kolinto 2 13 - buacou seiso no faeva esvʉtʉ

engaho ho tuayokeo

¹ te'o cu oteuhu baito muu. ohsicula engha to seiso:

² mi'usnu to mosola peiskuisi ne auyusi ho ito mocmo ci cou, ne mo'ula opsohʉ muu o'ucula engahva, maitan'e 'upena ho o'ami'o yonsica, te'o i'vaha engahva muu, hoci'u vohvaha muu, o'ana ta'us'a peteongasa.

³ 'apano tamu ahtao'te yaa humzi, peelʉi soomei ho isi ieni a'o to kilisto ho aomotʉ'ʉ. ho tasi mi'usni to kilisto na muu o'ates'a yoheoz'u; apuyu, tena yonta taicomu tasi pa'teni na tonʉsi.

⁴ e'vono moso yono yoheoz'u ho noa spica to zuuzika ho mcoi, at'inghi mo noe'ocʉ no tonʉ to hamo mioc'o yaansoua. ho mimza yuecnguhu to kilisto, mimza maezo yoheoz'u, at'inghi nomio no te koa ʉmnʉ muu, temia noe'ocʉ no meoino tonʉ to hamo ho i'upu yaansoua.

⁵ temu hʉsvʉta 'e iachi. huovei 'e iachi, aiti mimunana mino h'oyunsova no singkoo. mac'ocimu asansana o'te pasvo'ha na hʉsvʉta, ntemu cohivi 'o iesu kilisto mo yonta nsoumu.

⁶ os'o tata'za ho cimu cohivi, o'amitos'a o'te masvo'ho no hʉsvʉta.

⁷ temia 'inoli to hamo, poa o'te peiskuzkuzo na muu; o'ates'a yainca te ep'opnanfa ho lamza masvo'ho no hʉsvʉta, mate 'ucia poa yaa mousʉngcʉ ci peipeis'ausna muu, 'upenaeno hoci hu'u'usna no mimza peispapayo'ʉ.

⁸ o'atemza ahtu peismi no te mihango to so'emio ci hi'hioa, tec'o e'oca 'o so'emio.

⁹ mimza yoheoz'u mimu taso, ntemza 'aveoveoneni na eni. 'e imza 'inolineni, zou temu meelʉ yʉepʉngi ci cou.

¹⁰ ko'koeno, ho mi'o nomcovhi muu te'o tposi 'e tengami eni, ta'u o'te 'ahʉya titha 'o isi faeni a'o to nooe'oca ci tonʉ ho mi'usni muu ho eyʉyʉcʉ, i'o isi faeni a'o to kilisto ci tonʉ mate p'eyac'a muu, o'ates'a aon'oza muu.

¹¹ atavei, maanat'ohaesa, huvahi'sio. temula asno'zonʉ yʉepʉngi ci cou. tiova 'e hia'u poucufnu; la acʉhʉ conci 'tohʉngʉ, nananghinghia noteuyunu. tesi'sola asngʉcva no'upi tola mofi to himngonghi ho soanono ci hamo na muu!

¹² temu la boemi no cofkoya ci kisu ho yupa tuayokeo! acʉcʉhʉ 'e sinto te mi'usnu muu ho tuayokeo!

¹³ ina mengumi to iesu kilisto, himngonghi to hamo, conotaucunu to seilei, tesi'sola no'upi 'e mimu macicihi!