kolinto 1 10 - buacou seiso no faeva esvʉtʉ

etngoeva 'o hi'hioa no m'ohkuyu to uacoua

¹ maanat'ohaesa, te'o poa talʉaneni muu, na ohela esmiza ci hi'hioa to nia maameoito ho mosola to'ofeihni to moose ho yone maepuepuhu. mosola acʉhʉ yono isi to'isihngi no cmʉcmʉ ho ko'ko soanono ho supihi ne fʉhngoya etʉpʉ.

² yonto cmʉcmʉ, yonto etʉpʉ, micu acʉhʉ tiou no toonono ho tma'usnu to moose.

³ moso acʉhʉ bonʉ tomo totiski ci 'oanʉ no piepiya.

⁴ mimo to mo totiski ci esbobuka no piepiya. 'e esbobuka eni mo i'mi tomo to'upu fiho ci yakivayʉ no piepiya ho moheafo; 'o yakivayʉ ic'o 'ai'oeno kilisto.

⁵ at'inghi, to taicohe, na'nosino o'aisi ʉm'ʉmnʉa to hamo, ko'koeno mo acʉhʉ e'puyu ne mamaepuhu ho mcoi.

⁶ 'emo maica ci hi'hioa isi acʉha tohaeveni a'to, engahva a'to ho o'te poa maezo no nia la hiahe ma'konvosʉ ho kokuzo ci hi'hioa,

⁷ 'otela mais'a no moso piyo to 'ayumonahe ho m'ohkuyu no uacoua. aʉlʉ mais'a 'o isi tposi to seiso: <'e yatatiskova eni homo yusuhngu la eabobonʉ ho mimo, homo yac'ʉ la 'otole.>

⁸ o'ate ʉmnʉ hoci mais'a tomo piyo to taicohe ho a'ʉmtʉ peisnou no smoc'ou ho o'te koe'i: mosola i'mi no kuisi no smoc'ou, to cono hie mo tunsohʉ 'omo posimpusku positoteuhu.

⁹ o'ateto maezo tamo piyo ta taicohe ho hʉsvʉta 'o kilisto: maica ho ihe hʉsvʉta 'o nooe'oca mo noa yo'eoca to fkoi ho mcoi.

¹⁰ o'ateto mais'a ta mo piyo ci cou to taicohe ho eubut'uc'o 'o ngayohe: maica ho moso eubut'u ihe opcoza to la himhohioa no aapayo'ʉ ci tensi.

¹¹ 'e ohela elʉa ci hi'hioa. oho acʉha titha tohayo to mocmo ci cou, yaeza acʉha tposi, teyaineni no tetola engahva, maica ho mitocu seolʉa no yonta puesona ta hpʉhpʉngʉ.

¹² ko'koeno, siya namo ma'unano mo iachi bʉʉlʉlʉ, siya nate afnaso bumemealʉ. ci tes'a smopcuku.

¹³ i'elamu esmiza ci macoconci hʉsvʉta malean'a acʉha pasvo'ha ta cou. zou mou'ʉmtʉ 'o hamo; o'atesi ahta poa yupteilʉ no o'atemu pasvo'ha ta tonʉmu ci hʉsvʉta. hola esmi na hʉsvʉta, tesi fii no temu tonʉ, poa pasvo'heni muu. paavneni no temu mia yuyafo ci ceonʉ.

¹⁴ ko'koeno, maananghia, temula totoefʉngʉ tola hi'hioa no m'ohkuyu to uacoua.

¹⁵ mi'o mi'usnu ta lamu bocbochio no hi'hioa ci cou ho ya'ei; temu iachia hʉsvʉta 'e e'e'u mionana emzo.

¹⁶ holato mimo to isi to'aveoveoneni ci sooetohvʉ, o'amos'aeno tma'upu to hmuyu to kilisto? holato bonʉ to isi tipcia ci pang, 'amos'aeno tma'upu to feango to kilisto?

¹⁷ maica mitoc'o coni ci pang, mito acʉhʉ tma'upu ta mo totiski coni ci pang; ko'koeno, mito e'vono botngonʉ. mioc'o cono feango.

¹⁸ temueno aiti 'o cou'isolaelu, i'o moso bonʉ to sʉ'ta, micu yaa natʉ'ca to 'oyona sʉ'tʉ.

¹⁹ cuma na koyu'u ho os'o e'usna yaica? isinana a'ʉmta na'na huecvʉhʉa na uacoua ho ina sʉ'ta?

²⁰ o'amo maica! os'o yainca, 'o isi pasopaeva to 'oyona sʉ'tʉ to couyafana ci sʉ'ta isi faeni no hicu. o'aisi faeni to hamo. o'aos'o ʉmnʉa hocimu biteuyunu na hicu.

²¹ o'atemu soe'upu to sooetohva to nooe'oca temun'a soe'upu no sooetohva no hicu, o'ate o'upu no eabobonʉ to nooe'oca teen'a o'upu no eabobonʉ no hicu.

²² teton'asi asʉsʉ'nova 'o nooe'oca? mitoeno tasohe to nooe'oca?

²³ pantola mainca: mioeno o'te emzo 'e e'e eni. at'inghi, 'emo macoconi ci hi'hioa o'a mo acʉhʉ koa ʉmnʉ. at'inghi, 'emo macoconi ci hi'hioa o'ate acʉhʉ meelʉ to'usnu no cou.

²⁴ 'emo macicihi ci cou o'a inac'o iachi ʉm'ʉmnʉ nate ta'to'tohʉngva, te yaeza ta'to'tohʉngva nate koa ʉmnʉ no mocmo ci cou.

²⁵ 'ola phieni ta momhino ci fou, temu peelʉi acʉha ana, o'ate 'ahʉyʉ nomio no ʉmnʉ ci 'tohʉngʉ ho tuucocosʉ no cuma.

²⁶ maica isi yainca to seiso: <'e aʉcʉcʉhʉ ci macucuma ta ceoa mo acʉhʉ tma'usnu to nooe'oca.>

²⁷ hoci pano o'amo tmaa'uzo to nooe'oca ci cou ihe eho'a muu ho eabobonʉ, mimu maezo mimho uso, temu osno'zonʉ bonʉ no ihe afu'a tuyafa ci 'oanʉ, o'ate 'ahʉyʉ nomio no ʉmnʉ ci 'tohʉngʉ ho ma'pepecvai.

²⁸ at'inghi, hoci yaa eʉsvʉtʉ suu ho yainca i'o isi ana oho titha meesi to uacoua, temucu yumzi 'emo eʉsvʉtʉ muu ci cou, maezo yumzo no ʉmnʉ ci 'tohʉngʉ, teav'a ana 'e 'oanʉ.

²⁹ o'aos'o pas'usna no ʉmnʉ ci 'tohʉngʉmu, maos'o pas'usna to ʉmnʉ ci 'tohʉngʉ to ic'o. nenusi no panote tuocosʉ:

³⁰ hoci'u yaa 'aveoveoyʉ ci 'tohʉngʉ ho tiova 'e 'oanʉ. mainci tehe aac'o peelʉi etfʉnga no mocmo ho os'o ana 'e o'ucu to'aveoveoneni ci 'oanʉ?>

³¹ homo maica. 'upena hoci cuma na imu hioa, bonʉ hocieno mimo, te acʉha poa nomio no psoevohngʉ to hamo ho hioa.

³² 'upena hocimu mi'usnu no couyutaya, coungilisia, hocieno mi'usnu ta kiokai to hamo. o'ate ʉmnʉ hoci poa smopcuku na mocmo ci cou.

³³ temula maito la'u hioa ho hioa; ma os'o acʉha 'ucia poa kokaekaebʉ, o'aos'o ahta ta'to'tohʉngva nate koa ʉmnʉ a'o, la ta'to'tohʉngva nate koa ʉmnʉ tamo botngonʉ, akoeva no poa elʉ no to'usnu.