kolinto 2 5 - buacou seiso no faeva esvʉtʉ

¹ ito cohivi, hoci eon'ozi 'e ito yoni ci teova ta ceoa, tesi fii no emoo ne pepe to hamo, isi iachia p'eyac'a ho 'auesiesi yayo.

² mito e'ʉyʉn'a maitan'e, tongtongsoya no noemʉemʉ no emoo ne pepe, mais'a yʉsʉ ho paceofa;

³ ho isicu paceofa, 'anateto ahtu yuamaesih'i.

⁴ mito yonta teova ta ceoa, mais'a mo smovei nomo ecvʉhʉ ho e'ʉyʉ; na eni o'aisis'a yainca te yungvo'a 'e feango ta ceoa, mate paceofa na mo tma'usnu ne pepe ci feango, ko'ko poa peʉezeni no nsou 'ete anana'o kuzo.

⁵ 'o hamo isi iachia ayoca ho poa suseolʉ tamo maica ci te aezuhu na a'to, isi pafeni 'o seilei ho titha hosoo a'to.

⁶ ko'koeno, lamza asngʉcʉ yaa a'sʉftonʉ ci 'ʉteʉ. imza cohivi, hocin'a afu'u yonta 'ayumona ta feango, temza nomcovhi to ohsi ayocneni a'mi to nooe'oca ci 'oyona.

⁷ maica ho mimza yaansoua. mimza noe'ocʉ no singkoo, o'aisi tamza ta isi teolʉi.

⁸ mimza yaa a'sʉftonʉ ci 'ʉteʉ, kaebʉhe hoci mongoi ta feango ta ceoa, ho no'upu to nooe'oca.

⁹ na atva'esisi, zou. 'upena hoci yonta feango ta ceoa, hocieno paceofa namo tma'usnu ne pepe ci feango, temza ma'koyu no noa ʉm'ʉmnʉa to nooe'oca.

¹⁰ maica 'atato ahtuo'te yac'ʉ to tuhcu to kilisto, tiou no yʉsvʉtʉsi. 'emo macicihi tena ieni no nia peipeis'ausna ta feango, ʉmnʉ hocieno kuzo, te tiou no evei.

ieni to kilisto ho naoveia 'o hamo

¹¹ ho itoeno cohivi te mainenu nate hia einu to nooe'oca, tec'u ieni tan'e ho poucufnu ta cou. isi a'sʉftona honga to hamo a'to; os'o tata'za hocimu i'mi no 'tohʉngʉ ho yaeza honga a'o.

¹² o'amimzas'a mi'usnu muu ho 'ucia i'vaha ho'feni 'e iachi, mate poa yaa 'o'emamzʉ no ko'ko etotofsi'ia a'mi, temueno yaa e'e ho yut'inga 'olac'o itanveni na yafana ho o'te huecvʉhʉa na ʉmnʉ ci 'tohʉngʉ ci cou.

¹³ hoci mimza a'ʉmtʉ eʉngcʉ, mamimza nomio to hamo ho eʉngcʉ; hocimza ma'tʉtʉs'ʉ, mimza nomio muu.

¹⁴ isi poucufna to himngonghi to kilisto a'mi, maica ho imza ta'sansana, 'emo cihi ho isi mcoineni 'emo botngonʉ, te peelʉi yainca cu acʉhʉ mcoi 'emo botngonʉ.

¹⁵ ho isi mcoineni 'emo botngonʉ, tesi akoeva no poa o'tec'o nomio no iachi 'e mon'a yaansou ci cou ho yaansoua, mate nomio to moso nomio a'to ho mcoi ho smoevovei ci kilisto ho yaansoua.

¹⁶ ko'koeno, 'anatemza i'vaho i'tohungu tala hia bʉhsʉftʉ ta cou ho hʉsvʉta 'e cou. momzala e'vono i'tohungu tala hia bʉhsʉftʉ ta cou ho aiti 'o kilisto, o'ana lamza i'vaho maica maitan'e.

¹⁷ 'upena na siya, hocic'u afu'u yayo na nsou to kilisto; zoucu faeva ci cou. micu sucaefi 'omo noana'o. micu esmi 'emo faeva.

¹⁸ 'e acʉcʉhʉ eni zouc'o acʉhʉ hi'hioa to hamo; isi ieni to kilisto ho poa naoveia na a'to ho i'o hamo, yaeza faeni a'mi 'e psoyaski no fukuin no naoveia.

¹⁹ i'o imza psoyaska ci e'e 'aeno: 'o hamo isi ieni to kilisto ho p'eyac'a na yupa naoveia ci natʉ'ca ta yatatiskova. o'aisi peteohʉhʉya na kuisihe. a'vinano isi toveineni a'mi 'e e'e no yupa naovei.

²⁰ ko'koeno, mimza afnaso ci soskuskunu to kilisto. isi iachia ieni a'mi to hamo ho poucufna muu: temza mi'usnu muu ho p'enzeni 'o kilisto, poa naovei muu 'o hamo.

²¹ uk'a ci kuisi to kilisto, at'inghi isi nomzi a'to, 'o hamo isi poa ngoeveni to kilisto 'e kuisito, poacu meelʉ i'mi to kilisto na a'to ho yaa naseolʉ ci natʉ'ca to hamo.