kolinto 2 7 - buacou seiso no faeva esvʉtʉ

¹ ngohia ci maananghia, ho mitocueno yaa maica ci teomneni, nteto poa cofkoya 'e iachi, toonva namo afu'u koa ca'i ta feango ho piepiya ci hi'hioa, yono einu to hamo ci h'oyunsova ho ohcʉ'ho no socofkoya.

kokaekaebeni to poolo

² temu'so boemi no cocoya ci 'tohʉngʉ ho tiova a'mi. o'a momza ahtu peis'usnu note koa 'oha ʉmnʉ no mocmo ci hi'hioa; uk'a ci imza akuzkuzoa ci siya, maezo uk'a ci omzala epuka.

³ homo maica co e'e'u, o'a os'o koica muu. o'ucula yainca, lea mainenu na lamza hia ngohia muu; temza kaebʉ hocito toehungu yaansou ho toehungu mcoi.

⁴ os'o asansana taa'uzva muu, a'sʉftona emomoengʉa muu. yontomo mav'ov'o ci 'atutumzo, mi'o a'sʉftonʉ noa ao'pou, nongcʉngci no kokaekaebʉ.

⁵ ataveisi no sʉc'ʉhʉ ne makitong, o'amimza h'unano cu amzocni. angabo yupteilʉ to ngoveo, elʉ to youbobai, mo maezo yaa ngoheʉngeʉ ci 'tohʉngʉ.

⁶ at'inghi, i'ola poucufnu tola ma'sasmʉzʉ ci hamo isi ieni to tito ho poucufna a'mi.

⁷ o'amo anouc'o uhtan'e, mion'a mi'usnu a'mi ho eʉsvʉta na hiasi i'mi muu ho mayo no poucufnu, ho ina lamu hia tongsoya hocimu ahta aiti a'o, mainenu nala hia nac'o, ho ina hiamu eto'usni a'o; acʉcʉhʉ eni isi h'unano topuhngi na hia'u kokaekaebʉ.

⁸ e'usna to o'ula aueva faeni muu ci tengami, 'upena hoci ohsila poa nac'o na 'tohʉngʉmu, o'ate'o ta'susuaeza. nenusi no te'o i'mi ho os'o cohivi 'o tengami ic'o isi asona akameosa poa nac'o muu ho ake'i ma'susuae.

⁹ at'inghi, mi'o na'no kaebʉ maitan'e, o'as'a ho os'o poa nac'o na muu, ma homo i'mi no nac'o ho aezuhu na 'tohʉngʉmu. isi tiseolʉa to hamo na nac'omu, i'mi tan'e te peelʉi yainca i'e imza hioa o'aisi alolonga muu.

¹⁰ 'o hamo isi titha 'e nac'o ho aezuha 'e 'tohʉngʉ ta cou, ho to'usni 'e cou; na eni o'ate namaci ta'susuaeza! at'inghi 'emo tma'usnu ta hpʉhpʉngʉ ci ma'tipvongʉ tesi poa mcoi 'e cou.

¹¹ temu aiti, 'o hamo isi yainenu na hia tiseolʉa na nac'omu, poa 'aumeumeusu no eto'usni 'e iachi, a'vinano pa'teni na sohsohpoi no mici peis'ʉ'ʉmnʉ, aʉtʉs'ʉ, mingeou, meot'ʉt'ʉcʉ, koicʉ no 'oha peislʉlʉ! yontamo mav'ov'o lamu soomei na lamu hia peihcocofkoya.

¹² ko'koeno, os'o e'vono tposi 'o tengami ic'o, at'inghi o'aos'o tposneni tola peis'epo ci cou, o'aos'o h'unasa tposneni tola noa efkica ci cou. apuyu, 'o atuhcusi ho os'o tposi 'o tengami, te'o eʉsvʉta nala hia cuveu ci 'tohʉngʉ ho lamu mi'usnu a'mi.

¹³ mimza i'mi tan'e ho mayo no poucufnu. o'amo anouc'o maica, 'o kaebʉ to tito isi asuhca topuhngi 'e kaebʉmia; maica ho mimu acʉhʉ to'usnu ho poa kaebʉa 'o tito.

¹⁴ o'ula mi'usneni to tito ho emomoengʉa muu, o'a imu poa ma'kokoe'i a'o. lamza conino eʉlʉ ho lamza mi'usnu muu; totiski, 'o imza mi'usneni to tito ho emomoengʉa muu ci e'e. yaeza asansana ho mio emzo.

¹⁵ ko'koeno, cono ho lasi talʉa to tito mo mainenu na lamu hia meot'ʉt'ʉcʉ, mainenu na hia boemi no 'ae'aenguzu ci 'tohʉngʉ ho aʉt'ʉt'ʉca, na 'tohʉngʉ nosi ngohia muu cu asuhcu man'i.

¹⁶ mo mainenu co hia'u kaebʉ maitan'e, maica te'ocu peelʉi a'sʉftona taa'uzva muu!