kolinto 2 2 - buacou seiso no faeva esvʉtʉ

¹ ko'koeno, mi'ocu ma'sansano, ho tena'u i'vaho baito muu 'anate'o i'vaha poa ma'tipvongʉ muu.

² hoci'u poa ma'tipvongʉ muu, siya nate meelʉ poa kaebʉ a'o? 'ac'oeno na os'o poa ma'tipvongʉ ci muu na ten'a meelʉ poa kaebʉ a'o.

³ ko'koeno, ne o'u tposi 'o tengami ic'o ho faeni muu, os'o yose'vi ho tena'u uso muu, i'ontoho poa kaebʉ a'o ci cou nama apuya poa nac'o a'o. os'o yaeza ta'sansana, na kaebʉ'u 'aeno maezo toehungu kaebʉmu.

⁴ mi'o notaico ta ma'tipvongʉ 'atutumio yʉesʉ ho tposi 'e te'o faeni muu ci tengami, o'ate'o poa nac'o muu, ma te'o poa cohivneni mio mainenu na hia'u ngohia muu!

peteongasa 'ola peis'epo ci cou

⁵ homo maica, hoci panonte poa nac'o no mocmo ci cou, o'as'a a'o, ma muu cote acʉhʉ nac'o, ta 'ayumonamu mo piyo 'ote nac'o. ho mo maica co e'e'u, o'a os'o ʉmnʉa hoci anga poa ma'kokoe'i 'emo maica ci cou.

⁶ 'emo maica ci cou ho isi maka toehunga koica 'atec'u amso.

⁷ ma ntemucu coveoza ho au'po'pova, cites'a angu ma'eungzu na 'tohʉngʉ ho ma'papayo'ʉ.

⁸ ko'koeno, te'o tata'za hocimu poa cohivneni, imu asansana ngohia.

⁹ 'o o'u tposi ne auyusi ho faeni muu ci tengami, 'o atuhcusi te'o 'ucia cohivi temu nana masvo'ho no hʉsvʉta, temu nana aa'pucu meo'uzo a'o.

¹⁰ siya na imu peteongasa, ta'u peteongasa na siya. hoci pano nte'o peteongasa, ma mi'o yonto tuhcu to kilisto ho peteongasneni muu,

¹¹ ci tes'a tosa'ohe na satan, maica ho imza na'na asansana 'o moezʉezʉhʉ to satan.

ma'tipvongʉ to poolo

¹² ne mo'u uhne toloya ho psoyaska 'o fukuin to kilisto, 'o nooe'oca ohsicu paavneni to phingi no yaahioai a'o.

¹³ at'inghi, maica ho o'a os'o elʉa 'o nat'ohaesa ci tito, mo na'no ma'tipvongʉ co 'tohʉngʉ'u. os'ocu enonʉ'vi 'o yane'e, ho uhne makitong.

noe'ocʉ to kilisto ho atpʉtʉ

¹⁴ at'inghi, 'aveoveoyʉ to hamo! maica lasi asngʉcva eahahafa a'mi, 'e ohsila holeo to kilisto ci a'mi poa meelʉ to'upu toteuyunu to kilisto homo atpʉtʉ. isin'a yaeza titha a'mi ho poa meingongabo 'o namusngau ho mito bohngʉ to kilisto.

¹⁵ mimza mais'a 'o namusngau to kilisto ci isi sʉ'teni to hamo, meingabo ta feango to isi to'usni ci cou ho itote meapapayo'ʉ ci cou.

¹⁶ mi'usnu tote meapapayo'ʉ ci cou, 'e na'ausna eni. te bumcoi ci nakuzo; ho te mi'usnu to isi to'usni ci cou 'e na'ausna eni te mayono nsou ci namusngau, siya nate masvo'ho tamo maica ecvʉhʉ cite ngoevi?

¹⁷ o'a mimza mais'a 'o botngonʉ ci cou, titha 'amamhimhino 'e e'e to hamo; maica isi skuna to hamo a'mi, poa yonto tuhcusi a'mi ho boemi no ongko no soskuskunu to kilisto ho aʉ'ʉmta psoyaska 'e e'e.