kolinto 2 1 - buacou seiso no faeva esvʉtʉ

¹ zou poolo a'o; mi'o tiou no 'tohʉngʉ to hamo ho sitoo to kilisto iesu. na a'o ho i'e nat'ohaesa ci temote tmopsʉ ta tengami ho faeni tomo yone kolinto ci kiokai to hamo ho ito afu'u sinto ta 'akaiya.

² pafeni'sio muu to amohamo ho ito nooe'oca iesu kilisto na mengumi ho soanono!

to'aveoveoyʉ to hamo 'o poolo

³ temia 'aveoveoyʉ to amohamo to nooe'oca iesu kilisto! zou himngonghi ci amopepe, maezo 'oi'miza no ao'pou ta acʉcʉhʉ.

⁴ ta ito esmiza ci mav'ov'o ci 'atutumzo, isi ao'pova a'to, poa meelʉ boemi no isi titha ao'pou a'to ho ao'pova 'omo maezo elʉ to mav'ov'o ci 'atutumio ci cou.

⁵ aʉlʉ mais'a a'mi ho totiski to kilisto ho tiou to man'i ci 'atutumzo, teto maezo i'mi to kilisto ho elʉ nomo man'i ci ao'pou.

⁶ hocimia yupteilʉ no 'atutumzo, matesi akoeva no poa elʉ no ao'pou na muu, elʉ no to'usnu; hocimza elʉ no ao'pou, temu maezo elʉ no ao'pou, a'vinano elʉ no tonʉ ho uveica 'e ito elʉa ci 'atutumzo.

⁷ o'a imza ahta ta'pepecvaza na singkoomu; imza cohivi, imu e'paevazi 'e 'atutumzomia, te maezo tma'upu no imza elʉa ci ao'pou.

⁸ maanat'ohaesa, imza tata'ia hocimu cohivi, i'o omza elʉa ci 'atutumzo ne momza yone 'aziasoo. i'omo meotpʉtʉ ta feangomia ci cvʉhʉ mio mainenu na hia meoisi, mainenu 'o hiasi ecvʉhʉ, ac'ʉhʉ no uk'a na maka ta'usni no yaansoua.

⁹ imzac'o ta'hongi tec'u anana'va yʉsvʉta no mcoi. 'emo maica ci a'a'ausna isi poa cohivneni a'mi o'ate meelʉ noe'ocʉ no iachi. tec'o noe'ocʉ to moso poa smoevovei to mcoi ci hamo.

^10-11 ohsi i'mi to sokoeva no mcoi ho to'usni a'mi, tasila a'cʉ'cʉna to'usni ho noana'o; temuc'ola boemi no 'inoli ho to'usni a'mi, imza ta'sansana 'e hamo eni tasila i'vaha hioa na to'usnu. maicac'o, mo botngonʉ ci cou lahe 'inolineni a'mi, poa mayo no mengumi, 'ate ahtuo'te maezo botngonʉ ci cou nate nomio a'mi ho 'aveoveoyʉ to hamo.

aezuhu 'o isi ta'koeva to poolo

¹² i'elamza etanveni zou: 'e ʉmnʉ ci 'tohʉngʉmza isi soomei na lamza hia mi'usnu ta cou ta hpʉhpʉngʉ, aavaho na natʉ'ca ta a'mi ho muu, acʉhʉ tiou to isi pafeni to hamo ci mo'esansano ho 'o'elʉlʉ. na eni moc'o acʉhʉ i'mi no tonʉ no mengumi to hamo. o'amos'a i'mi nomo tma'usnu ta hpʉhpʉngʉ ci moutʉs'ʉ.

^13-14 i'o imza tposi ho faeni muu, c'o asvʉta no temu peelʉi engha ho peelʉi ta'hongi, i'e imu ta'hongi maitan'e zouc'on'a h'atpʉskʉsi, os'o tata'za tamula acʉha cohivi no ataveisi. maicac'o, no hiesi ho tac'u i'vaho cmʉ'ho 'o nooe'oca iesu, tamula etanveni a'mi. totiski ho lamza etanveni muu.

¹⁵ ho mioeno yaa maica ci ma'sansano, mi'ocu ma'koyu no auyu baito muu, poa asuhcu mayo no ao'pou muu.

¹⁶ ho ta'u emo'usnu ne makitong, ma'koyu no auyu neisu ta lamu yoni, ho ta'ucu yuovei tena'u i'vaho neisu, tamu ko'ko to'usni a'o ho emo'usnu ne yutaya.

¹⁷ 'emo maica ci ta'koeva, siya nate meelʉ ehcʉvo ho mainca mi'o 'aʉnpʉnpʉ? 'e ma'koyu eni mios'aeno i'mi no ma'cachi ci 'tohʉngʉ, zohzou no o'a, ho ma'vav'ov'o?

¹⁸ te'o mi'usnu to 'o'emio ci hamo, i'o nia e'e'u o'a mos'a tee .

¹⁹ maica i'o imza toehunga 'o siila ho temote ho i'o os'o psoecʉ'ha muu ci oko to hamo iesu kilisto o'amos'a zou tena o'a. apuyu. 'o kilisto 'ac'oeno to hamo.

²⁰ na ohsila teomneni to hamo homo yonto feango to kilisto 'acueno acʉhʉ . ko'koeno temzacu ieni ho mainca <'aamen> ho psoevohngʉ to hamo.

²¹ isi mi'usni to hamo na suu a'o ho hosoo, mito yunsou to 'ayumona to kilisto; isi ah'una a'to,

²² ta feangoto isi topci to to'hongasi, a'vinano pafi to seilei ho siya ta 'tohʉngʉto, teyaineni note iftongi no ohsi afu'a ayocneni a'to ci acʉcʉhʉ ci hosoo.

²³ te'o m'eya 'akasineni to hamo; hoci'u meknuyu. tasi patvovei a'o, ho mi'o esvʉtʉ o'te uhne kolinto os'o ta'to'tohʉngveni muu.

²⁴ o'aimzas'a pashʉi muu ho yainca cuma na temu taa'uzva, maica ho mimucu bʉʉlʉlʉ ta singkoo. imza apuya tata'za hocito toetoehungu yaahioa, akoeva no poa yaa 'aveoveoyʉ muu.