kolinto 1 11 - buacou seiso no faeva esvʉtʉ

¹ temula momaemaezo a'o, totiski ho la'u momaemaezo to kilisto.

einu ci hia m'ohkuyu

² la'u emomoengʉa muu; maica ho lamu asngʉcva talʉa a'o, a'vinano noyʉci 'o o'u psoecingha muu ci h'omahsʉfta.

³ at'inghi, os'o tata'za ho cimu cohivi, zou fnguu tamo macicihi ci hahocngʉ 'o kilisto; zou fnguu ta mamespingi 'o hahocngʉ; zou fnguu to kilisto 'o hamo.

⁴ 'e hahocngʉ hoci yontola toehunga 'oyona ho 'inoli hocieno evaho no e'e to hamo, hoci tofeʉ'si 'o fnguu, 'aisieno aokoe'iya 'o kilisto.

⁵ at'inghi, 'e mamespingi hoci yontola toehunga 'oyona ho 'inoli hocieno evaho no e'e to hamo, hoci o'te tofeʉ'sʉ, isi aokoe'iya 'o iachisi vcongʉ. 'emo maica ci mamespingi o'amo mav'ov'o nomo kayampui ci mamespingi.

⁶ hoci o'te tofeʉ'sʉ 'e mamespingi, ʉmnʉhe hoci moeza to'si'si 'o f'ʉsʉsi; ho isieno ta'unano mo koe'i ci hi'hioa hoci to'si'si hocieno sko'si'sa, 'antesieno tofeʉ'si 'o fnguusi.

⁷ 'e hahocngʉ o'ante ʉmnʉ hoci tofeʉ'sʉ, maica ho isi'so psoevoveiya 'o mi'ausna ho i'o psoevohngʉ to hamo. at'inghi 'e mamespingi isi psoevoveiya na psoevohngʉ to hahocngʉ;

⁸ maica 'e hahocngʉ o'amoso i'mi ta mamespingi ho teyai, mai'e mamespingi 'o oho i'mi ta hahocngʉ ho teyai;

⁹ 'e hahocngʉ o'a oho teyaineni ta mamespingi, mai'e mamespingi 'o oho teyaineni ta hahocngʉ.

¹⁰ ko'koeno. i'mi no nomio to tensi. 'e fnguu ta mamespingi nte yaa mitohʉngʉ ci to'honga.

¹¹ na sotva'esasi: yonto 'ayumona to nooe'oca. 'e hahocngʉ ho mamespingi te yupa noe'ocʉ. yupa yu'tat'ʉcʉ.

¹² maica 'e mamespingi mo i'mita hahocngʉ ho teyai. 'e hahocngʉ isi peyafa ta mamespingi. at'inghi 'e aʉcʉcʉhʉ macucuma mo acʉhʉ i'mi to hamo.

¹³ 'atemueno iachia hʉsvʉta! hoci yontala toehunga 'oyona ho 'inoli 'e mamespingi ho o'te feʉ'sa 'e fnguusi mionana 'aseolʉ?

¹⁴ na yu'ausnamu o'a isis'aeno eʉsvʉta muu, 'e hahocngʉ hocisi poa taacvoh'i 'e f'ʉsʉsi 'ates'aeno ma'kokoe'i,

¹⁵ 'e mamespingi hocisi poa taacvoh'i 'e f'ʉsʉsi o'as'aeno psoevohngʉsi? maica 'e taacvoh'i ci f'ʉsʉ te peelʉi teyai tofeʉ'sa.

¹⁶ hoci panote ehcʉvho, te'oc'o yainca, na a'mi ho i'e makikiokai to hamo hoci yonta m'ohkuyu ci hi'hioa uk'a ci mocmo ci 'ofiha.

seisan to nooe'oca

¹⁷ 'e te'o cucufneni ci e'e maitan'e o'a te emomoengʉa muu, maica 'elamu hia yu'eteuyunu la a'ʉmtʉ koa 'oha ʉmnʉ.

¹⁸ 'emo coni, panto mo eʉsvʉtʉ a'o, ho lamu yu'eteuyunu la boevahvoh'unu. os'o taa'uzva mo piyo ci e'e 'omo eʉlʉ.

¹⁹ o'ate yamceni hoci yaa boepaevai ta taicomu; 'ateeno peelʉi humzi tan'e zou siya namo emzo ci 'tohʉngʉ.

²⁰ ho lamu yu'eteuyunu, ma'i ina seisan to nooe'oca na imu noyʉci.

²¹ maica holamu 'aumeumeusa ana 'o lamu iachia hafa ci macucuma, 'amakno pantola sieo, panola moyomo ho yoseʉ.

²² o'antemueno meelʉ yono emoo ho eabobonʉ? nenusino mimu emozu potfʉngʉ to kiokai to hamo. a'vinano poa ma'kokoe'i 'ola thi'cia ci cou? ho te'o mi'usni muu ma nte'o av'a? nte'onana emomoengʉa muu? o'ate'o peelʉi emomoengʉa muu!

²³ 'e os'o psoecʉ'ha muu o'u tiova to nooe'oca: to yofnasi ne oho phieni 'o nooe'oca iesu, isi eepza 'o pang,

²⁴ to'aveoveoyʉ to hamo, tipcia, yainca:

²⁵ oepʉngʉ, yaica ho yaa 'o sooetohvʉ, yainca: <'e sooetohvʉ eni isi titha to hamo 'e hmuyu'u ho p'eyac'a 'e faeva ci esvʉta. cono holamu ima, nte maica nate hioa ho taaecingia a'o.>

²⁶ ko'koeno, ac'ʉhʉ ho tena i'vaho cmʉ'ho 'o nooe'oca, cono holamu ana 'e pang ho ima 'e sooetohvʉ, 'aimueno epopayoa 'o mcoi to nooe'oca.

²⁷ ko'koeno, 'upena na siya, hoci o'te boemi no einu ci 'tohʉngʉ ho bonʉ ta pang to nooe'oca, ima 'e sooetohvʉ to nooe'oca, isicu yutasufka 'o feango ho hmuyu to nooe'oca.

²⁸ 'emo macicihi te auevan'a hʉsvʉta 'e iachi, niantec'u bonʉ ta pang ho mimo to sooetohvʉ.

²⁹ hocisi o'te ta'hongi homo yaa natʉ'ca to feango to nooe'oca 'e isi ana ho ima. ho tesi ana 'e pang ho ima 'e sooetohvʉ tec'o at'inghi iachi noa yʉsvʉta.

³⁰ nomio tan'e, ko'komo 'enepio ta taicomu 'omo yʉsmʉzi, tma'congo, panto mo maezo mcoi.

³¹ hocito auevan'a hʉsvʉta 'e iachi, 'anateto 'ahʉyʉ noa yʉsvʉta.

³² at'inghi, ho mito tiou no yʉsvʉta to hamo, maisi pahsʉsʉfti to nooe'oca na a'to, teto o'te totiski ta yatatiskova ho to'upi topci no kuisi.

³³ ko'koeno, na maanat'ohaesa'u, ho lamu noteuyunu ho noyʉci 'e seisan to nooe'oca, ntela yupania mooteo.

³⁴ hoci pano mo sieo, 'anteno auyun'a yono emoo ho bonʉ, ci tes'a noa yʉsvʉta to hamo homo noteuyunu. inacu mocmo ci hi'hioa, 'ata'ueno ebakneni ho ta'ucu i'vaho cmʉ'ho.