kolinto 1 7 - buacou seiso no faeva esvʉtʉ

e'usnu no mevcongʉ

¹ teeno toʉsvʉsvʉtneni 'e imu tposi to tengami ci hi'hioa. imu yainca, 'emo cihi ci hahocngʉ hoci meelʉ o'te 'ahʉyʉ mevcongʉ te apuyu ʉmnʉ.

² at'inghi, homoeno maica yuyafo 'omo man'i ci smoc'ou ci hi'hioa, 'emo cihi ci hahocngʉ te ʉmnʉ hoci yaa vcongʉa; 'emo cihi ci mamespingi nte maezo yaa iachi vcongʉa.

³ 'e hahocngʉ te pnanfi na te hia yu'tat'ʉcʉ ta navconga; 'e mamespingi te maezo pnanfi nante hia yu'tat'ʉcʉ ta navconga.

⁴ 'e mamespingi uk'a ci tonʉ no peihcachi ta feangosi, mo yonta hahocngʉ na tonʉsi; totiski, 'e hahocngʉ maezo uk'a ci tonʉ no peihcachi ta feangosi, mo yonta mamespingi na tonʉsi.

⁵ 'e navconga teav'a peaezoni na 'to'tohʉngʉ ta suaepohʉ, mac'o ci akoyu no ma'mamhocni ho 'inoli, ho akameosʉn'a nopaevai no hopo; at'inghi no ataveisi te yuovei na anana'o natʉ'ca, temus'a o'te meelʉ atʉkcʉ ho noa eepecvaza no satan.

⁶ homo maica 'e hia'u aomotʉ'ʉ. o'aos'o mashʉyʉ muu, ma os'oc'o 'inania teomneni.

⁷ a'ʉmtʉsi. os'o ʉmnʉa hocimu maezo a'o ho o'te mevcongʉ, at'inghi. 'emo macicihi mo tiou nomo mav'ov'o ci mengumi to hamo, pantola mais'a eni, pantola mais'a ta'e.

⁸ maitan'e, te'o mi'usnu to o'amo mevcongʉ ci cou ho ito mo tuvcongʉ ci mamespingi ho yainca: hoci meelʉ mais'a a'o ho noachi mo apuyu ʉmnʉ.

⁹ hocimu'so o'te peelʉi atʉkca na ma'cac'ou, 'ateno ʉmnʉhe hoci mevcongʉ. hocisi hmoi no puzu na ma'cac'ou, ʉmnʉhe hoci moezʉ mevcongʉ.

¹⁰ mi'usnu to micu mevcongʉ ci cou, panto te'o yaeza eutotaveiya; na a'ʉmtʉsi o'as'a 'tohʉngʉ'u, ma mashʉyʉ to nooe'oca: 'ote mongoi to hahocngʉ 'e mamespingi,

¹¹ hoci mongoi, 'otenas'a ivaho mevcongʉ; hoci maica te ʉmnʉhe hoci naovei 'o hahocngʉ. 'o hahocngʉ yaeza teav'a ciha 'o mamespingi.

¹² mi'usnu to mocmo ci cou. pano te'o yaeza iachia pateafa ci e'e (o'a e'e to nooe'oca): 'emo cihi ci sinto hoci mohcu mevcongʉ no o'a sinto ci mamespingi, 'e mamespingi hoci mici a'cʉ'cʉnʉ noyʉyʉcʉ, teav'as'a 'ucia ciha.

¹³ hoci pano mo cihi ci sinto no mamespingi micu uhno o'a sinto ci hahocngʉ, 'e hahocngʉ hocisi a'cʉ'cʉna 'ucia noepohneni, 'e mamespingi o'ate ʉmnʉ hocisi ciha 'e hahocngʉ.

¹⁴ maica na o'a mo tmaa'uzo to nooe'oca ci hahocngʉ te i'mi tomo tmaa'uzo ci mamespingi ho noa tiova to hamo; totiski, namo o'te tmaa'uzo to nooe'oca ci mamespingi, te maezo i'mi to mo tmaa'uzo to nooe'oca ci hahocngʉ ho noa tiova to hamo. hoci o'te maica, na tehe 'o'oko te tamza no o'aisi tiova to hamo; na a'ʉmtʉsi, isi eno o'te tiova to hamo.

¹⁵ at'inghi, hoci no'usnu no o'amo tmaa'uzo to nooe'oca namo mici mongoi, ci 'ateeno poa maino 'tohʉngʉsi, yontamo maica ci a'a'ausna, i'omo tmaa'uzo to nooe'oca, 'upena na hahocngʉ hocieno mamespingi, tec'u meelʉ ziu. hoisi eyoho'a to hamo na muu, tesi poa nananghinghia noteuyunu.

¹⁶ 'e mimu tmaa'uzo to nooe'oca ci mamespingi, tekoeno peelʉi ta'sansana no o'te peelʉi to'usni na vcongʉsu? 'e mimu tmaa'uzo to nooe'oca ci hahocngʉ, tekoeno peelʉi ta'sansana no o'te peelʉi to'usni na mamespingi?

ayʉca na ongko no eyoho'a

¹⁷ 'e h'oyunsova tamo macicihi nte poa maino mengumi to nooe'oca, a'vinano la suseolʉ no atuhcusi no koa eyoho'a to hamo. na eni zou h'ofiha to la'u hia mo'ma'cohio ta makikiokai.

¹⁸ i'o mohcu tiou no s'e'honga hocu tiou no eyoho'a to hamo ci cou o'ate 'ahʉya aapayo'a na huomza no s'e'honga; i'omo tiou no eyoho'a ho o'amocu oho s'e'honga ci cou 'anate 'ahʉyʉn'a tiyou no s'e'honga.

¹⁹ maica hoci tiou ho o'te tiou no s'e'honga cumanantesi a'a'ausna; na sotva'esa te meot'ʉcʉ to mashʉyʉ to hamo.

²⁰ 'emo macicihi nte ayʉca na ongko ho ohon'a eyoho'a.

²¹ hoci zou tolei na ongkosu ho ohsi eyoho'a, uk'a ci nama kuzosi; at'inghi. hoci meelʉ 'oc'ocic'o elʉ ziu, ateno m'eya ziu.

²² 'emo cihi ci tolei hocisi eyoho'a to nooe'oca 'aisicueno poesih'a to nooe'oca ci cou; 'emo cihi ci ziu ci cou ho isi eyoho'a tec'u tolei to kilisto.

²³ na muu isi yomza no pepe ci huphina ho psuovei to hamo, ko'koeno 'ote noa tolei ta cou.

²⁴ maanat'ohaesa, 'e mimu macicihi. hola yonto tuhcu to hamo, te noyʉyʉci na ongko ho ohsin'a eyoho'a.

e'usna no lenocachi ho inomo tuvcongʉ

²⁵ e'usnu no lenocachi, uk'a ci os'o tiova to nooe'oca ci hia eutotavei. at'inghi isi coveoza to hamo a'o, peelʉi tovei ci cou. te'o ieni tamo maica ci ongko'u ho mi'usnu ta macicihi ho tuyafa na 'tohʉngʉ'u.

²⁶ ta'to'tohʉngva 'e hia ngoveo ta isi esmiza ci a'a'ausna maitan'e, os'o yainca no 'tohʉngʉ'u. 'e cou te atva'esi ʉmnʉ hoci mako meelʉ ma'mamso ta maitan'e.

²⁷ hoci panocu vcongʉsu, 'otes'a mici momeesih'i; hoci o'amocu miko mevcongʉ, o'ate 'ahʉyʉ mevcongʉ.

²⁸ hociko mevcongʉ, o'ate tamza no peiskuisi; hoci mevcongʉ 'o o'amocu mo mevcongʉ ci mamespingi, maezo cuma nate koa yainca o'amo emzo. at'inghi, ʉmnʉahe hocimu o'te mais'a tamo maica ci cou, yonta huhucmasi h'oyunsova ho tiou nomo mav'ov'o cila e'ngoseoneni.

²⁹ maanat'ohaesa, i'o os'o 'ucia eʉsvʉta muu: 'anamo man'i na hie, ahoi maitan'e, 'omo yaa vcongʉa te mais'a mo uk'a vcongʉ;

³⁰ inamo mongsi, mais'a o'amo mongsi; 'omo kokaekaebʉ, te mais'a o'amo kaebʉ; i'omo mhimhino, mais'a uk'a ci isi nama tanua;

³¹ i'ola atngaso yuyupasʉ ta hpʉhpʉngʉ, mais'a uk'a ci isi nama tithasi. maica 'e hpʉhpʉngʉ maitan'e te mon'i sucaefi.

³² os'o tata'za hocimu uk'a ta'tipvonga. i'o o'amo mevcongʉ ci cou la ma'mamhocni ho talʉa nala hi'hioa to nooe'oca, maica la mici noa ʉm'ʉmnʉa to nooe'oca.

³³ 'o micu mevcongʉ ci cou lasi siya ta 'tohʉngʉsi nala hi'hioa ta hpʉhpʉngʉ; maica la mici ʉm'ʉmnʉa to iachisi vcongʉ,

³⁴ ahtuo'te ma'paevai. i'omo uk'a na vcongʉ ho i'omo o'te mevcongʉ ci mamespingi lasi siyahe no 'tohʉngʉ nala hi'hioa to nooe'oca, maica lahe ʉmnʉa sʉ'teni 'o feango ho i'o piepiyahe. 'o micu mevcongʉ ci mamespingi la siyahe no 'tohʉngʉ 'ela hi'hioa ta hpʉhpʉngʉ, maica ho la mici noa ʉm'ʉmnʉa to hahocngʉ.

³⁵ homo maica co e'e'u te'o to'usni muu, o'ate'o esvʉta muu. te'o poa peismi nomo emzo muu, peismi note suseolʉ. a'vinano nomio no lasi hi'hioa to nooe'oca a'sʉftona sʉ'teni 'e iachi, uk'ana ake'a tʉtpʉta.

³⁶ i'o micu yupa esvʉtʉ no navconga ho atavei o'te nazova ci cou, 'o hahocngʉ hoci yaa 'oha 'aseolʉ ci hi'hioa homo mi'usnu to mamespingi, ho ma'cachi na'no poc'ou, mainca no koyusi nte ʉmnʉ hoci mevcongʉ, ci'ateno ʉmnʉ hoci moezʉ mevcongʉ; hoci maica o'ate tamza no yaa kuisia.

³⁷ at'inghi, 'emo cihi honci mahtʉicʉ ci 'tohʉngʉ ho o'te mevcongʉ, (o'amo i'mi no potani ta yafana, mo i'mi no iachisi 'tohʉngʉ), a'vinano meelʉ iachi atʉkcʉ, hoci o'te navconga na mamespingi te apuyu ʉmnʉ.

³⁸ ho isicu e'usna yainca, namo nazova navconga, mioeno o'te ʉmnʉ. hoci o'te mevcongʉ te asuhcuhe ʉmnʉ.

³⁹ 'e micu mevcongʉ ci mamespingi hocin'a yayo 'o hahocngʉ la noa seotpʉta; hoci mcoi na hahocngʉsi, te yaa ziu no mevcongʉ no isi ʉmnʉa ci hahocngʉ, nte at'inghi uhnoc'o totiski sinto.

⁴⁰ at'inghi, hoci o'tena mevaho mevcongʉ te asuhcu ʉm'ʉmnʉ. zou iachi'u 'tohʉngʉ eni; at'inghi os'o yainca no koyu'u, isi e'fiha no piepiya to hamo.