʉʉpsʉpsʉ no ngoseo, 'aanana'o yaahioai.