kolinto 1 14 - buacou seiso no faeva esvʉtʉ

i'vaha engha na mengumi to seilei

¹ temula i'ima na himngonghi. la tata'e tomo tma'usnu to piepiya ci mengumi, aavaho 'o mengumi no psoevaho to e'e to hamo.

² i'ola epiepiya o'amo mi'usnu ta cou ho ya'ei, mamo mi'usnu to hamo, maica uk'a cite tma'hongʉ to e'esi. isi ieni to seilei ho engha na moumsʉ'eonʉ ci so'emio.

³ at'inghi, i'ola epeaski to e'e to hamo la mi'usnu ta cou ho engha, la m'eac'ʉ, poucufna, ho ao'pou ta cou.

⁴ i'ola epiepiya ci cou lac'o p'eyac'a 'e iachi, i'ola epeaski to e'e to hamo la p'eyac'a 'e kiokai.

⁵ os'o tata'ia hocimu acʉhʉ meelʉ epiepiya, at'inghi os'o asuhca tata'ia hocimu yaa mengumi no epeaski ta e'e to hamo. maica, mac'oci yaa atfʉngʉ mahcinghi to epiepiya, ho peelʉi p'eyac'a 'e kiokai, hoci o'te maica, 'emo epeaski ta e'e to hamo te na'nohe huecvʉhʉa tamo epiepiya.

⁶ ko'koeno, maanat'ohaesa, ho ci'u uso muu, hoci'uc'o enou no epiepiya, ho o'te hafneni nomo i'mi to hamo ci maavo, mau'to'tohʉngʉ, eyoyocʉ, hocieno mo'ma'cohio, cuma na ntesi koa ʉmnʉ muu?

⁷ ac'ʉhʉ tomo uk'a nsou ci tngootngo, mais'a 'oeno eʉbʉhʉ ho tngootngo no yac'ʉ, na fihngausi hoci o'te yaa nguteo ho mlingi, teeno ta'hongi ta cou zou cuma na tmu'a'ausnasi?

⁸ i'ola meepeucu to la'pa hoci o'te meetuhcu na fihngau, siya nate ae'ayocʉ no yu'susuyumo?

⁹ totiski, hoci o'te asansana na imu engha ci epiepiya, siya nate tma'hongʉ no isi engha ci e'e ta 'ayumonasi? 'amimucuc'oeno mi'usnu ta peucu ho ya'ei!

¹⁰ ta hpʉhpʉngʉ mo man'i ci o'te totiski ci e'e, 'emo macoconci e'e uk'a cimo o'te yaa e'a'ausna.

¹¹ hoci'u o'te tma'hongʉ ta e'e, i'omo bua e'e to ic'o hoci mi'usnu a'o zou cou h'unasi, ho tehe aiti a'o zouc'o maezo cou h'unasi.

¹² totiski, homimueno a'ʉmtʉ tata'e nomo tma'usnu no mengumi no piepiya, 'anteno buii'ima nate meelʉ koa m'eac'ʉ ta kiokai ci mengumi.

¹³ ko'koeno, 'ola epiepiya ci cou nte biebimi nomo afnaso ci mengumi, teeno peelʉi esansana 'e e'a'ausna ta epiepiya.

¹⁴ hoci'u boemi no epiepiya ho 'inoli, 'aeno piepiya'u namo 'inoli, at'inghi o'ate yaa a'a'ausna ta toutʉs'ʉ'u.

¹⁵ teeno mainenu homo maica? te'o boemi no epiepiya ho 'inoli, maezo boemi no toutʉs'ʉ ho 'inoli; te'o boemi no epiepiya ho pasunaeno, te'o maezo boemi no toutʉs'ʉ ho pasunaeno.

¹⁶ hoci o'te maica, hoteko boemi no epiepiya ho 'aveoveoyʉ to hamo, homo seolʉano nouteuyunu i'omo o'te tma'hongʉ no epiepiya ci cou o'atehe cohivi cuma na e'esu, teeno ahtu meelʉ tohmʉskʉ na 'tohʉngʉ ho mainca <'aamen>? maica o'aisi peelʉi cohivi cuma na e'esu.

¹⁷ maicac'o, na hiasu mi'usnu to hamo ho 'aveoveoyʉ ci 'inoli mo e'vono ʉmnʉ, o'ate h'unasi elʉ no p'eac'a na mocmo ci cou.

¹⁸ te'o 'aveoveoyʉ to hamo, na la'u hia epiepiya la na'nohe man'i muu.

¹⁹ at'inghi, hola yu'eteuyunu 'e kiokai, te'o kaebʉhe hoci'u mateoemohʉ note ta'hongi ci e'e, ho meelʉ mo'engho note mo'ma'cohio no cou, ho o'te mo'engho no evaphopho ci epiepiya.

²⁰ maanat'ohaesa, ta 'to'tohʉngʉmu 'ote mais'a oko; tamo kuzo ci hi'hioa temula mais'a foinana. tela poa yʉepʉngi na 'tohʉngʉmu.

²¹ ohsila yainca to seiso: yainca to nooe'oca: te'o ieni tola boemi tomo h'unasi ci e'e ci cou, ieni to sumsu to cou h'unano hpʉhpʉngʉ ho mi'usnu ta yatatiskova tan'e ho ya'ei; at'inghi, o'aihec'o h'unasa talʉi a'o.

²² maica ci hia baito, 'e mengumi no epiepiya o'a mo nomio ta sinto, maisi teyaineni huomza to o'amo tmaa'uzo ci cou. at'inghi, na mengumi no evaho to e'e to hamo o'as'a nomio to o'amo tmaa'uzo ci cou, maisi faeni ta sinto ho teyai huomza.

²³ homo maica, hoci yu'eteuyunu 'e acʉcʉhʉ kiokai, ho acʉhʉ boemi no epiepiya, hoci yʉmeʉmʉ na couyafana ho i'o o'amo tmaa'uzo ci cou, 'ates'aeno yainca mimu acʉhʉ eʉngcʉ?

²⁴ hoci acʉhʉ psoyaski no e'e to hamo, yaa yʉmeʉmʉ ci o'a mo tmaa'uzo ci cou hocieno couyafana, tesi peelʉi i'mi ta isi talʉi ci e'e ho peihsasmome homo iachi yaa kuisi, tma'hongʉ no 'oha sohuyu ci 'tohʉngʉ,

²⁵ epopayoa namo noototoefʉngʉ ci koyu, 'anate meelʉ o'te m'ocnguyu ho m'ohkuyu to hamo, esansano mainca:

noyʉci ta kiokai ci h'ofiha

²⁶ maanat'ohaesa, zou cuma na 'tohʉngʉ? ho lamu yu'eteuyunu ho m'ohkuyu, pantola pasunaeno ci cou, pontola mo'ma'cohio, pantola elʉ no paavi to hamo, panola epiepiya, panola mahcinghi ta epiepiya. la cohivi, nala afu'a hioa nte acʉhʉ koa ec'ʉ ta kiokai niante emio.

²⁷ hoci panonte epiepiya, ntec'o poa yoso hoci o'te tuyu nante yupa easuski, a'vinano nte poa yaa atfʉngʉ mahcinghi ta ihe engha.

²⁸ hoci uk'a mahcinghi ci cou, i'omo epiepiya nte amiocni, tec'o mi'usnu ta iachi ho ito hamo ho ya'ei.

²⁹ i'ocu mo psoyaski to e'e to hamo, te meelʉ yoso tuyu nante ya'ei, nacu mocmo te bumemeala talʉi na ihe maeengha.

³⁰ 'omo yusuhngu, hoci pano isi paavi to hamo, i'omo auyu ya'ei ci cou ntec'u tosvo ya'ei.

³¹ 'e mimu macicihi te acʉhʉ meelʉ yupaasuski epeaski no e'e to hamo, poa momaemaezo 'emo botngonʉ, acʉhʉ mayo no poucufnu.

³² 'ela psoyaski to e'e to hamo ci cou la ake'a atʉkca 'e iachi mengumi;

³³ maica o'aisi ʉmnʉa to hamo hoci ep'ʉcʉ. matesi poa suseomʉ a'to, totiski to makikiokai to mao'o'oko to hamo,

³⁴ 'e maamespingi la amiocni homo yonta taico tamo yu'eteuyunu. o'ate 'ahʉyʉ aomotʉ'ʉ; mais'a 'o isi h'oesvʉta to hoolicu to couyutaya, tela ayʉca na iachi.

³⁵ hoci panontehe 'ucia cohivi, te meelʉ yono emoo ho tuocosi no vcongʉ. hoci ya'ei ho mo nouteuyunu 'e maamespingi la pa'hikokoe'i ci hioa.

³⁶ tee av'a? na e'e to hamo mios'aeno i'mi muu? isic'oeno anova psoecʉ'ha muu?

³⁷ hoci panonte iachi ma'unano mo epeaski no e'e to hamo, hocieno ma'unano mo yaa tma'usnu no mengumi no piepiya, ntesi cohivi 'e os'o faeni muu ci tposʉ mo i'mi no mashʉyʉ to nooe'oca.

³⁸ hocisi peaezoni eni, o'atemu 'ahʉya cumasa.

³⁹ ko'koeno, maanat'ohaesa'u. ntemu m'ene no mengumi no psoyaski no e'e to hamo, at'ingha teav'a 'ahʉya potani 'ola epiepiya.

⁴⁰ 'ela afu'a hi'hioa la aa'pucva poa auseoseolʉ ho suce.