kolinto 1 15 - buacou seiso no faeva esvʉtʉ

smoevovei to kilisto

¹ maanat'ohaesa, temusola talʉa 'o o'ula psoecʉ'ha muu ci fukuin; 'e fukuin eni imucu tiova, a'vinano teyai totnguca to singkoomu.

² hocimu noyʉyʉci 'e fukuin eni, ho o'tec'o meumzomzo tmaa'uzo, 'ate ahtuo'te i'mizi no noa to'usni.

³ os'o psoecingha muu 'o os'o tiova ci sotva'esi ci e'e, 'aeno: maito isi engha to seiso, isi nomzi to kilisto na kuisito ho mcoi;

⁴ ivaho maito e'e to seiso, noa efo'a, miteuhi cu smoevovei.

⁵ moso aopa'to to petelo, maezo aopa'to to maskʉueso ci sitoo.

⁶ ataveisi moso i'nʉskʉ aopa'to tomo se'einva ci mosola to'ofeihni ci cou; 'emo maica ci cou e'vono piyo 'o micu mcoi, mion'a engha botngonʉ 'o mon'a yayo maitan'e.

⁷ ataveisi, mo aopa'ta to yakovu, maezo aopa'to to afu'u sitoo.

⁸ sotavei, isi yaeza aopa'ta a'o; mi'o mais'a mo yono 'oha 'aseolʉ ci a'a'ausna ho yayo.

⁹ ta 'ayumona ta sitoo mi'o so'okosia, o'ami'o 'aseolʉ no sitoo, maica mo'ula pohtutumzo ta kiokai to hamo.

¹⁰ at'inghi, i'mi no mengumi to hamo, mi'ocu mais'a 'e a'o maitan'e, i'o isi pafeni a'o ci mengumi o'a mo 'afeungu. apuyu, mi'o afnasohe ngoseo yaahioai ta mocmo ci sitoo; a'ʉmtʉsi, o'a mi'o anouc'o peihcachi, mai'o mengumi to hamo 'omo i'upu yaahioa a'o.

¹¹ homo maica, 'upena na a'o hocieno 'o mocmo ci sitoo, lamzac'o acʉhʉ maica ci hia psoyaski, mimu maezo acʉhʉ maica ci hia tmaa'uzo.

smoevovei 'e sinto

¹² 'o imza psoyaska ci e'e ho zoueno 'o kilisto mo i'mi to mcoi ho smoevovei, ta taicomu mo mainci yaa mainca uk'a cimo i'mi no mcoi ho smoevovei ci hi'hioa?

¹³ hoci uk'a smoevovei ci hi'hioa, 'atec'u eno peelʉi yainca, o'amo smoevovei 'o kilisto;

¹⁴ hoci o'amo i'mi no mcoi 'o kilisto ho smoevovei, cuma na ntemzan'a koa psoyaska, maezo uk'a ci temu koa taa'uzva.

¹⁵ maicac'o, 'atec'ueno asansana no mimza emeknuyu ho 'akasi 'o hamo; maica 'o imza 'akasi, yainca isi poa i'mi to mcoi 'o kilisto ho smoevovei. hoci a'ʉmtʉ uk'a cimo i'mi no mcoi ho smoevovei ci hi'hioa, uk'anacu na isi poa smoevovei to hamo 'o kilisto.

¹⁶ hoci o'te smoevovei namo mcoi, tec'u peelʉi yainca o'amo smoevovei 'o kilisto.

¹⁷ hoci o'te smoevovei 'o kilisto, ina singkoomu 'amicueno 'afeungu, temuc'o a'cʉ'cʉnʉ emoapayo'ʉ no 'ayumona no kuisi.

¹⁸ hoci maica, 'o mohcu mcoi ci sinto 'atec'ueno tamza no aapapayo'ʉ.

¹⁹ 'e mito tmaa'uzo to kilisto ci cou hocic'o ho miton'a yayo nate yaa ta'usni, tec'u coveozahe ta afu'u cou ta hpʉhpʉngʉ.

²⁰ at'inghi, a'ʉmtʉsi 'o kilisto micu i'mi to mcoi ho smoevovei; na eni isi hosoo 'o micu mcoi ci cou tena maezo smoevovei.

²¹ maica 'o mcoi mo i'mi tamo cihi ho cmʉ'ho, ina smoevovei namo mcoi. te maezo i'mi tamo cihi ho cmʉ'ho.

²² aʉlʉ mais'a 'e mcoi tamo botngonʉ mo maica homo yuecnguhu to 'atamu, totiski, na smoevovei ta botngonʉ te maica ho i'mi no yuecnguhu to kilisto.

²³ at'inghi, 'emo macicihi te maino auseoseolʉ ci hia matoyange ho smoevovei: te atva'esi auyu 'o kilisto, acnguhusi ho tena i'vaho cmʉ'ho, i'ocu mo tma'usnu to kilisto ci cou.

²⁴ ataveisi tenac'u cmʉ'ho na puesona ta hie; homio, 'o kilisto tesi aapayo'a nala afu'u aʉt'ʉcʉ, tʉʉt'ʉcʉ yaa tonʉa ta moipiepiya, yooveineni to amohamo na hpʉhpʉngʉ.

²⁵ maica 'o kilisto tesi ahtao'te aʉt'ʉca, ac'ʉhʉ ho tasicu atpʉta to hamo na afu'u hangʉ, acʉha poa peteozu to caphʉsi.

²⁶ i'o tasi atva'esa ataveiya aapayo'a ci hangʉ 'ai'oeno mcoi.

²⁷ maica ho isi yainca to seiso: <'o hamo tesi acʉha poa peteozu to caphʉsi 'e acʉcʉhʉ.> na'na husansana, 'e isi yaica tan'e o'aisi pai'upi 'o iachisi feango to hamo, maica 'aeno 'e iachisi namo himhohioa ho poa peteozu to caphʉsi to kilisto 'e acʉcʉhʉ.

²⁸ ac'ʉhʉ ho tac'u acʉhʉ peteozu to kilisto 'e acʉcʉhʉ, 'e oko tena maezo peteozu to moso poa peteozu ta acʉcʉhʉ ci hamo, ko'ko meelʉ notmoyaevonʉ 'o hamo ho aʉt'ʉca 'e acʉcʉhʉ.

²⁹ hoci o'te maica, i'o moso toonono to mohcu mcoi cuma na tesi a'a'ausna? cuma na tehen'a ta'usni? hoci uk'a cimo smoevovei ci hi'hioa, mainci tehe 'ahʉyac'o toononvi na micu mcoi ci cou?

³⁰ mainci temia aac'o 'ahʉyʉ conino peihsosokoyu?

³¹ maanat'ohaesa, la'u huhucmasi mi'usnu no mcoi! te'o seecʉ'ha yainca, 'amoeno'so maica ho mito asngʉcʉ no'ayumonʉ to nsou to nooe'ocato ci kilisto iesu, la'u i'mizi no etanveni muu.

³² ne mo'u yone 'epeso ho ehtothomʉ to yuansou hoci mioc'o i'mi no koyu ta cou, cuma na ntesi koa ʉmnʉ a'o? hoci o'te smoevovei na micu mcoi, 'ateeno mais'a 'o isi yainca to h'oe'ea:

³³ 'ote noa tololoʉngʉi. <'emo kuici nanghia la eteo'hoi to kokuzo ci peipeis'ausna!>

³⁴ la peihsasmome, 'otena i'vaho peiskuisi. ho os'o e'e eni te'o poa ma'kokoe'i muu, maica ita taicomu panto o'amo bohngʉ to hamo.

smoevovei ci feango

³⁵ pano te tuocosʉ:

³⁶ 'e la loʉngʉ ci cou, 'e osko emʉ'a ta ceoa ci tutu, hoci o'te mcoina'a teeno ahtu cmʉfeʉ ho yusuhci.

³⁷ i'e imu emʉ'a ci heome, hocieno mocmo ci tutu, moc'on'a conci maesih'i ci tutu, o'amocus'a ina tasi mi'a'ausna no feangosi ho tac'u yʉepʉngi.

³⁸ 'o hamo isi ieni no iachisi 'tohʉngʉ ho fii no mi'a'ausna 'e tutu; isi acʉha poa yaa 'aseolʉ ci mi'a'ausna 'emo mav'ov'o ci tutu.

³⁹ 'e feango tamo mav'ov'o ci yuansou mioc'o maezo yupa h'unasi: 'e cou mo yaa feango no cou, 'e yuansou mo yaa feango no yuansou, 'e zomʉ mo yaa feango no zomʉ, 'e yoskʉ mo yaa feango no yoskʉ.

⁴⁰ panton'a mi'ausnasi ta engʉca, maezo yaa mi'ausnasi 'e ceoa; mo yaa yonghusi 'e mi'ausnasi ta engʉca, mion'a h'unasi na yonghusi ta mi'ausnasi ta ceoa.

⁴¹ 'o hie panto iachisi tiskova, 'o feohʉ panto iachisi tiskova, 'o congeoha panto iachisi tiskova; a'vinano 'o tiskova ta congeoha tan'e ho tiskova to congeoha ne'e mion'a maezo o'te totiski.

⁴² homo smoevovei 'o micu mcoi 'amoeno maezo maica. la kuzo 'e feango ho isicu efo'a. ho micu smoevovei o'anate kuzo.

⁴³ 'e isi efo'a mo mikuzkuzo ho 'oha taso; 'emo smoevovei mo yonghu ho yutataso.

⁴⁴ 'e isi efo'a mo yaa hmuyu ho fou ci feango; 'emo smoevovei mo tma'usnu no piepiya ci feango. ho mioeno yaa hmuyu ho fou ci feango, 'amo ahtuo'te maezo yaa tma'usnu no piepiya ci feango.

⁴⁵ maica isi yainca to seiso: <'e ahoi cou ci 'atamu isi teyai ho poa yaa nsou ci cou>; at'inghi 'e atavei ci 'atamu mo mofi no nsou ci piepiya.

⁴⁶ 'emo auyu yayo o'amo tma'usnu no piepiya; mo auyu yaa hmuyu ho fou, ataveicu yaa tma'usnu no piepiya.

⁴⁷ 'e ahoi 'atamu mo i'mi ta ceoa ho teyai; 'e i'vaho 'atamu mo i'mi ne pepe ho cmʉ'ho.

⁴⁸ 'emo tma'usnu ta ceoa ci cou mo mi'u'usnu ta oho yomza ta ceoa ho teyai ci cou; i'omo tma'usnu ne pepe ci cou. mo mi'u'usnu to mo i'mi ne pepe ho cmʉ'ho ci cou.

⁴⁹ mitocu yaa no'usnu ta ceoa ci mi'a'ausna, ho noana'o tato maezo yaa mi'u'usnu to mo i'mi ne pepe ci mi'a'ausna.

⁵⁰ maanat'ohaesa, 'e te'o engha zou: 'e isi teyai ta hmuyu ho fou ci feango o'ate meelʉ tiuski no hpʉhpʉngʉ to hamo, i'ote kuzo o'ate meelʉ tiuski no o'ate kuzo.

^51-52 temu buyuyue'iya na moumsʉ'eonʉsi ta hi'hioa tan'e: o'atetos'a acau acʉhʉ mcoi, matena yonoc'o akameosʉ. cono mahtʉ'vosʉ, hotena muni 'o isi peetavei ci la'pa, te acʉhʉ aezuhu. hote muni 'o sotavei ci la'pa, te smoevovei 'omo mcoi hocu o'tena kuzo; tenato maezo aezuhu.

⁵³ maica i'ote kuzo te aezuhu ho o'te kuzo; i'ote mcoi te aezuhu ho o'te mcoi.

⁵⁴ ho tenac'u aezuhu ho o'te kuzo 'ote kuzo, aezuhu o'te mcoi 'ote mcoi, tec'u esmi 'o e'e to seiso: isicu suapayo'i 'o mcoi; isicu peihcʉ'hi na atpʉtʉ!

⁵⁵ mcoi! mo yonenu na atpʉtʉsu? mcoi! mo yonenu na mahiz'o ci cʉmʉsu?

⁵⁶ na mahiz'o ci cʉmʉ no mcoi mo i'mi no kuisi, na tonʉ no kuisi mo i'mi to hoolicu.

⁵⁷ at'inghi, 'aveoveoyʉ to hamo, isi ieni to nooe'ocato iesu kilisto na a'to ho poa atpʉtʉa!

⁵⁸ ko'koeno, ngohia ci maanat'ohaesa, temula bʉʉlʉlʉ, 'otela tmaot'ou. la buoo'te bʉʉpsʉpsʉ no ngoseo ho yaahioaneni 'o nooe'oca; maica imu cohivi, inate yaahioa to nooe'oca o'ate ahtu 'afeungu.