kolinto 1 9 - buacou seiso no faeva esvʉtʉ

ina tonʉ ho inate ngoevi ta sitoo

¹ o'ami'os'aeno ziu ci cou? o'as'aeno sitoo a'o? o'amocu o'ulaeno aiti 'o nooe'oca iesu? na muu o'as'aeno beahcisi no o'ula hi'hioaneni to nooe'oca?

² 'upena ho o'a lahe ta'una no sitoo to mocmo ci cou a'o, lamu conino ta'una no zou sitoo a'o! maica ho mimu meelʉ sinto to nooe'oca 'aisicueno peelʉi humzi tan'e ho zou sitoo a'o.

³ holahe eayaezoya to cou a'o, 'alaeno maica 'e la'u hia ehcʉvho.

⁴ o'ate'oeno mako yaa tonʉ no noe'ocʉ ta psoyaski no fukuin ho eabobonʉ?

⁵ o'a te'oeno mako mais'a 'o mocmo ci sitoo. mais'a nat'ohaesa to nooe'oca. totiski to petelo ho hafa 'omo sinto ci vcongʉsi ho yuyuso covnʉ?

⁶ niante yainca c'o a'o ho i'o panapa nate ih'unu nomio note paceofa. ana ho iachi yaahioa?

⁷ siya nala heetai ho iachi ayocʉ no 'oanʉ? siya nala emʉm'ʉ no amcuyu ho o'te bonʉ no beahcisi? siya nala smoecau no moatʉ'nʉ ho o'te mimo no nun'usi?

⁸ 'e os'o engha o'ate nama esvʉta talac'o huhucmasa hioa, o'amos'aeno maezo maica 'o e'e to hoolicu?

⁹ isi esvʉta to hoolicu to moose: na lasi siya no 'tohʉngʉ to hamo zous'aeno 'o 'uachumu?

¹⁰ ho isi e'e eni 'amos'aeno mi'usnu a'to ci e'e? ci'aisieno anana'va tposneni a'to! maica i'omo emʉemʉm'ʉ ho i'omo efeutu, la acʉhʉ mooteo no tma'upu note tov'oha ci 'oanʉ.

¹¹ imza yonta taicomu ho yapneni 'e hiyoyapo no piepiya, hocimza i'mi muu ho tiou no macucuma. tees'aeno tamza no aemoemou?

¹² hoci yaa tonʉ na mocmo ho maica ci mooteo muu, o'atemzas'aeno h'unano yaa maica ci tonʉ? at'inghi, o'a omzala ahta titha 'emo maica ci tonʉ, apuya uveica 'e acʉcʉhʉ, cites'a poa nomʉtʉ to fukuin to kilisto.

¹³ 'aimu ahta o'te cohivi, i'ola yaahioa to seiten ci cou la i'mi to seiten ho mayo tote ana; i'ola aʉt'ʉcʉ to 'oyona sʉ'tʉ ho yaahioa ci cou la maezo tma'upu to isi sʉ'teni.

¹⁴ totiski, isi yaeza yaica ci eucufnu to nooe'oca: i'ola yaahioa no psoyaski to fukuin ci cou, nte anana'o noe'ocʉ to psoyaski no fukuin ho e'oca na h'oyunsova.

¹⁵ at'inghi, o'aos'o titha 'emo maica ci tonʉ; ho os'o tposi 'e e'e eni. o'ate'o p'ehʉhʉya 'emo maica ci tonʉ. 'upena hoci'u mcoi 'e os'o etanveni o'ate'o poa 'afeungu!

¹⁶ uk'a ci te'o 'o'emamzi no nomio no psoyaski ta fukuin ho efnaso; mami'oc'o fiho no 'osmuhnua ho psoyaska. hoci'u o'te psoyaska 'e fukuin. te'ocu meamzi.

¹⁷ ho ci'u psoyaski ta fukuin, mo i'mi no smoekaebʉ; te'ocu meelʉ tov'ohʉ no hnoo; at'inghi, ho isieno toveineni a'o to hamo 'e hi'hioa eni, te'ocu ta'unano te anana'va ngoevi.

¹⁸ homo maica, cuma na os'o elʉa ci hnoo? 'ainaeno h'okaebʉa'u ho os'o o'ate 'ahʉya poa tipeisu 'e cou ho mi'o psoyaski ta fukuin, tee yainca o'a os'o titha na nte'o tov'oha ci tonʉ ho mi'o psoyaski ta fukuin.

¹⁹ zou ziu ci cou a'o, o'amo noa tolei ta mocmo ci cou; at'inghi mi'o 'aveoveoyʉ ho noa soskuskunu tamo botngonʉ, akoyu no tmas'usnu tamo asuhcu botngonʉ ci cou.

²⁰ ho te toehungneni yaahioa 'o couyutaya, te'o mais'a couyutaya, akoyu no tmas'usnu to couyutaya. e'vono o'a mi'o noskufu no isi skotʉkca to hoolicu to moose, at'inghi mi'o mais'a mo yunsou to skufu to hoolicu, akoyu no tmas'usnu tomo noskufu to hoolicu ci cou.

²¹ totiski, homo noteuyunu tomo noyafo to hoolicu ci cou, te'ocu mais'a mo noyafo to hoolicu, o'ate'o poa seotpʉtneni to hoolicu to yutaya, te akoyu no tmas'usnu tomo noyafo to hoolicu ci cou. at'inghi, o'aos'o yainca te'o o'te meot'ʉcʉ to hoolicu to hamo; a'ʉmtʉsi isi seotpʉta to hoolicu to kilisto na a'o.

²² homo notaico tomo yoz'u 'o singkoo ci cou, te'o mai'sa mo yoz'u ci cou, te'o akoeva no tas'usna 'emo maica ci cou. ko'koeno, hoci notaico nomo mainenu ci cou, te'o mais'amo mainenu ci cou; 'upena hoci boemi note mainenu ci ti'a'ausna, te'o conino to'usnu nomo piyo ci cou.

²³ mi'o nomio ta fukuin ho hioa 'emo maica ci hi'hioa, na atuhcusi te'o 'ucia poa tma'upu no ʉmnʉsi ta fukuin 'e cou.

²⁴ 'aimu ahtao'te cohivi, i'ola yonto toosa'va ho i'upu yupa toosa'o no mayahe ci cou, la e'vono botngonʉ, at'inghi 'ote mayo to hnoo lac'o cihi. ko'koeno, temula yaa ma'koyu no atpʉtʉ ci 'tohʉngʉ ho peayofʉ.

²⁵ 'emo macicihi cite i'upu toosa'o la tiou tomo afnaso ci aʉsvʉsvʉtʉ, la akoyu no mayo to teec'on'a kuzo ci tafange; at'inghi 'o ito 'ucia 'aanana'veni zou i'o o'ate kuzo ci tafange.

²⁶ ko'koeno, la'uc'o mimhocni ta os'o mituhci ho pa'eusngʉcʉ; mi'o maezo mais'a 'ola toosa'o no yupa muutu ci cou. 'emo macoconci tʉ'pʉ'pʉya o'amo coni nante tmo'vozvozo.

²⁷ la'u eyʉyʉci mi'usni 'e iachi feango, akoeva no a'sʉftona atʉkca, ci tes'a 'afeungu eyoho'ʉ no mocmo ho poa i'upu toosa'o, apuya patnʉ'va no mocmo 'e iachi.