kolinto 1 13 - buacou seiso no faeva esvʉtʉ

e'usnu no himngonghi

¹ 'upena hoci'u meelʉ tamo mav'ov'o ci e'e ta yatatiskova, ac'ʉhʉ no e'e no tensi, hoci uk'a himngonghi, 'e e'e'u teec'o mais'a 'ola ptaʉngʉ ci lungu ho i'ola moengʉ ci lingi.

² hoci'ueno yaa tonʉ no meemealʉ eʉsvʉsvʉtʉ, a'vinano yaeza hʉh'ʉti 'e mav'ov'o ci mau'to'tohʉngʉ, mav'ov'o ci moumsʉ'eonʉ, ac'ʉhʉ no yaa mahtʉicʉ ci singkoo ho peelʉi soezuha 'e hcuyu ho hoyuha ne etʉpʉ, hoci uk'a himngonghi, uk'a ci tesi nama a'a'ausna.

³ hoci'ueno acʉha faeni no mocmo na acʉcʉhʉ ci ezoezoyʉ'u, ac'ʉha no faeni 'e feango'u ho poa hmoeni no mocmo, hoci uk'a himngonghi, 'e os'o hioa tec'o uk'a koa ʉmnʉ.

⁴ 'e himngonghi la nona'o buveici, ma'cocacni; hoci yaa himngonghi o'ate smo'eubut'u, o'ate etano, o'ate bitano,

⁵ o'ate 'aʉnpʉnpʉ na hi'hioa, o'ate kiala, o'ate masʉ'no, o'ate talʉa na peis'epo no mocmo.

⁶ la himkuzo no 'oha moulʉlʉ, lac'o himkaebʉ no so'emio.

⁷ 'e himngonghi lasi paiemʉhi 'e acʉcʉhʉ, la yaa singkoo ta acʉcʉhʉ, la yaa ta'usni ta acʉcʉhʉ, peelʉi uveica 'e acʉcʉhʉ.

⁸ zou 'auesiesi 'e himngonghi. 'e tonʉ no eʉsvʉsvʉtʉ lac'o akameosʉ; 'e mengumi no epiepiya tena yaa hiesi no aepʉngʉ; 'e mau'to'tohʉngʉ te maezo sucaefi.

⁹ maica 'e mau'to'tohʉngʉto mo yaa nosvʉti, maezo yaa nosvʉti 'e mengumi no eʉsvʉsvʉtʉ.

¹⁰ at'inghi, hotena cmʉ'ho 'omo noemʉhʉ, 'emo yaa nosvʉti tenac'u aapayo'ʉ.

¹¹ ne mo'un'a oko, la mais'a oko 'e pat'a'ausna'u, mais'a oko 'e yu'ausna'u, i'ola hia ma'to'tohʉngʉ mioc'o mais'a oko. mi'ocu yʉepʉngi maitan'e, os'ocu acʉha teongasi 'emo peis'o'oko ci hi'hioa.

¹² 'e ito aiti maitan'e mo mais'ac'on'a ongko ta huo'ongka, o'a isi husansana, ho noana'o tenala yupa mimi'usnu hocu husansana. maitan'e o'amocu mo a'sʉftonʉ na hia'u bohngʉ to hamo, ho noana'o tenala a'sʉftonʉ, aʉlʉ mais'a 'o hamo ho lasi a'sʉftona honga a'o.

¹³ at'inghi, 'e singkoo, ta'usni, ho i'e himngonghi, 'emo tuyu te 'auesiesi nongaco, ta taicosi namo sotva'esa zou himngonghi.