kolinto 2 4 - buacou seiso no faeva esvʉtʉ

no'ayumonʉ ta kavo'oe ci h'onunua

¹ ho isieno coveoza to hamo a'mi, toveineni a'mi 'ete hioa, o'a na temza ma'sasmʉzʉ.

² imza acʉha hopsʉpseni 'ola afu'u nootoefʉngʉ ho h'oinveni ci hi'hioa, o'ala hioa 'omo moezʉezʉhʉ ci hi'hioa, yaeza o'ala eknon'a 'o e'e to hamo. yonto tuhcu to hamo. lamza epopayoa 'e so'emio, ieni ta iachi peipeis'ausna ho paavi na ʉmnʉ ci 'tohʉngʉ ta macicihi.

³ 'upena hoci ngoveo cohivi 'e imza epeaska ci fukuin, 'ai'oc'o 'ote emo'usnu no meaapayo'ʉ ci cou 'omo o'te tma'hongʉ.

⁴ 'emo maica ci cou homo o'te tmaa'uzo, mo maica ho isi poa bʉkngʉ ta hicu ta hpʉhpʉngʉ na mcoo no 'tohʉngʉhe, poa o'te bohngʉ no tiskova ta fukuin; 'e fukuin isi engha 'omo natʉ'ca 'o psoevohngʉ to kilisto, 'o kilisto 'aeno a'ʉmtʉsi mi'ausna to hamo.

⁵ 'e imza psoyaska o'as'a 'e iachi, i'o lamza psoyaska ; nomio to iesu, mimza noa soskuskunu muu.

⁶ i'omoso mainca ci hamo. 'aeno maezo i'omo boemi to tiskova ho psoetiskovi 'e 'to'tohʉngʉto ci hamo; isi poa bohngʉ no psoevohngʉ to hamo a'to, psoe'usna to sapci to iesu kilisto.

⁷ at'inghi, 'emo yaa h'onunua no tma'usnu no piepiya ci a'to. mamoc'o mais'a ko'cacuma ci kavo'oe, te akoeva no 'akasi na uk'a noca'cʉ'hi ci tonʉ mo tma'usnu to hamo, o'amo tma'usnu a'mi;

⁸ mimza elʉ tamo mav'ov'o ci ngoveo. at'inghi o'a isi peoz'oz'i; asngʉcʉ yaa ma'tipvongʉ. at'inghi o'ala ma'papayo'ʉ;

⁹ yaa botngonʉ ci hangʉ, at'inghi la coni no yaa nanghia; la siho t'opui, at'inghi o'ala yaa kuzoa.

¹⁰ 'ete kuzo ci feangomia la asngʉcva hafa 'o mcoi to iesu, akoeva no yaeza poa husansaneni ta feangomia na nsou to iesu.

¹¹ 'e conomza yunsou, asngʉcʉ nomio to iesu ho mita isi sokoeva no mcoi, akoeva no poa hupopayoneni tate kuzo ci feangomia na nsousi.

¹² 'ateeno yainca na eni, lamia asngʉcʉ mi'usnu ta mcoi, temu ko'ko i'mitan'e ho elʉ no nsou.

¹³ yainca to seiso: i'tohungu tamo totiski ci singkoo, imza taa'uzva, ko'ko imza yaeza psoyaska.

¹⁴ imza cohivi, i'o moso poa smoevovei to nooe'oca iesu ci hamo 'atasi ahtao'te yaeza poa i'upu to iesu ho poa smoevovei a'mi, a'vinano hafa a'mi ho ina muu ho toehungu uhto tuhcu to hamo.

¹⁵ 'e acʉcʉhʉ eni moc'o acʉhʉ nomio muu, teeno meelʉ cmʉ'ho tamo asuhcu botngonʉ na mengumi to hamo, meelʉ asuhcu botngonʉ nate mofi no e'aveoveoyʉ, ho sopopayoa na psoevohngʉ to hamo.

noe'ocʉ no singkoo ho yaansou

¹⁶ ko'koeno, o'a lamza ahtu ma'sasmʉzʉ. 'e yafana ta feangomia la e'vono ausuhcu suhcʉhcʉ, 'e nsou ta 'ayumonamia mo huhucmasi yufafaeva.

¹⁷ 'e imza yupteilʉneni ci moc'o akameosʉ ci 'atutumio, tesi hafneni no o'ate peelʉi ta'cʉ'ha ci 'auesiesi psoevohngʉ.

¹⁸ o'aimza nama siya ta 'tohʉngʉ 'e isi teolʉi ci hi'hioa, imza siyahe ta 'tohʉngʉ 'e o'aisi teolʉi ci hi'hioa. 'e isi teolʉi moc'o akameosʉ; 'o o'aisi teolʉi mo 'auesiesi.