hevulu 8 - buacou seiso no faeva esvʉtʉ

taisaisito ci iesu

¹ 'e atuhcusi ta ito toʉsvʉsvʉtneni mo maica: mito yaa maicac'o cihi ci taisaisi; mo yusuhngu to vhona tomo soyaatonʉa ta sopepea.

² mo yonto socofkoyana ho taisaisi; 'e cofkoyana o'aisi p'eyac'a ta cou, maisi p'eyac'a to nooe'oca ci a'ʉmtʉ ci toohesa.

³ 'emo macicihi ci taisaisi la noa skuna ho mi'usnu to hamo ho mofi to teonghia ho sʉ'ta; i'mi tan'e 'o taisaisito nte maezo panonte faeni.

⁴ hocita yonta ceoa, asonʉ o'ateta meelʉ saisi, maica ho panto micu fiho to hoolicu to yutaya ho mofi to teonghia ci saisi.

⁵ 'e ihe hioa tamo maica ci saisi 'amac'o mi'ausna ho hu'ongka to toohesa ne pepe. aʉlʉ mais'a ne tesi p'eyac'a to moose 'o toohesa, isi mi'usni to hamo ho yainca: <'e teko p'eyac'a acʉha poa fiho to pas'a'auna ne moso yone hcuyu na tesi mi'a'ausna.>

⁶ at'inghi maitan'e, 'o isi tiova to kilisto ci hioa no saisi mo tosa'o ʉmnʉhe ta ihe hioa, aʉlʉ mais'a mo notaico ta cou ho hamo cimo asuhcuhe ʉmnʉ ci esvʉta, maica 'e esvʉta eni mo i'tohungu tomo asuhcu ʉmnʉ ci isi teomneni ho p'eyac'a.

⁷ 'e ahoi esvʉta hoci o'amo yaa ca'i, o'ante 'ahʉyʉ yaa i'vaho esvʉta.

⁸ at'inghi isi koica to hamo 'o 'o'okosi, yainca: yainca to nooe'oca: tec'u mic'ʉhi 'e hiesi, na a'o ho i'e cou ta 'isolaelu ho i'o cou ta yutaya te eh'unu m'eac'ʉ to esvʉta.

⁹ 'e esvʉta eni o'anate mais'a 'o omza p'eyac'a ci esvʉta to nia maameoihe; to nia hiesi ne mio o'ula tiemuca yaakaka, engocha mongoi ne 'ezivuto. at'inghi o'a ohe pee'ofeihni 'o omza p'eyac'a ci yu'tasvʉta. i'mi tan'e yainca to nooe'oca: yaeza 'anate'o cumasa hin'i.

¹⁰ isi i'vaha yainca to nooe'oca: to hie no ataveisi, temza m'eac'ʉ tomo maica ci esvʉta 'e cou'isolaelu: te'o siya ta 'ayumonahe 'e hoolicu'u. tposi ta 'tohʉngʉhe. tehin'i teyai hamo a'o; te'o teyai 'o'oko hin'i.

¹¹ o'atehe nama po'pa'cohivi 'o iachihin'i ehuehungu, hocieno eʉsvʉta no 'oahngʉhe ho yainca: ntemu bohngʉ to hamo; maica ahoi to so'okoa ac'ʉhʉ to somameoza, tehin'i acʉhʉ bohngʉ a'o.

¹² te'o peteongasa na peis'epo hin'i, o'ana te'o i'vaha talʉa na kuisi hin'i.

¹³ ho isieno engha to hamo na faeva ci esvʉta, isicu humzi ho uk'anaci a'a'ausna ta ahoi esvʉta; namo afu'u uk'ana a'a'ausna ho ausuhcu noana'o, ahtuo'te monmon'i aapayo'ʉ.