kolinto 2 3 - buacou seiso no faeva esvʉtʉ

soskuskunu to faeva esvʉta

¹ imzan'asi anga eepza 'e iachi? mimzan'asi maezo ta mocmo ci cou ho mofi no tposʉ hocieno mi'usnu muu ho m'eya tposʉ?

² na muu 'aeno tposʉ mia, isi tposi ta 'tohʉngʉmza, ho poa cohivneni no mocmo, poa engheni no mocmo.

³ isi na'na husansana, isi iachia tposi to kilisto 'e tengami eni, imza psoecingha. 'e tengami eni o'aisis'a titheni no ongʉ ho tposi to fatu, maisi titheni no piepiya to 'auesiesi hamo ho tposi ta 'tohʉngʉ ta cou.

⁴ ho imza yainca, maica ho imza ieni to kilisto ho mi'usnu to hamo ho yaa maicac'o ci singkoo.

⁵ o'ate yainca na eni, maica ho mimza bie'ocʉ to kilisto ho yaa maica ci singkoo. iachi totontone ho hioa eni; 'e totontonemia mo i'mi to hamo.

⁶ isi poa yaa totontone a'mi ho teyai soskuskunu ta faeva ci esvʉta; 'e esvʉta eni o'a i'o isi huyafi ci tposʉ ta hoolicu, ma esvʉta to seilei. 'e isi huyafi ci tposʉ ta hoolicu mo mahafo no mcoi, at'inghi 'e seilei la mofi to nsou.

⁷ 'e hoolicu isi tposi ta fatu ci tposʉ, ne oho epeaska. moso yuyafo 'o psoevohngʉ to hamo, i'omoso mahtiskou to sapci to moose ci tiskova mo e'vono ausuhcu afsi. mioc'o a'cʉ'cʉnʉ taso 'o tiskovasi, ac'ʉhʉ no o'aihe peelʉi teochʉmi to cou'isolaelu 'o moose. hoci mioeno meelʉ psoevohngʉ 'e te mahafo no mcoi ci hoolicu,

⁸ namaeno na isi hioa no seilei na o'ante yaa meoino psoevohngʉ?

⁹ hoci yaa psoevohngʉ 'ete topco no kuisi, 'omo evaho no uk'a kuisi ta cou ci hioa 'atesicueno hafneni no asuhcu meoisi ci psoevohngʉ!

¹⁰ a'ʉmtʉsi, temza peelʉi yainca, ho mioeno yaa na'nohe taotofsi'i ci psoevohngʉ maitan'e, 'onia taotofsi'i ci psoevohngʉ ne noana'o 'amicueno ausuhcu afsi.

¹¹ 'o micu ausuhcu afsi hoci panon'a psoevohngʉsi, 'ote no'auesiesi 'amo ahtuo'te yaa someoino psoevohngʉ.

¹² maica ho mimza yaa maica ci ta'usni, mimza yaa uk'a noc'ʉhi ci 'ʉteʉ.

¹³ o'amimza mais'a 'o moose, tesi 'ahʉyan'a feʉ'sa to yʉteʉ 'o sapcisi, o'te poa aitneni to cou'isolaelu 'o psoevohngʉ ho tec'u ausuhcu afsi.

¹⁴ at'inghi isi cu sngʉsnga 'o 'tohʉngʉhe. ac'ʉhʉ maitan'e, cono ho lahe engha 'o nia noana'o ci esvʉta, isic'on'a asngʉcva feʉ'sa ta mo totiski ci yʉteʉ. maica, mac'o yuecnguhu to kilisto 'e cou, 'e yʉteʉ eni niantec'u peelʉi eceofi.

¹⁵ ac'ʉhʉ maitan'e, cono ho lahe engha 'o hoolicu to moose, 'o yʉteʉ mioc'on'a asngʉcʉ mʉfeʉ'sʉ ta 'tohʉngʉhe.

¹⁶ at'inghi, aʉlʉ mais'a 'o isi engha to seiso:

¹⁷ 'e isi engha tan'e ci 'ai'oeno seilei. mo yonenu na piepiya to nooe'oca, na ic'o micu yaa ziu.

¹⁸ teto acʉhʉ boemi no o'aisi feʉ'sa no yʉteʉ ci sapci ho psoevoveiya na psoevohngʉ to nooe'oca; i'omo i'mi to nooe'oca - i'o seilei - ci psoevohngʉ isi aezuha a'to, poa mi'u'usnu no mi'ausnasi na a'to ho poa yaa asuhcu tofsi'i ci psoevohngʉ.