kolinto 2 6 - buacou seiso no faeva esvʉtʉ

¹ lasi toehungneni yaahioa to hamo a'mi; temia poucufna muu: afu'u cueno tiou to mengumi to hamo, teav'as'a poa peis'afeungu 'e mengumi eni.

² maica isi yainca to hamo: ta hiesi non'a tiova. te'o talʉi suu; ta hiesi non'a to'usni. te'o to'usni suu. talʉi'sio, maitan'e 'acueno hiesi no tiova na mengumi to hamo! maitan'e 'acueno hiesi no to'usni to hamo!

³ o'aimza ʉmnʉa hoci ekuzkuzoa no mocmo 'e lamza hia fifiho, ko'koeno maezo o'atemza nomʉmʉtʉ no mocmo.

⁴ nomio no yonta acʉcʉhʉ ci hi'hioa ho epa'teni ho zou soskuskunu to hamo a'mi, lamza buveici tamo mav'ov'o ci 'atutumio, thi'cia, ngoseo.

⁵ momzala noa ti'usna, poekotva, 'afeo'fu'a to yu'papak'i; lamza peisngoseo, o'te m'ov'ohʉ, ho sieo.

⁶ lamza boemi no cofkoya, mau'to'tohʉngʉ, buveici, ma'cocacni, afnaso i'tohungu to seilei. mou'ʉmtʉ ci himngonghi.

⁷ so'emio ci e'e, ho ito meoino tonʉ to hamo, epa'teni zou soskuskunu to hamo a'mi. mimza boemi to mou'lʉlʉ ho teyai soanothʉ, suyumo to hangʉ, yaeza noʉt'ʉci 'e iachi.

⁸ lamza noa einva, maezo noa aokoe'iya; noa koica, lea noa tohmomoengʉi. lahe yainca to mocmo totpiei a'mi. a'ʉmtʉsi mo eʉlʉ 'o lamia e'e;

⁹ la yainca uk'acila bohngʉ a'mi, a'ʉmtʉsi lahe toehunga cohivi ta ehuehungu; yainca mimzacu mcoi, a'ʉmtʉsi mimza yoayokeo ho yaansoua. lamza noa ti'usna, at'inghi o'ala opcoza;

¹⁰ la nac'o, at'inghi la asngʉcʉ yaa kokaekaebʉ; thi'cia, at'inghi la poa atngaso 'omo botngonʉ ci cou; mais'a mo uk'a, at'inghi mo noemʉhʉ.

¹¹ maananghia ta kolinto, la i'mʉs'onʉ ta 'tohʉngʉ ho esansano ya'ei ho lamza mi'usnu muu.

¹² o'a a'mi namo mhocni na 'tohʉngʉ, ma 'tohʉngʉ muu como mhocni.

¹³ ho mi'o mi'usnu muu ho ya'ei, la mais'a mi'o mi'usnu no iachi'u 'o'oko ho ya'ei: temula poa cocoya na 'tohʉngʉ. boemi ta lamza hia mi'usnu muu ci 'tohʉngʉ ho mi'usni a'mi.

etngoeva hoci uv'oha to h'unasi

¹⁴ 'ote toehungu to ngotohva 'o o'a mo tmaa'uzo ci cou. 'omo emzo ho kuzo teeno ahtu meelʉ tohmʉskʉ? 'o tiskova ho voecʉvcʉ teeno ahtu meelʉ noepohʉ?

¹⁵ 'o kilisto ho 'akuma teeno ahtu yupa toseolʉ? i'omo tmaa'uzo ho o'te tmaa'uzo ci cou cuma namo totiski?

¹⁶ 'o seiten to hamo ho uacoua teeno meelʉ biepohʉ yac'ʉ? zou seiten to no'auesiesi ci hamo a'to. aʉlʉ mais'a 'o e'e to hamo: te'o no'upu ta 'o'oko'u, yuavovei ta 'ayumonahe. tehe hamo ta 'o'oko'u; te'o ta'okoa na hin'i.

¹⁷ i'mi tan'e isi yainca to nooe'oca: temu mongoi ta ihe yoni, i'mi ta taicohe ho apaevai. 'ote aaso tomo 'oha cofkoya ci macucuma, te'ocueno tiova muu.

¹⁸ temu ta'amo a'o; te'o 'o'oko na muu. 'e e'e eni zou e'e'u - soyaa tonʉa ci nooe'oca.