hevulu 9 - buacou seiso no faeva esvʉtʉ

na m'ohkuyu ta ceoa ho m'ohkuyu ne pepe

¹ 'o ahoi esvʉta mo yaa 'ofiha no m'ohkuyu ho i'o la teyai ta cou ci 'oyona m'ohkuyu.

² ina 'o isi teyai ci tohesa, 'o yafanasi la yainca cofkoyana, 'o 'ayumonasi mo yaa totnguca lampu, pangka, ho i'ola sʉ'teni ci pang.

³ 'o f'uhu to isi ivaha tohesi la yainca socofkoyana,

⁴ to 'ayumonasi pantola titha phomeo to hiu cimo king ci 'oyona sʉ'tʉ, ho i'o isi to'sicucunva to king ci tvo'esvʉta, 'o 'ayumona to tvo'esvʉta isi sii tomo king ci tvoisia maana. panto maezo s'ofʉ to 'along ci mosola yaa cʉfeʉ ho i'o isi tposi to yuso ci fatu cimo maskʉ ci 'oesvʉta.

⁵ to skoskopna to tvoesvʉta panto cilupo, huomza no isi no'upi to hamo; 'o yopngu to cilupo isi feʉ'sa 'o ca'hʉ no peteongaso kuisi. e'usna tan'e o'amocu te'o peelʉi macoconi esansana.

⁶ 'emo ma'maica ci macucuma mo maica 'e hia matotoyange. 'o masasaisi la huhucmasi uhta yafana ta cofkoyana ho hioa 'ola hia m'ohkuyu;

⁷ i'oc'o taisaisi 'ola yʉmeʉmʉ to mʉ'eona to cofkoyana, at'inghi lac'o i'nʉskʉ homo conotonsoha, la aacni mahafo to hmuyu homo yʉmeʉmʉ, nomio ta iachi ho itamo peisnongonongo peiskuisi ci yatatiskova ho sʉ'tʉ to hamo.

⁸ 'o seilei isi ieni tamo maica ci matoyange ho pahsansana, hocin'a afu'u yayo 'e tohesa ta yafana, i'omo sʉc'ʉhʉ to socofkoyana ci ceonʉ o'ate paavi.

⁹ 'e tohesa ta yafana isi epo'usa ta hie maitan'e. te yainca eni 'o isi faeni to hamo ci teonghia ho i'o sʉ'ta o'atesi ahta poa a'sʉftona na 'tohʉngʉ tamo m'ohkuyu ci cou.

¹⁰ na eni moc'on'a e'usnu ta 'oanʉ ho ito mo mav'ov'o ci meecofkoya, mo no'usnu ta h'ofiha ta yafana; na tesi peihcʉ'hi ta h'ofiha tec'o ac'ʉhʉ no hiesi ho tasi teovahi to hamo 'e acʉcʉhʉ.

¹¹ at'inghi 'o kilisto micu cmʉ'ho; homo taisaisi, tesi peiseafi 'e yonghu ci hi'hioa'o tohesasi mo asuhcu meoisi ho asuhcu a'sʉftonʉ, o'aisis'a teyai ta emucu ta cou; te yainca, o'a 'oahngʉ ta isi teyai ci hpʉhpʉngʉ.

¹² nemo yupaezumo to tohesa 'o kilisto, ne isi peisnʉski aepʉngʉ yʉmeʉmʉ to socofkoyana, o'amo titho no hmuyu to moatʉ'nʉ ho ito oko no 'uachumu ho teyai sʉ'ta, ma isi titheni to iachisi hmuyu ho nomio a'to ho aepʉnga 'e 'auesiesi to'usnu.

¹³ 'o hmuyu to moatʉ'nʉ ho hmuyu to hahocngʉ ci 'uachumu, ho i'o fuu to isi hmoi ci inhe 'uachumu, hoisi yapneni to feango to mo i'upu meesi cimo ca'i ci cou, ho peelʉi toonvi na ca'ihe ho poa cofkoya,

¹⁴ na tesi aepʉnga to hmuyu to kilisto o'ates'aeno asuhcuhe man'i? ieni to 'auesiesi ci piepiya, isi aucunva teyai sʉ'ta 'o iachisi feango ho sʉ'teni to hamo. 'o hmuyusi tesi poa cofkoya 'e 'tohʉngʉto peuonva 'emo kuzo ci lato peipeis'ausna, poa meelʉ fifiho to 'auesiesi yaansoua ci hamo.

¹⁵ ko'koeno, 'o kilisto micu bitaico ci cou ta faeva esvʉta, akoeva no poa tiou no ohsi teomneni ci 'auesiesi ʉm'ʉmnʉ 'o ohsi afu'a eyoho'a to hamo. ho isi aepʉnga na eni isi ieni to mcoi; 'e mcoi eni isi yungvo'a 'o ohela hioa ci kuisi to nia ahoi 'oesvʉtʉ.

¹⁶ 'o afu'u eutotavi ahtao'te asansanana'a ho micu mcoi na moso m'eac'ʉ no eutotavei;

¹⁷ maica hocin'a yayo 'emo eutotavei, uk'a ci tesi a'a'ausna ta eutotavei, mac'ocu mcoi 'emo eutotavei niante yaa a'a'ausna 'e isi eutotaveiya.

¹⁸ ko'koeno, a'upu 'e ahoi esvʉta mo maezo boemi ta hmuyu ho p'eyac'a niamicu yaa a'a'ausna.

¹⁹ to nia ahoisi, 'o moose isi fihi 'o hoolicu ho aueva psoecingha ta yatatiskova 'o 'oesvʉta, ataveisi mayo to hmuyu to oko no 'uachumu ho ito hmuyu to moatʉ'nʉ, atvoha to chumu. boemi tomo fʉhngoya ci yʉteʉ ho ito haengu ho tfʉi. epsʉpseni to tposno hoolicu ho ito feango to yatatiskova.

²⁰ isi yainca: <'e hmuyu eni zou to'honga no temu pee'ofeihni 'o mashʉyʉ to hamo.>

²¹ totiski, 'o moose isi yaeza epsʉpseni to tohesa ho itola tititha ci macucuma hola m'ohkuyu 'o hmuyu.

²² hoci ieni to hoolicu, 'e mav'ov'o ci macucuma la na'nosino boemi to hmuyu ho poa cofkoya; hoci o'te yuhmuyu, uk'anaci peteongaso no kuisi.

'o mcoi to kilisto isi poa cofkoya 'o kuisi

²³ 'e isi poa maezo no teo'a'ausna no macucuma ne pepe, ahtuo'te boemi nomo maica ci ti'a'ausna ho poa cofkoya. at'inghi, 'o macucuma ne pepe ahtao'te titheni nomo asuhcu ʉmnʉhe ci sʉ'ta ho poa cofkoya.

²⁴ 'o kilisto ma'imo yʉmeʉmʉ to isi teyai ta cou ci socofkoyana; mac'o hu'ongka to a'ʉmtʉ socofkoyana. mo yʉmeʉmʉ ne pepe, yac'ʉneni to tuhcu to hamo a'to.

²⁵ 'o taisaisi to couyutaya la totovaha mahafo to hmuyu to yuansou ho yʉmeʉmʉ to socofkoyana. at'inghi, 'o kilisto o'atesi nama i'vaveivia sʉ'teni 'o iachi,

²⁶ hoci maica, ahoi ne ohcu teyai 'e hpʉhpʉngʉ, 'atesieno siho uveica na 'atutumzo. 'o kilisto isic'o i'nʉska aepʉnga sʉ'teni 'e iachisi, ta puesonasi ta hpʉhpʉngʉ, isi teyai sʉ'ta 'e iachi, ho acocofkoya na kuisi.

²⁷ ho tac'u mic'ʉhi, 'e yatatiskova te ahtuo'te acʉhʉ i'nʉskʉ mcoi, ataveisi no mcoi tasi yʉsvʉta to hamo.

²⁸ totiski, 'o kilisto yaeza i'nʉska sʉ'teni, peuonvacu 'e kuisi tamo botngonʉ ci cou. tena maezo i'nʉskʉ aopa'to, o'ate cmʉ'ho ho mi'usni 'e kuisi, mate cmʉ'ho ho to'usni 'emo mingsoyʉ mooteo ci cou.