kolinto 1 2 - buacou seiso no faeva esvʉtʉ

e'e to zuuzika to kilisto

¹ maanat'ohaesa, ne mo'ula uso muu ne auyusi, ma'imo'u ahtu boemi no eoyonghu ci pat'a'ausna ho ino emsʉ'eonʉ ci motposʉ ho psoyaska 'o moumsʉ'eonʉ to hamo.

² maica mi'ocu ma'kokoyu, ho tena'u no'upu muu, tapeoha 'o iesu kilisto ho ina hi'hioasi ne moso mcoi to zuuzika, o'ate'o mo'mo'engho no mocmosi.

³ ko'koeno, ho ta'u uso muu mo a'sʉftonʉ yoheoz'u, ma'sasmoyo ho ma'eopeophi.

⁴ i'o os'o engha ci e'e, psoyaska ci fukuin, acʉhʉ o'amos'a boemi no evaknoknon'i ho emau'to'tohʉngʉ ci e'e, mamo noe'ocʉ to tonʉ to seilei ho soomei,

⁵ poa o'te i'tohungu no moutʉs'ʉ ta cou na singkoomu, mamo i'tohungu no meoino no tonʉ to hamo.

moutʉs'ʉ to hamo

⁶ mi'usnu to micu yʉepʉngi 'o piepiya ci cou, lea'ueno o'te maezo mo'engho to moutʉs'ʉ; at'inghi o'ala mo'engho tomo tma'usnu ta hpʉhpʉngʉ ci moutʉs'ʉ, maezo o'ate'o mo'engho no moutʉs'ʉ ta tena suhcʉhcʉ cila aʉt'ʉcʉ ta hpʉhpʉngʉ.

⁷ i'e os'o engha ci moutʉs'ʉ zou moutʉs'ʉ no moumsʉ'eonʉ to hamo, 'ai'oisieno efʉngan'a ta cou, at'inghi ohsicu ahoza ne auyusi no teyai 'e hpʉhpʉngʉ ho ta'eoyoca no poa elʉ no psoevohngʉ a'to ci moutʉs'ʉ.

⁸ 'ela atʉkcʉ ta hpʉhpʉngʉ uk'a cimo cihi cinte bochio ta moutʉs'ʉ tan'e, hocihe cohivi, o'antehe spica to zuuzika 'o psoevohngʉ ci nooe'oca.

⁹ aʉlʉ mais'a 'o isi engha to seiso: i'o isi ayocneni ta isi ngohia to hamo, o'amocu ohola aiti ta mcoo, o'a mocu ohola talʉi ta koyu, maezo o'a ohela ta'cʉ'ha ta cou!

¹⁰ at'inghi, 'o hamo isi ieni to piepiyasi ho paavneni a'to 'e moumsʉ'eonʉsi. 'o seilei isi so'eusoya 'e acʉcʉhʉ, ac'ʉhʉ to nomsʉ'eonʉ ci 'tohʉngʉ to hamo lasi yaeza peelʉi so'eusoya.

¹¹ i'ecu cou, i'oc'o mo no'ayumonʉ no iachisi ci piepiya namo bochio no acʉcʉhʉ ci hi'hioa. totiski, i'oc'o piepiya to hamo nate bochio no acʉcʉhʉ cilasi hi'hioa to hamo.

¹² o'amito tiou no piepiya ta hpʉhpʉngʉ, mamito tiou to isi popeoskuna to hamo ci seilei, tesi akoeva no poa meelʉ bochio no isi afu'a faeni a'to to hamo ci mengumi.

¹³ ko'koeno, 'e imza engha ci e'e o'a mo boemi no ohola po'pa'cohivneni ta cou ci moutʉs'ʉ ho engha, mamo boemi no isi po'pa'cohivneni to seilei ci e'e, ho mi'usnu tamo tma'usnu to seilei ci cou ho esansana namo tma'usnu no piepiya ci so'emio.

¹⁴ at'inghi, i'o mo uk'a piepiya to hamo ci cou o'ate meelʉ tiou to isi faeni ci mengumi to piepiya to hamo. 'emo maica ci cou o'atehe peelʉi cohivi 'emo ma'maica ci hi'hioa, lahe yainca no koyuhe mo peisloʉngʉ, maica na huphina ta hi'hioa tan'e, te ahtao'te titheni no mo tmapiepiya ci hia baito niante ta'hongi.

¹⁵ 'emo tma'usnu to seilei ci cou, tesi peelʉi so'eusoya na huphina ta aʉcʉcʉhʉ. at'inghi uk'a cite meelʉ yʉsvʉtʉ ta cou tan'e.

¹⁶ aʉlʉ mais'a 'o isi engha to seiso: siya nate bochio no 'tohʉngʉ to nooe'oca? siya nate ma'tatviei no 'tohʉngʉsi? at'inghi, 'emito no'usnu to seilei ci cou mo yaa 'tohʉngʉ to kilisto.