kolinto 1 16 - buacou seiso no faeva esvʉtʉ

tosmʉyʉ to'usnu to sinto

¹ inacu hi'hioa no tosmʉyʉ ho to'usnu no sinto, temu mais'a to o'ula eutotaveineni ci ti'a'ausna to makikiokai ne ngalatea ho hioa.

² cono hola maikayo, 'emimu macicihi temula ieni no lamu tov'oha ci yupasʉ ho ake'i eseuseu no piyo ci peisu ho ateuyuna, o'ate nama totea ho ta'ucu esmi niantemucu 'atimeumeusu toteuyunu.

³ ho ta'ucu esmi, te popeosmuhnu no imu taa'uzva ci cou ho pahafi no tengami, poa hafneni na tosmʉyamu ho hafa uhne 'elusalemu.

⁴ hocimu 'ucia poa uhne'e a'o, 'ateeno to'ofeihni a'o temza nʉthʉ.

ta'koeva to poolo

⁵ maitan'e te'on'a seolʉano sucaefi ta makitong. ataveisi no neisu ta makitong, tena'ucu uhto lamu yoni.

⁶ ta'u asonʉ miaveivei ta lamu yoni, nenusi no ta'u nocaefi no hosoyʉma, ta'ucu i'vaha sai'cʉ'cʉna na te'o mia ci ceonʉ. maicac'o, 'upena hoci'u emo'usnu nenu, temu peelʉi peomanzi a'o.

⁷ o'aos'o ʉmnʉa ho ci'uc'o neisva ho aiti muu; hocisi teomneni to nooe'oca, os'o tata'za hoci'u ake'i mina'vi no'upu muu.

⁸ at'inghi, te'on'aso tosvo ne 'epeso, ac'ʉhʉ no homeyaya;

⁹ maica, 'upena homoeno botngonʉ 'ola yu'hango ci cou, mo meoino maavo 'e phingi tan'e, mo 'oc'ocic'o yaa na'no ʉmnʉ ci te hia yaahioai.

¹⁰ hoci uhta lamu yoni 'o temote, os'o tata'za hocimu ʉmnʉ ci aʉt'ʉt'ʉca, poa soanono na 'tohʉngʉsi, maica mo totiski a'o ho yaahioaneni 'o nooe'oca.

¹¹ 'upena na siya teav'as'a hupotfʉnga; la poa soanono ho peomanzi smai'cʉ'cʉnʉ no tesi mia ci ceonʉ, poa yuovei ta os'o yoni, maica os'o totea hoci nʉthʉ 'o sinto ho uhtan'e.

¹² i'ocu nat'ohaesa ci 'apolo. la'u asngʉcva poucufna ho poa to'ofeihni to mocmo ci sinto ho baito muu, at'inghi la conino mainca no koyusi o'amocu mo seoseolʉa hoci uhsica maitan'e, totea hoci 'oc'ocic'o yaa ʉmnʉ ci hie tenaeno o'te uso.

pahtaveiya ci e'e

¹³ temula aʉtʉs'ʉ, la bʉʉlʉlʉ na singkoo, la 'ʉteʉ. la butotaso.

¹⁴ acʉcʉhʉ ci hi'hioa la ieni no himngonghi ho hioa.

¹⁵ maanat'ohaesa, panto te'o poucufneni ci e'e. 'aimu ahtao'te honga 'o cono emoo to sutepana; 'e cono emoohe moso atva'esi auyu sinto ta 'akaiya, a'vinano tola hia aʉt'ʉt'ʉcʉ to sinto la afnaso cuveu ci 'tohʉngʉ.

¹⁶ temula tmalʉ tamo maica ci cou, ho itola toehungu ngoseo yaahioa ci cou.

¹⁷ homo meelʉ uhtan'e 'e sutepana, futunato, ho i'e 'akaiku, mi'o a'ʉmtʉ na'no kaebʉ. ihe aʉla peʉezi na 'tohʉngʉmu ho o'a mimu meelʉ yontan'e.

¹⁸ ihe a'ʉmta poa ma'kakaebʉ a'o, mais'a holahe poa ma'kakaebʉ muu. 'emo maica ci cou te 'aseolʉ hocimula einva.

¹⁹ 'o makikiokai ne 'aziasoo mo acʉhʉ mi'usnu muu ho tuayokeo; 'o 'acila ho paicila ho i'o kiokai to emoohe, no'ayumonʉ to nooe'oca ho mi'usnu muu ho asno'zonʉ tuayokeo.

²⁰ 'emo yontan'e ci maanat'ohaesa mo acʉhʉ mi'usnu muu ho tuayokeo. temula boemi no cofkoya ci kisu ho yupa tuayokeo.

²¹ te'o iachia tposi: <'e poolo tooyokeoi na muu!>

²² hoci pano o'amo himngonghi to nooe'oca, nte noa patkuzoi. nooe'oca. teko'so cmʉ'ho!

²³ pafi'sio no mengumi to nooe'oca iesu na muu!

²⁴ no'ayumonʉ to kilisto iesu os'o a'sʉftona ngohia muu!