kolinto 2 12 - buacou seiso no faeva esvʉtʉ

baito to mavolosi ho paavi 'o poolo

¹ e'vono uk'a ci ʉmnʉsi homo etano, at'inghi te'o 'ahʉyʉn'a ake'i etano. maitan'e te'o ake'a yue'engha 'o isi pafeni a'o to nooe'oca ci mavolosi ho i'o isi paavneni.

² panto os'o cohivi cimo cihi ci sinto, ne auyusi no tomaska uspotʉ oho esifova to tai'toteuha ne pepe (o'a os'o cohivi nenusino 'o feangosi namo ohpepe, hoci o'amoc'o baito no mavolosi, i'oc'o hamo namo bochio).

³ te'o i'vaha yainca, 'e cou eni isi esifova to kaebʉ ci hpʉhpʉngʉ (nenusino na feangosi namo uhne'e, hocieno mioc'o baito no mavolosi, yaeza o'aos'o cohivi, i'oc'o hamo namo bochio).

⁴ to ic'o, isi talʉi 'o o'ate peelʉi yomza no e'e ho epopayoa, yaeza o'ate peelʉi yomza no ngayo ho eʉsvʉsvʉta ci hi'hioa.

⁵ te'o etanveni 'e cou eni; at'inghi hoci o'a inamoc'o natʉ'ca na yoz'u'u, o'a te'o etanveni 'e iachi.

⁶ na a'ʉmtʉsi, hoci'u iachi etano o'ate tamza no nongonongo, maica 'e e'e'u mo emio. at'inghi o'ate'o etano, maica o'aos'o ʉmnʉa hocihe anga hoepzeni a'o, ho nosa'ohe no lahe aiti ho talʉi ta feango'u.

⁷ akoeva no o'te poa angu bitano a'o ho isi paavneni no man'i ci taunona'vʉ, panto conci tma'congo la mais'a cʉmʉ ho ta'poe'i 'e feango'u, totiski no soskuskunu no satan ho ho'co'congvi a'o, poa o'te smeecʉ'ho bitano a'o.

⁸ nomio ta hi'hioa tan'e, mo'ula i'toteuhu 'inoli to hamo ho 'ucia poa yaeni 'e cʉmʉ eni.

⁹ isi at'ingha yut'inga a'o ho yainca: ko'koeno, te'o afnasa ʉmnʉa etanveni 'e yoz'u'u, te'o ko'ko ta'hongi na tonʉ to kilisto ho lasi aʉt'ʉca a'o.

¹⁰ nomio to kilisto. la'u kaeba uveica na yoz'u, pohcingha, 'atutumzo, ngoveo ho akuzkuzoa; maica ho homna na ta'u yoz'u. 'aeno ho homna na ta'u taso.

siya no 'tohʉngʉ to poolo 'o kiokai ne kolinto

¹¹ ci mi'o mais'a cihi ci nongonongo, ma muu si mimu popeoc'ʉc'ʉ a'o ho poa maica. mantemu anana'va emomoengʉa a'o. 'upena ho o'a mi'o nama mainenu, maezo uk'a ci isi yainca o'a mi'o toc'ʉhʉ to .

¹² yonta taicomu, la'u boemi ta mav'ov'o ci buveici, yaeza ieni to taunona'vʉ ci hi'hioa, h'unasi ci tonʉ, ho ito po'e ho mi'usnu muu ho soomei na ongko no'u sitoo.

¹³ tapeoha na o'ao'ula ahta poa e'ngongoseo muu, i'e imu tiova ci hia aʉlʉlʉa nenu namo o'te toc'ʉhʉ to mocmo ci kiokai? eni na os'o o'te poa ahmʉskʉ, temu'so peteongasa a'o!

¹⁴ maitan'e te'o smouyu'ho no i'toteuha usa muu, uk'a ci te'o nama p'enza muu. ma muu na te'o mituhci, o'as'a ina peisumu. a'ʉmtʉsi, o'ate soangveni no yupasʉ ta 'o'oko na maameoi, mai'e maameoi nante soangveni no yupasʉ na 'o'oko.

¹⁵ akoeva no 'ucia to'usni muu, te'o kaebʉ hoci'u tuyafa 'e acʉcʉhʉ'u, ac'ʉhʉ ta feango'u. hoci man'i na nte'o hia ngohia muu tees'aeno namate kakutia nantemu hia ngohia a'o?

¹⁶ homo maica, temucu esansana, o'a o'u la ahta poa e'ngoseo muu; at'inghi panto mioc'on'a mainca mi'o moezʉezʉhʉ, boemi no emeknuyu ho e'pʉ'pʉya muu.

¹⁷ o'ulaeno ahta titha 'o o'ula skuna ci cou ho poa uso muu ho yu'siseiti?

¹⁸ os'o popeocucufna 'o tito ho poa baito muu, yaeza popeoskuna 'o mon'a cihi ci nat'ohaesa ho poa fihoa. mosolaeno ahtu yu'siseiti muu 'o tito? i'o isi hioa ho i'o os'o hioa o'a mos'aeno i'mi no totiski ci koyu? o'a mos'aeno tohmʉskʉ na paepo'ausnamia?

¹⁹ hocieno, lamu ta'unano lamza conino ehcʉvheni 'e iachi, a'ʉmtʉsi o'amos'a maica; yono tuhcu to hamo leamzac'o e'e 'o isi poa e'eneni to kilisto. ngohia ci maananghia, i'e imza afu'a hioa uk'a ci isi o'te 'ucia p'eʉlʉlʉa muu.

²⁰ os'o sokoeva ho ta'u uso muu, aiti hocimu o'te toseolʉ no o'ula 'ucia totea, ho tamu aiti a'o maezo o'amo toseolʉ no ohmula totea, os'o yaeza smoyoa ho ci'u baito no youbobai, smo'eubut'u, ma'sʉsʉ'no, ma'konvosʉ, eayaezoyʉ, buusumsu, bobitano, ho 'afeo'fu'u.

²¹ os'o yaeza smoyoa ho tena'u vohvaho, 'o hamo'u tasi poa yonta tuhcumu a'o ho koe'i, ta'ueno ahtuo'te nomzo tamo botngonʉ ci mosola peiskuisi, smoc'ou, 'aʉnpʉnpʉ ci cou, ac'ʉhʉ maitan'e ho o'te mimho ma'vovei ci cou ho ma'nanac'o.