kolinto 2 10 - buacou seiso no faeva esvʉtʉ

ehcʉvheni to poolo 'o hioasi

¹ na a'o - poolo te'o aʉla iachia poucufna muu. hola'u no'upu muu lamu ta'unano mi'o na'no ma'cocacni, ho la o'te no'upu la na'no mouyʉcʉ; maitan'e te'o ieni to ma'cocacni ho moususeomʉ to kilisto ho m'ene muu:

² ho ta'u uso, teav'as'a popeoc'ʉc'a a'o ho 'oha koe'ia muu. mi'usnu tola eayaezoyʉ am'i ho yainca mimza biftongʉ no 'tohʉngʉ ta hpʉhpʉngʉ ho yaahioa ci cou, o'a te'os'a koekoe'ia.

³ mito e'vono yunsou ta hpʉhpʉngʉ, at'inghi ina lato ehtothomneni o'a mo i'mi nomo tma'usnu ta hpʉhpʉngʉ ci 'to'tohʉngʉ.

⁴ 'e soanothʉ ho lamza ehtothomʉ o'a mo tma'usnu ta hpʉhpʉngʉ, ma soanothʉ no meoino tonʉ to hamo, te peelʉi popsupapayo'a na mahtʉicʉ ci peochipa. temza toemʉema na acʉcʉhʉ cila e'ankʉ ci eehcʉvho,

⁵ popuya 'ola bobitano ci pat'a'ausna ho nomʉtʉ to mocmo hoci bohngʉ to hamo. temia ti'einga 'o 'to'tohʉngʉ ta macicihi ho poa tmaovei to kilisto.

⁶ totea ho tamucu a'sʉftonʉ meo'uzo, tamzacu patvovei 'ola afu'u o'te meo'uzo ci cou.

⁷ lamu i'eafneni ho aiti 'e a'a'ausna ta hi'hioa. hoci panonte ma'unano mo iachi tma'usnu to kilisto, ntesi i'vaha ta'to'tohʉngvana'a, homo tma'usnu to kilisto, 'amimzaeno totiski maezo tma'usnu to kilisto.

⁸ i'o isi pafeni a'mi to nooe'oca ci tonʉ mate p'eʉlʉlʉa muu, o'ates'a pouc'ʉc'a muu; ko'koeno, 'upena hoci'u ake'a etanveni 'e tonʉ eni, yaeza o'ate'o nama h'oinveni.

⁹ teav'as'a ta'unano os'o paehʉzi muu ho os'o tposi 'e tengami eni.

¹⁰ pano mo mainca ci cou:

¹¹ 'emo mo'engho tamo maica ci e'e ntehe cohivi, ho lamza o'te no'upu muu, ho i'e e'e ta tengami, ho i'o lamza hioa ho mimza no'upu muu la hmʉhmʉskʉ.

¹² ci temzaeno ahta seecʉ'ha patotiska 'ola iachi ma'unano mo afnaso ci cou. la a'ʉmtʉ nongonongo, la yaa 'o iachi svʉta ho svʉti 'e iachi, iachia patotiska ta iachi!

¹³ inacu a'mi, i'o lamza etanveni o'amo nosa'o, mo no'ayumonʉ to isi ekuyungvi ci esvʉta to hamo; 'e isi ekuyungvi eni isi pai'upi na lamza hi'hioa ta taicomu.

¹⁴ ho mimueno no'ayumonʉ ta isi ekuyungvi, ho imza psoecʉ'ha muu 'e fukuin to kilisto, 'anate tamza no nosa'o ta esasi.

¹⁵ i'ocu mo noyafo ta imza ekuyungvi, ho aepʉnga no mocmo ci hioa, o'atemza seecʉ'ha etanveni. lamzac'o tata'zeni hocila yusuhci na singkoomu, poa meelʉ yono 'ayumona no isi paisvʉti to hamo ho a'cʉ'cʉna poocoya ta 'ayumonamu nala hioa.

¹⁶ maicac'o, temza peelʉi psoe'usna to mocmo ci hpʉhpʉngʉ 'e fukuin, te o'te yono ohecu yaezoya no mocmo ho etanveni na isi peihcʉ'hi ci hioa.

¹⁷ aʉlʉ mais'a 'o isi yainca to seiso:

¹⁸ maica, inate a'ʉmta peelʉi emomoengʉa ci cou 'aeno nalasi emomoengʉa to nooe'oca ci cou, o'a i'ola iachi meefʉc'ʉ efnasa 'e iachi ci cou.