kolinto 1 6 - buacou seiso no faeva esvʉtʉ

yupa eehcʉvho to taico ta sinto

¹ ta 'ayumona ta sinto, hoci panola yupa eehcʉvha ci hi'hioa, mainci aac'o seecʉ'ha ehpʉngneni to o'amo tmaa'uzo to nooe'oca ci hookang, ho o'te poa eususeomneni ta sinto?

² o'a imueno cohivi hotena yʉsvʉta ta sinto 'e hpʉhpʉngʉ? ho temu eno yʉsvʉta 'e hpʉhpʉngʉ, uk'a ci temus'aeno tonʉ no eususeoma 'e moc'o okosi ci hi'hioa?

³ o'aimueno cohivi ho teto yʉsvʉta 'o tensi? namaeno 'e hi'hioa ta hpʉhpʉngʉ?

⁴ ko'ko eno, hoci panomo maica ci ep'ʉcʉ, temu poa eususeomneni to o'ate peelʉi noe'oci ta kiokai ci cou?

⁵ a'ʉmtas'a h'oinveni! uk'a cimoeno mako cihi cinte ake'i yaa moutʉs'ʉ ho peelʉi eususeoma 'emo ep'ʉcʉ ta taicomu?

⁶ ta taicomu maincis'a aac'o yaa yupa ehpʉngʉ ci sinto, a'vinano ehpʉngneni to o'amo tmaa'uzo to nooe'oca ci cou.

⁷ ho mimu yupa ehpʉngʉ, te peelʉi soomei ho mimu a'sʉftonʉ peispapayo'ʉ. mainci o'te tiou hoci ake'i noa efkica? mainci o'te ake'i yupa peteozu?

⁸ namalamu yupa efkici. yupa eon'oi. ac'ʉhʉ hola mi'usnu tomo cono ceonʉ ci 'oahngʉ leac'o maica.

⁹ o'aimueno cohivi ho o'ate meelʉ tma'oko to hpʉhpʉngʉ to hamo 'o mo kokuzo ci cou? teav'a peknui 'e iachi! i'ola afu'u smoc'ou, m'ohkuyu to uacoua, mseezo, noasisi, yu'tupeu ci haahocngʉ,

¹⁰ meo'eoi, ma'konvosʉ, momoyomo, eayaezoyʉ to cou, ho moezʉezʉhʉ to cou, acʉhʉ o'ate meelʉ tma'oko to hpʉhpʉngʉ to hamo.

¹¹ ta taicomu, piyo 'omosola maica ne auyusi. at'inghi. isicu tocofkoyai na muu, isicu poa cofkoya ho tma'usnu to hamo, isicu ieni to ongko to nooe'oca iesu kilisto ho ito piepiya to hamo ho meelʉcu yaa yupa toseolʉ ci natʉ'ca 'o hamo.

boemi ta feangomu ho psoevohngʉ to hamo

¹² nenusi no panote mainca: mioeno o'te emzo, at'inghi 'emo macoconci hi'hioa o'ate acʉhʉ koa ʉmnʉ suu. te'o peelʉi yainca: , at'inghi o'ate'o poa toleineni tamo conci hi'hioa.

¹³ panote mainca ci cou <'e 'oanʉ mo nomio ta cfu'o, 'e cfu'o te nomio ta 'oanʉ.> mioeno o'te emzo. at'inghi tasila aapayo'a to hamo 'emo yuso. 'e feangoto o'amo nomio no smoc'ou ho yayo, mamo nomio to nooe'oca ho yayo, 'o nooe'oca tesi fii note tititha ta feangoto.

¹⁴ isi poa i'mi to mcoi ho poa smoevovei to hamo 'o nooe'oca, totiski tesi yaeza ieni no meoinosi tonʉ ho poa smoevovei a'to.

¹⁵ 'aimu ahtao'te cohivi, 'e feangomu 'aeno maesoesou to kilisto. tetoeno peelʉi teyai maesoesou no noasisi na maesoesou to kilisto? o'ate ahta peelʉi!

¹⁶ 'aimu ahta o'te yaeza cohivi, siya nala yu'tupeu no noasisi, 'amicueno cono feango na noasisi. maica ho isi yainca to seiso: <'emo yoso ci cou te cono feango.>

¹⁷ at'inghi. siya nate biteuyunu to nooe'oca. 'acueno siya nate cono feango to piepiyasi to nooe'oca.

¹⁸ ko'koeno, temula totoefʉngʉ no smoc'ou. 'e cou 'upena hoci peismi nomo mainenu ci kuisi o'ate koakuzo ta iachi feango, i'elac'o peismi no smoc'ou ci cou la akuzkuzoa 'e iachi feango,

¹⁹ o'a imueno cohivi 'e feangomu zou emoo to seilei? 'e seilei eni mo yonta 'ayumonamu, isi pafeni to hamo. o'amimu tma'usnu ta iachi, mamo tma'usnu to hamo,

²⁰ maica ho isi psuepzi phini na muu. ko'koeno, temula boemi ta feangomu ho psoevohngʉ to hamo.