kolinto 1 4 - buacou seiso no faeva esvʉtʉ

sitoo to kilisto

¹ ntemula hu'u'usna no soskuskunu to kilisto na a'mi, tiou no leaʉt'ʉcʉ to moumsʉ'eonʉ ci emoo to hamo.

² ina lasi p'enza to thauke ta leaʉt'ʉcʉ emoo. 'aeno meot'ʉt'ʉcʉ.

³ na muu hocieno na mocmo ci cou hoci etfʉnga a'o, te'o acʉha ta'unano moc'o okosi ci hi'hioa; o'ala'u maka invonva etfʉnga 'e iachi.

⁴ la'u iachi mainca no koyu mo cofkoya co 'tohʉngʉ'u, at'inghi o'ate'o i'mi tan'e ho soomei no uk'aci kuisi'u. 'ai'oc'oeno nooe'oca nate etfʉngʉ a'o.

⁵ ko'koeno, ho o'amocute esmi na hiesi, o'a temu etfʉngʉ no mocmo ci cou. te toc'ʉha ho tac'u i'vaho cmʉ'ho 'o nooe'oca niantec'u yaa sotavei ci yʉsvʉta; ho mio tasi epopayoi na ohola auc'oc'ova efʉefʉnga no voecʉvcʉ, eceofi nala ta'kokoeva ta cou, ho mio. 'emo macicihi tena mayo nonte anana'va elʉa ci tohmomoengʉa to hamo.

⁶ maanat'ohaesa, nomio muu, os'o titheni ta feango'u ho ito 'apolo na eni ci hi'hioa, ho teyai epo'usa, ko'ko poa cohivneni muu zou cuma na isi yainca . 'upena na siya 'otes'a mici bifnaso, hueinva eni ho hupotfʉnga ic'o.

⁷ siya namo poa tosa'o no mocmo na suu? na acʉcʉhʉsu o'a isis'aeno acʉha pafeni to hamo? maincis'a iachi etano, 'e acʉcʉhʉsu mais'a o'aisi pafeni to hamo ci mengumi?

⁸ mimucu noyaemʉhʉ! mimucu atngaso! mimucu honte, hocu sko'usna ta ciepi a'mi. hocieno maica. os'o apuya ʉmnʉa hocimu a'ʉmtʉ honte, tenamza ko'ko maezo i'upu muu ho honte.

⁹ maica'sio, ieni to hia'u bobaito, husansana ho isi poa socivcia to hamo 'e mimza sitoo, mais'a isi yʉsvʉta note poa mcoi ci isi poekotva, yonta taico ta pepe ho ceoa ho peistotothomʉ, poa aitneni to tensi ho ita yatatiskova.

¹⁰ mimza nomzo to kilisto hocu nongonongo ci cou, na muu mimu apuyu yonto kilisto ho na'no mau'to'tohʉngʉ; lamza yoheoz'u, lamu apuyu yumamahtʉicʉ; lahe hupotfʉnga a'mi, apuya koe'ia muu.

¹¹ ac'ʉhʉ maitan'e. mimzac'on'a asngʉcʉ sieo ho mecu. yuesih'i. conino noa ti'usna. nongongabo mimiyo.

¹² a'vinano boemi ta emucu ho peisngongoseo yaahioa ho p'ayunsova 'e iachi. la patkuzkuzoi ta cou, lamza mo'engho tomo tooyokeo ci e'e; lahe akuzkuzoa, lamza buveici;

¹³ noa aokoe'iya, leamza boemi tomo ʉmnʉ ci e'e ho yut'inga. ac'ʉhʉ maiten'e, lahec'on'a hu'u'usna no caciha ta hpʉhpʉngʉ na a'mi, camhʉ ta yatatiskova.

¹⁴ ho os'o tposi 'emo maica ci e'e, o'a te'os'a yainca te poa ma'kokoe'i na muu, ma te'o po'pa'cohivi muu, totiski no os'o ngohia ci iachi'u 'o'oko.

¹⁵ no h'oyunsova ta sinto 'upena hoci yainca pano posimaskʉ ci lema'cohio, mioc'o cihi na amomu. maica ho os'o psoecʉ'ha muu 'e fukuin, ho mi'o yonto 'ayumona to kilisto iesu temucu amo a'o.

¹⁶ ko'koeno, te'o eucufna muu la momaemaezo a'o.

¹⁷ nomio tan'e, os'o popeoskuna 'o temote ho poa uso muu; to 'ayumona to nooe'oca zou ngohia ho meot'ʉt'ʉcʉ ci oko'u. tesi poutʉs'ʉa muu, na faeva ci h'oyunsova'u ho la'u no'ayumonʉ to kilisto iesu, 'ai'o la'u eno po'pa'cohivneni ho la'u yonto makikiokai.

¹⁸ ta taicomu, pantola ma'unano o'ate'o uhta lamu yoni, cu bifnaso.

¹⁹ a'ʉmtʉsi, hocisi teomneni to nooe'oca, o'ate noana'o ta'ucu usa ho aiti muu. ho mio, o'ate'o anova talʉi zou cuma na lahe 'e'e tala bifnaso ci cou, te'o yaeza aiti cuma nalahe peelʉi hioa.

²⁰ maica ina hpʉhpʉngʉ to hamo o'a mo yono e'e, mo yono tonʉ.

²¹ nenusi na temu epeiyahe? nenusi no te'o mahafo no eobaknana, hocieno mahafo no himngonghi ho ma'cocacni ci 'tohʉngʉ ho uso?